ក្រោយបញ្ចប់ងារជាឧកញ៉ា លោក ឌួង ឆាយ បានសម្រេចចិត្តទៅសាងផ្នួស

អតីតឧកញ៉ា ឌួង ឆាយ ក្រោយចែកផ្លូវការជាមួយភរិយា និងត្រូវបានបញ្ចប់ងារឧកញ៉ា កាលពេលថ្មីៗនេះ បានសម្រេចចិត្តទៅសាងផ្នួសបួសជាសង្ឃ ដើម្បីតបស្នងសង់គុណលោកអ្នកមានគុណ ព្រមទាំងដើម្បីរំដោះគ្រោះនិងកម្មពារទាំងពួង នៅរសៀលថ្ងៃទី២១ ខែមីនា ឆ្នាំ២០២១ នាវត្តមុនីប្រសិទ្ធីវង្ស រាជធានីភ្នំពេញ។ នេះបើតាមទំព័រហ្វេសបុករបស់លោក ឌួង ឆាយ បានឲ្យដឹងមុននេះ។

លោក ឌួង ឆាយ បានថ្លែងថា “ខ្ញុំបាទ បានបួសសាងផ្នួសដើម្បីសងគុណអ្នកមានគុណ និងលាងបាបកម្ម កម្មពៀរទាំងឡាយ សូមអហោសកម្មអោយខ្ញុំបាទផង”។

គួររម្លឹកថា កាលពីថ្ងៃទី ១៨ ខែមីនា ឆ្នាំ២០២១ ប្រមុខរដ្ឋស្តីទី សម្តេច សាយ ឈុំ បានចេញព្រះរាជក្រឹត្យដកគោរមងារជា ឧកញ៉ា របស់លោក ឌួង ឆាយ បន្ទាប់ពីបែកធ្លាយវីដេអូប្រើហិង្សាលើអតីតភរិយា អ្នកស្រី ដេត ម៉ាលីណា។ លោក ឌួង ឆាយ បាន​ទទួល​គោរមងារ​ជា​ឧកញ៉ា​នៅ​ថ្ងៃ​ទី ០៧ ខែ​មិថុនា ឆ្នាំ​២០១៩៕