ព័ត៌មានជាតិ

មន្ត្រីជាន់ខ្ពស់ការងារ ជំរុញមន្ត្រី ត្រៀមដោះស្រាយបញ្ហាជាច្រើន ពេលកម្ពុជាចាកចេញពីក្រុមប្រទេសអភិវឌ្ឍន៍តិចតួច

បានផុស

១ នាទីute មុន

នៅ

ថ្ងៃព្រហស្បតិ៍ ២៧ កុម្ភៈ ២០២៥

ដោយ

មន្ត្រីជាន់ខ្ពស់ នៃក្រសួងការងារ និងបណ្តុះបណ្តាលវិជ្ជាជីវៈ បានជំរុញឱ្យមន្ត្រីទាំងអស់ ត្រូវត្រៀមខ្លួនដោះស្រាយនូវបញ្ហាជាច្រើនជូនកម្មករ-និយោជិត នៅពេលប្រទេសកម្ពុជាចាកចេញពីក្រុមប្រទេសអភិវឌ្ឍន៍តិចតួច ក្នុងឆ្នាំ ២០២៩ ខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីបើក “សន្និបាតបូកសរុបលទ្ធផលការងារឆ្នាំ ២០២៤ និងលើកទិសដៅការងារឆ្នាំ ២០២៥ របស់ក្រសួងការងារ និងបណ្តុះបណ្តាលវិជ្ជាជីវៈ ”នៅព្រឹកថ្ងៃទី ២៧ កុម្ភៈនេះ នៅវិទ្យាស្ថានជាតិបណ្ដុះបណ្ដាលបច្ចេកទេស លោកស្រី សុវណ្ណ វណ្ណារតន៍ រដ្ឋលេខាធិការប្រចាំការ នៃក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ថា ការចាកចេញពីក្រុមប្រទេសអភិវឌ្ឍន៍តិចតួចក្នុងឆ្នាំ ២០២៩ កម្ពុជា នឹងជួបប្រទះនូវបញ្ហាប្រឈមថ្មីៗ ដែលតម្រូវឱ្យមានគោលនយោបាយឆ្លើយតប ប្រកបដោយការគិតគូរជាយុទ្ធសាស្ត្រគ្រប់ជ្រុងជ្រោយ និងត្រៀមដោះស្រាយសម្រាប់កម្មករ-និយោជិត រួមទាំងបញ្ហាលំហូរព័ត៌មានទីផ្សារការងារ , រចនាសម្ព័ន្ធទីផ្សារការងារ , បម្រែបម្រួល នៃវដ្តទីផ្សារការងារ ជាដើម។

លោកស្រី បានបន្តថា «ហេតុដូច្នេះ កម្ពុជា ជាពិសេសក្រុមគ្រួសារ និង សហការី នៃក្រសួងការងារ និងបណ្តុះបណ្តាលវិជ្ជាជីវៈ ត្រូវប្រកាន់ខ្ជាប់នូវស្មារតីបុរេសកម្មក្នុងការគិតគូរ និងត្រៀមខ្លួន ដើម្បីដាក់ចេញ និងអនុវត្តគោលនយោបាយដែលមានប្រសិទ្ធភាពសម្រាប់វិស័យការងារ និងបណ្តុះបណ្តាលវិជ្ជាជីវៈ។ យើងត្រូវបុរេសកម្មជាប់ជានិច្ច ត្រូវត្រៀមបម្រុងជាប់ជានិច្ច ត្រូវសកម្មរស់រវើកគ្រប់កិច្ចការការងារ ត្រូវខិតខំធ្វើកិច្ចការឱ្យបានល្អ ហើយដើម្បីធ្វើកិច្ចការបានល្អ គឺត្រូវធ្វើគ្រប់កិច្ចការទាំងអស់ឱ្យបានល្អ»។

លោកស្រីជឿជាក់ថា «អ្វីដែលយើងបាន និងកំពុងធ្វើ ព្រមទាំងបន្តធ្វើ នឹងបង្កើតជាមូលដ្ឋានគ្រឹះរឹងមាំសម្រាប់ឆ្លើយតប និងយកឈ្នះបញ្ហាប្រឈមនាពេលខាងមុខ»។

លោកស្រីបានទទួលថា ប្រជាពលរដ្ឋមួយចំនួនធំ នៅមិនទាន់សាទរចំពោះការផ្តល់សេវាសាធារណៈរបស់យើងនៅឡើយទេ ទោះបីជាយើងបានខិតខំប្រឹងប្រែងខ្លាំងហើយក៏ដោយ។ ទោះបីជានៅក្នុងចិត្ត ក្នុងបេះដូងរបស់ប្រជាពលរដ្ឋ ប្រហែលជាមិនទាន់ទទួលយក មិនទាន់សាទរ និងមិនទាន់រីករាយស្វាគមន៍ជាមួយការលះបង់របស់យើង ១០០% ក៏ដោយ សូមចាំឱ្យច្បាស់ថា យើងជាមន្ត្រី ហើយមន្ត្រី គឺបម្រើរាស្ត្រ។

លោកស្រី មានសុទិដ្ឋិនិយមថា ការខិតខំរបស់យើង នឹងបង្កើតឱ្យមានអនុស្សាវរីយ៍ផ្អែមល្ហែមជាច្រើន និងជាបន្តបន្ទាប់ ហើយអនុស្សាវរីយ៍ផ្អែមល្ហែមទាំងអស់នេះ នឹងលុបបំបាត់នូវភាពជូរចត់ ការគិតអវិជ្ជមាន ការមិនទុកចិត្ត និងមន្ទិលសង្ស័យទាំងឡាយ ដែលពួកគាត់ធ្លាប់មានមកលើយើង។

លោកស្រី សូមលើកទឹកចិត្តឱ្យមានការពិភាក្សាឱ្យបានផុសផុលនៅក្នុងសន្និបាតនេះ ពីព្រោះមតិយោបល់ និងធាតុចូលសំខាន់ៗ ដែលយើងនឹងទទួលបានពីការពិភាក្សានៅថ្ងៃនេះ នឹងជួយជំរុញការលើកកម្ពស់ការងារក្រសួងរបស់យើងឱ្យកាន់តែប្រសើរថែមទៀត សំដៅរួមចំណែកឱ្យបានជាអតិបរមា ដើម្បីឈានដល់ការសម្រេចបានដ៏ត្រចះត្រចង់នូវកម្មវិធីនយោបាយ, ក៏ដូចជាការសម្រេចបានដោយជោគជ័យនូវគោលដៅអភិវឌ្ឍន៍ជាតិ និងយុទ្ធសាស្ត្របញ្ចកោណ-ដំណាក់កាលទី ១ របស់រាជរដ្ឋាភិបាល នីតិកាលទី ៧ នៃរដ្ឋសភា ដើម្បីជំរុញល្បឿននាវាកម្ពុជាឈានដល់ការសម្រេចបានចក្ខុវិស័យជាប្រទេសមានចំណូលខ្ពស់នៅឆ្នាំ ២០៥០៕

អត្ថបទ ៖ សំអឿន