អាគាររដ្ឋបាលសភានឹងដាក់ដំណើរជាផ្លូវការនៅខែមីនាខាងមុខ

អាគាររដ្ឋបាលសភាជាតិដែលជាជំនួយពីសាធារណរដ្ឋសង្គមនិយមវៀតណាមនឹងត្រូវដាក់ដំណើរការជាផ្លូវការនៅខែមីនាខាងមុខ ក្នុងឱកាសដែលរដ្ឋសភាកម្ពុជាប្រារព្ធកម្មវិធីអបអរខួបទី១១៤ទិវាអន្តរជាតិនារី។

ដំណឹងពីការដាក់ដំណើរជាផ្លូវការនេះត្រូវបានលើកឡើងក្នុងជំនួបរវាងប្រធានរដ្ឋសភាកម្ពុជា សម្ដេចសភាធិការធិបតី ឃួន សុដារី និងឯកអគ្គរដ្ឋទូតវៀតណាមថ្មីនៅកម្ពុជាលោក ង្វៀន មិញវ៉ូ កាលពីព្រឹកថ្ងៃទី២៦ ខែកុម្ភៈ ឆ្នាំ២០២៥។

ក្នុងឱកាសនោះសម្ដេចប្រធានសភាកម្ពុជាបានថ្លែងអំណរគុណចំពោះបក្ស រដ្ឋ និងប្រជាជនវៀតណាមដែលបានផ្ដល់ឱ្យកម្ពុជានូវអាគាររដ្ឋបាលសភាថ្មីនេះ។

អាគាររដ្ឋបាលសភាដែលមានតម្លៃ២៥លានដុល្លារអាមេរិកមានកម្ពស់១២ជាន់ និងបំពាក់ដោយសម្ភារៈទំនើប មានរចនាបថស្ថាបត្យកម្មខ្មែរ។ អគារដ្ឋបាលថ្មីនេះ នឹងបម្រើដល់ការងាររដ្ឋបាលរបស់រដ្ឋសភា ដូចជា ជាការិយាល័យរបស់គណៈកម្មការជំនាញរដ្ឋសភា ជាសាលប្រជុំ ព្រមទំាងជាការិយាល័យរបស់មន្រ្តីអគ្គលេខាធិការដ្ឋានរដ្ឋសភាផងដែរ។

សំណង់អគាររដ្ឋបាលនេះបានបើកការដ្ឋានសាងសង់កាលពីចុងឆ្នាំ២០២១ ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាពញាចក្រី ហេង សំរិន ប្រធានរដ្ឋសភានីតិកាលទី៦និង អតីតប្រធានរដ្ឋវៀតណាម ឯកឧត្តម ង្វៀង ស៊ុនហ្វុក ហើយត្រូវបានដាក់សម្ពោធកាលពីខែវិច្ឆិកា ឆ្នាំ២០២៤កន្លងទៅក្នុងអំឡុងពេលប្រធានសភាវៀតណាមលោក ជិន ថាញ់មិន ធ្វើទស្សនកិច្ចនៅប្រទេសកម្ពុជា៕

អត្ថបទដោយ ហ៊ុន សិរីវឌ្ឍន៍