ព័ត៌មានជាតិ

ថៃ-កម្ពុជា បន្តបង្ក្រាបក្រុមឧក្រិដ្ឋជនឆបោកតាមអនឡាញនៅទីតាំងជាច្រើន និងរកឃើញជនជាតិថៃ១២៥នាក់

បានផុស

២ ខែ មុន

នៅ

ថ្ងៃចន្ទ ២៤ កុម្ភៈ ២០២៥

ដោយ

នៅថ្ងៃទី២៤ ខែកុម្ភៈ ឆ្នាំ២០២៥នេះ លោកឧត្តមសេនីយ៍ឯក Thatchai Pitaneelabut អគ្គស្នងការរងនគរបាលជាតិថៃបាននិយាយថា បន្ទាប់ពីទទួលបញ្ជាពីលោក Phumtham Wechayachai ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ ដែលចាត់តាំងដោយនាយករដ្ឋមន្ត្រីឱ្យទទួលខុសត្រូវលើការបង្ក្រាប និងបោសសម្អាតក្រុមឧក្រិដ្ឋជនឆបោកតាមអនឡាញ ហើយត្រូវបានលោក Phumtham ប្រគល់ឱ្យអគ្គស្នងការនគរបាលជាតិជាអ្នកទទួលខុសត្រូវក្នុងបង្រ្កាបបទល្មើសបច្ចេកវិទ្យា និងប្រឆាំងការជួញដូរមនុស្ស។

តាមការបញ្ជារបស់លោកឧត្តមសេនីយ៍ឯក Kittirat Panphet អគ្គស្នងការនគរបាលជាតិថៃ ដែលបានទៅចូលរួមកិច្ចប្រជុំជាមួយអគ្គស្នងការនគរបាលជាតិកម្ពុជា ដើម្បីសហការបង្ក្រាបឧក្រិដ្ឋកម្មឆ្លងដែន ឬក្រុមឆបោកតាមអនឡាញស្របតាមគោលនយោបាយរបស់នាយករដ្ឋមន្ត្រីថៃនិងកម្ពុជា ពោលគឺកាលពីថ្ងៃសៅរ៍ និងថ្ងៃអាទិត្យកន្លងទៅនេះ សមត្ថកិច្ចកម្ពុជាបានបើកប្រតិបត្តិការបង្ក្រាបរុករកនិងចាប់ខ្លួនក្រុមឧក្រិដ្ឋជនឆបោកតាមអនឡាញនៅតាមទីតាំងជាច្រើន និងចាប់ខ្លួនបានសរុបចំនួន២១៥នាក់ ក្នុងនោះមានជនជាតិថៃចំនួន១២៥នាក់ និងជនបរទេសចំនួន៩០នាក់ ហើយបាននិងកំពុងបន្តការបង្ក្រាបនិងចាប់ខ្លួនជាបន្តបន្ទាប់ទៀត ដោយមានការសហការនិងសម្របសម្រួលរវាងសមត្ថកិច្ចកម្ពុជានិងសមត្ថកិច្ចថៃ។

លោកថា ប្រតិបត្តិការនេះ គឺជាជំហានដំបូងដ៏សំខាន់ឆ្ពោះទៅរកការបង្រ្កាបជាបន្តបន្ទាប់ ដែលជាការចង់បានរបស់ រដ្ឋាភិបាលនៃប្រទេសទាំងពីរឱ្យចាត់វិធានការដោះស្រាយបញ្ហាឧក្រិដ្ឋកម្មឆ្លងដែន ឬក្រុមឆបោកតាមអនឡាញដែលមិនត្រឹមតែឆបោកតែប្រជាជនថៃប៉ុណ្ណោះទេ ប៉ុន្តែក៏បានឆបោកនៅទូទាំងពិភពលោកផងដែរ។ លោកថា ប្រតិបត្តិការបង្ក្រាបនិងចាប់ខ្លួនក្រុមនេះ នឹងបន្តធ្វើរហូតទាល់តែបោសសម្អាតឱ្យអស់ទាំងស្រុង៕

ប្រភព ៖ khaosod