នគរបាលកម្ពុជា និងរុស្សី គាំទ្រគ្នាប្រយុទ្ធប្រឆាំង​បទល្មើសឆ្លងដែនគ្រប់ប្រភេទ

អគ្គស្នងការដ្ឋាននគរបាលជាតិកម្ពុជា និងស្ថាប័នអនុវត្តនៃប្រទេសរុស្សី បានឯកភាពគាំទ្រគ្នាទៅវិញទៅមកដើម្បីប្រយុទ្ធប្រឆាំងបទល្មើសឆ្លងដែនគ្រប់ប្រភេទ។ ភាគីទាំងពីរក៏បានឯកភាពវាយតម្លៃខ្ពស់ចំពោះកិច្ចសហប្រតិបត្តិការដែលមានជាមួយគ្នាជាយូរមកហើយលើគ្រប់វិស័យ ទាំងកម្រិតរាជរដ្ឋាភិបាល ជាពិសេសរវាងក្រសួងមហាផ្ទៃកម្ពុជា និងក្រសួងមហាផ្ទៃសហព័ន្ធសរុស្សី។

ក្នុងជំនួបសម្តែងការគួរសម និងពិភាក្សាការងាររវាងនាយឧត្តមសេនីយ៍ ស ថេត អគ្គស្នងការនគរបាលជាតិ និងលោកអាណាតូលី បូរ៉ូវីក (ANOTOLI BOROVIK) ឯកអគ្គរដ្ឋទូតវិសាមញ្ញ និងពេញសមត្ថភាព នៃសហព័ន្ធរុស្ស៊ី ប្រចាំព្រះរាជាណាចក្រកម្ពុជា នៅទីស្តីការក្រសួងមហាផ្ទៃ កាលពីថ្ងៃព្រឹកថ្ងៃទី២៥ ខែកុម្ភៈ ឆ្នាំ២០២៥ ភាគីទាំងពីរក៏បានប្ដេជ្ញាអនុវត្តឱ្យបានភ្ជាប់ភ្ជួន និងមានភាពរីកចំរើនទៅលើសន្ធិសញ្ញា រឺកិច្ចព្រមព្រៀងដែលភាគីទាំងពីរបានចុះហត្ថលេខា។

នគរបាលកម្ពុជា និងរុស្សី ក៏បានឯកភាពបន្តគាំទ្រគ្នាវិញទៅមកទៅលើកិច្ចសហប្រតិបត្តិការរវាងអង្គភាពនគរបាលអន្តរជាតិ(Interpol) នៃប្រទេសទាំងពីរ​ នៅគ្រប់វេទិការអន្តរជាតិ។

នាយឧត្តមសេនីយ៍ ស ថេត អគ្គស្នងការនគរបាលជាតិ បានបង្ហាញពីគោលជំហររបស់នគរបាល​Interpol កម្ពុជា​ ដែលជាស្ថាប័នអនុវត្តច្បាប់មានភារកិច្ចរួមសហការដើម្បីប្រយុទ្ធប្រឆាំងបទល្មើសឆ្លងដែនទៅវិញទៅមក ក៏ដូចជាការជួយជ្រោមជ្រែងគ្នាផ្នែកច្បាប់ពាក់ព័ន្ធទៅនឹងវិស័យព្រហ្មទណ្ឌ​ និងមុខសញ្ញារត់គេចខ្លួន៕