អភិបាលខេត្តកែប ៖ សិប្បកម្ម​ផលិត​អំបិល​ក្នុង​ខេត្តកែប​ កំពុង​ធ្វើ​សកម្មភាព​ផលិត​យ៉ាង​ផុលផុស​សម្រាប់​ផ្គត់ផ្គង់​ទីផ្សារ​ទូទាំង​ប្រទេស

កែប ៖ នៅថ្ងៃទី ២៤ ខែកុម្ភៈ ឆ្នាំ២០២៥នេះ លោក សោម ពិសិដ្ឋ អភិបាលខេត្តកែប បានថ្លែងនៅក្នុងពិធីបិទកិច្ចប្រជុំបូកសរុបលទ្ធផលការងារឆ្នាំ២០២៤ និង លើទិសដៅអនុវត្តការងារឆ្នាំ២០២៥ របស់មន្ទីរឧស្សាហកម្ម វិទ្យាសាស្ត្របច្ចេកវិទ្យា និង នវានុវត្តខេត្តកែប​ថា ទោះបីជាសេដ្ឋកិច្ចសកលនៅមិនទាន់មានភាពល្អប្រសើរ​នៅ​ឡើយ​ក៏​ដោយ ​ក៏​នៅ​មានសកម្មភាពសេដ្ឋកិច្ចរបស់ប្រជាពលរដ្ឋនៅក្នុងខេត្ត​នៅ​តែ​មានសកម្មភាពទៅតាមរយៈការបង្កើត និង បន្តដំណើរការ​សហគ្រាស​សិប្បកម្ម​ និង​សេវាកម្មជាបន្តបន្ទាប់។

ជាក់​ស្ដែង​ទូទាំង​ខេត្ត​មាន​មូលដ្ឋានផលិតកម្ម​រោងចក្រ​សហគ្រាស និង​សិប្បកម្មចំនួន១៩៩​ទីតាំង​ដែល​កំពុង​ប្រើប្រាស់​កម្លាំង​ពលកម្ម​សរុបចំនួន៦៩៩នាក់ ដោយ​បាន​ប្រើប្រាស់ដើមទុនវិនិយោគសរុបប្រមាណ២,៩០៥,១៤២ដុល្លារ ជាពិសេស​គឺ​សិប្បកម្មផលិត​អំបិល​កំពុង​ធ្វើ​សកម្មភាព​ផលិត​យ៉ាង​ផុលផុសសម្រាប់ផ្គត់ផ្គង់លើទីផ្សារទូទាំងប្រទេសផងដែរ។

ផលិតកម្មអំបិល រួម​ចំណែក​យ៉ាងសំខាន់ក្នុងការបង្កើតការងារជូនប្រជាពលរដ្ឋ ក្នុងនោះរាជរដ្ឋាភិបាលកម្ពុជា បានចាត់ទុកអំបិលជាទំនិញយុទ្ធសាស្ត្ររបស់ជាតិ។

បើតាមរយៈផ្ទៃដីស្រែអំបិលទូទាំងខេត្តកែប កាលពីឆ្នាំ២០២៤កន្លងទៅ ខេត្តនេះប្រមូលផលអំបិលសរុបចំនួន ៤០,៤០៨តោន កើន​ឡើង​ចំនួន ៣៧,៣៨២តោន ស្មើនឹង ១.២៣៥% បើធៀបនឹងឆ្នាំ២០២៣ ដែលផលិតបានតែចំនួន ៣,០២៦តោន ប៉ុណ្ណោះ។

ជាមួយគ្នានេះ​លោក សោម ពិសិដ្ឋ បានណែនាំ​ឱ្យ​មន្ទីរជំនាញ ជំរុញ​ការងារ​ផលិតអំបិលនេះ ឱ្យខ្លាំងក្លា​បន្ថែម​ទៀត។

បើតាម​របាយការណ៍របស់លោក ភោគ សុខេន ប្រធានមន្ទីរឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានប្រាប់ឱ្យដឹងថា ខេត្តកែបមានផ្ទៃដីស្រែអំបិលសរុបចំនួន ៤៩៧.៨៧ ហិកតា ផ្ទៃដីស្រែផលិតជាក់ស្តែងមានចំនួន ៣៥១.៥ហិកតា ខណៈដីស្រែអំបិលផ្សេង ទៀត​ទុកចោល មិនផលិត។

កាលពី​ឆ្នាំ​កន្លង​ទៅ​ អំបិលលក់ចេញមានចំនួន ៣៧,៤៣៣តោន កើនឡើងចំនួន ៣៦,៧៩៧តោន ស្មើនឹង ៥,៧៨៦% ដោយក្នុងនោះតម្លៃអំបិលក្នុង ១ប៉ាវ(៥០គីឡូក្រាម) លក់បានចន្លោះពី ៥,០០០៛ ដល់ ១០,០០០៛។ លោក ភោគ សុខេន ប្រធាបមន្ទីរឧស្សាហកម្ម វិទ្យាសាស្ត្របច្ចឹវិទ្យានិងនវានុវត្តន៍ខេត្យកែបបញ្ជាក់ដែរ​ថា នាបច្ចប្បន្ន អំបិលនៅសល់ក្នុងឃ្លាំង មានចំនួន ២,៩៧៥តោន៕

ដោយ ៖ សឹង រ៉ាត់