ព័ត៌មានជាតិ

កម្ពុជា មានសាលារៀនជិត ២ ម៉ឺនសាលា និង សិស្ស-និស្សិតជាង ៤០ ម៉ឺននាក់ នៅទូទាំងប្រទេស

បានផុស

១ ខែ មុន

នៅ

ថ្ងៃអង្គារ ២៥ កុម្ភៈ ២០២៥

ដោយ

ក្នុងឆ្នាំសិក្សា ២០២៤- ២០២៥ នេះ នៅទូទាំងប្រទេស មានសាលារៀនរដ្ឋ និងឯកជន ប្រមាណជិត ២ ម៉ឺនសាលា ដែលមានសិស្ស និងនិស្សិត ប្រមាណជាង ៤០ ម៉ឺននាក់ ក្នុងនោះ សាលារៀនរដ្ឋមានប្រមាណជាង ១ ម៉ឺន ៣ ពាន់សាលា ខណៈសាលារៀនឯកជនមានជាង ២ ពាន់ ២ រយសាលាប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសន្និបាតបូកសរុបការងារអប់រំ យុវជន និងកីឡា ឆ្នាំសិក្សា ២០២៣-២០២៤ និងទិសដៅឆ្នាំសិក្សា ២០២៤-២០២៥ រយៈពេល ៣ ថ្ងៃ ចាប់ពីថ្ងៃទី ២៤ ដល់ថ្ងៃទី ២៦ កុម្ភៈ លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានមានប្រសាសន៍ថា ក្នុងទិដ្ឋភាព នៃការដោះស្រាយសំណូមពររៀនសូត្ររបស់សិស្ស និស្សិត និងយុវជនកម្ពុជា ក្រសួងអប់រំ យុវជន និងកីឡា បានយកចិត្តទុកដាក់លើការអភិវឌ្ឍហេដ្ឋារចនាសម្ព័ន្ធអប់រំ ការផ្តល់គ្រូបង្រៀន និងការគាំទ្រគ្រប់រូបភាព។ ជាក់ស្តែង ក្នុងឆ្នាំសិក្សា ២០២៤- ២០២៥ ចំនួនសាលារៀននៅទូទាំងប្រទេសសរុប ១៩.៥៩១ ក្នុងនោះ សាលារៀនសាធារណៈមាន ១៣.៩៤៨ សាលា សាលារៀនឯកជន ២.២៩៥ សាលា និងមត្តេយ្យសិក្សាសហគមន៍ ៣.៣៤៨ កន្លែង។ គ្រឹះស្ថានឧត្តមសិក្សាទូទាំងប្រទេសមាន ១៩៤ កន្លែង ក្នុងនោះ គ្រឹះស្ថានឧត្តមសិក្សាសាធារណៈ ៧៩ និងគ្រឹះស្ថានឧត្តមសិក្សាឯកជន ១១៥។ សិស្ស និងនិស្សិត សរុប ៤.១៧១.៩៦២ នាក់ ក្នុងនោះ កុមារតូចទទួលបានសេវាអប់រំគ្រប់រូបភាព ៤២៥.៥៣៩ នាក់ ស្រី ៤៩.៨% និងអត្រាចូលរៀនកុមារអាយុ ៥ ឆ្នាំ កើនឡើងពី ៦៥.៤% នៅឆ្នាំសិក្សា ២០២៣-២០២៤ ដល់ ៧១.៤% នៅឆ្នាំសិក្សា ២០២៤-២០២៥។

លោកឧបនាយករដ្ឋមន្ត្រី បានបន្តថា ចំណែកសិស្សបឋមសិក្សាសរុប ២.២៦១.២១៦ នាក់ ស្រី ៤៨% និងអត្រាពិត នៃការសិក្សាកើនឡើងពី ៩៩.៦% នៅឆ្នាំសិក្សា ២០២៣-២០២៤ ដល់ ១០២.៣% នៅឆ្នាំសិក្សា ២០២៤-២០២៥។ សិស្សមធ្យមសិក្សាបឋមភូមិសរុប ៧១២.២៩៨ នាក់ ស្រី ៥២.១% និងអត្រារួម នៃការសិក្សាកើនឡើងពី ៦៥.៥% នៅឆ្នាំសិក្សា ២០២៣-២០២៤ ដល់ ៧៥.២% នៅឆ្នាំសិក្សា ២០២៤-២០២៥។ សិស្សមធ្យមសិក្សាទុតិយភូមិសរុប ៤៥៦.៨០៤ នាក់ ស្រី ៥៥.៦% និងអត្រារួម នៃការសិក្សាកើនឡើងពី ៣៩.៣% នៅឆ្នាំសិក្សា ២០២៣-២០២៤ ដល់ ៤៤.៣% ឆ្នាំសិក្សា ២០២៤-២០២៥ ក្នុងនោះ សិស្សមធ្យមសិក្សាចំណេះទូទៅ និងបច្ចេកទេស ៣.៨៤០ នាក់ ស្រី ៣៣.៦%។ និស្សិតឧត្តមសិក្សាសរុប ៣១៦.១០៥នាក់ ស្រី ៥២.៥% និងអត្រារួម នៃការសិក្សា (អាយុ១៨-២២ ឆ្នាំ) កើនឡើងពី ១៧.៩% នៅឆ្នាំសិក្សា ២០២២-២០២៣ ដល់ ១៩.០៨% នៅឆ្នាំសិក្សា ២០២៣-២០២៤។

លោកឧបនាយករដ្ឋមន្ត្រី បានបន្តទៀតថា រីឯអ្នកសិក្សាដែលបានទទួលការអប់រំក្រៅប្រព័ន្ធតាមគ្រប់កម្មវិធីសរុប ៥០.០៥៣ នាក់ ស្រី ៥២.៤% ក្នុងនោះ អ្នកចូលរៀនកម្មវិធីអក្ខរកម្មអប់រំក្រៅប្រព័ន្ធ ១៧.៥៧៥ នាក់ ស្រី ៦២.៣% អ្នកសិក្សាជំនាញមុខរបរងាយៗ សរុប ១២.១២២ នាក់ ស្រី ៦៣.៥% អ្នកសិក្សាកម្មវិធីសមមូលបឋមសិក្សា និងមធ្យមសិក្សាសរុប ៨.១៥៧ នាក់ ស្រី ៣៩.៩% និងអ្នកសិក្សាបំពេញវិជ្ជាបឋមភូមិសរុប ៨១២ នាក់ ស្រី ២៦.៧% និងមធ្យមសិក្សាទុតិយភូមិបំពេញវិជ្ជាសរុប ២.១០៧ នាក់ ស្រី ៣០.៧%៕

អត្ថបទ ៖ សំអឿន