សម្ដេចតេជោ បញ្ជាក់ពីស្ថានភាពសុខភាពល្អប្រសើរ ទោះឆ្លងជំងឺកូវីដ១៩

នៅព្រឹកថ្ងៃទី២៧ ខែកុម្ភៈ ឆ្នាំ២០២៥នេះ សម្ដេចតេជោ ហ៊ុន សែន ប្រធានព្រឹទ្ធសភានៃកម្ពុជា បានបញ្ជាក់ពីស្ថានភាពរបស់សម្ដេចដែលកំពុងឆ្លងជំងឺកូវីដ-១៩ គឺសម្ដេចមានសុខភាពល្អប្រសើរ កម្លាំងមាំមួន ដោយអាចវាយកូនគោលបាន។

សំណេររបស់សម្ដេចតេជោ លើបណ្ដាញទំនាក់ទំនងសង្គម បានសរសេរដូច្នេះថា«ព្រឹកនេះ ខ្ញុំប្រើពេលជាង៣ម៉ោងវាយកូនគោល កម្លាំងប្រៀបដូចយុវជនអាយុជាង៣០ឆ្នាំ ពេលវាយ driver ចេញ។ គ្មានក្អកគ្មានហៀរសំបោរ»។

សម្ដេចតេជោ បានបន្ថែមថា ទាំងគ្រូពេទ្យ និងបងប្អូនផ្សេងទៀតបានលើកទឹកចិត្តឱ្យសម្ដេចហាត់ប្រាណ ទើបឆាប់ជាសះស្បើយ។ ដូច្នេះ សម្ដេច បានជ្រើសយកការវាយកូនគោល ដែលជាកីឡាដែលសម្ដេចចូលចិត្ត ដើម្បីហាត់ប្រាណ។ ប៉ុន្តែយ៉ាងណា សម្ដេចតេជោ នៅតែបញ្ជាក់ពីការប្រុងប្រយ័ត្នមិនឱ្យជំងឺឆ្លងទៅអ្នកផ្សេងទៀត ពិសេសអ្នក ដែលបម្រើការងារនៅតារាងកូនគោល។

សម្ដេចតេជោ បញ្ជាក់ថា ដរាបណាការធ្វើតេស្តនៅតែមានវិជ្ជមានកូវីដ-១៩ សម្ដេចនៅតែមិនចូលរួមប្រជុំ ឬទទួលភ្ញៀវនោះឡើយ។ តែសម្ដេចសង្ឃឹមថា នឹងបានចូលរួមអាពាហ៍ពិពាហ៍កូនអ្នកឧកញ្ញា លី ហួរ នៅថ្ងៃ៧ ខែមីនា ឆ្នាំ២០២៥ ខាងមុខ។

ការចេញមកបញ្ជាក់ដូច្នេះខាងលើរបស់សម្ដេចតេជោ គឺបន្ទាប់ពីមានបុគ្គលមួយចំនួនតូច ដែលសុទ្ធសឹងតែក្រុមជ្រុលនិយម បានប្រមាថដល់អាយុជីវិតសម្ដេច ខណៈមានមនុស្សជាច្រើន ពិសេសប្រជាពលរដ្ឋលើសលប់បានបន់ឱ្យសម្ដេចតេជោបានឆាប់ជាស្បើយពីជំងឺ។

ជាការកត់សម្គាល់ សម្ដេចតេជោ ត្រូវបានរកឃើញថា ឆ្លងជំងឺកូវីដ-១៩​ ក្រោយមានអាការៈក្អក និងហៀរសំបោរ។ តាមសំណេរលើទំព័រហ្វេសប៊ុករបស់សម្ដេចតេជោ ប្រធានព្រឹទ្ធសភា កាលពីយប់ថ្ងៃទី២៥ ខែកុម្ភៈ ឆ្នាំ២០២៥ សម្តេចតេជោ ហ៊ុន សែន បានប្រកាសថា សម្តេចបានឆ្លងជំងឺកូវីដ១៩ និងត្រូវអវត្តមានពីកម្មវិធីមួយចំនួន ជាពិសេសការចូលគាល់ព្រះមហាក្សត្រ នាថ្ងៃ២៨ ខែកុម្ភៈ ឆ្នាំ២០២៥ ខាងមុខនេះ៕