ព័ត៌មានជាតិ

ក្រុមគ្រួសារពលករខ្មែរនៅកូរ៉េ ៖ ផ្តាំកូនចៅគ្រប់ៗគ្នាកុំចូលរួមក្នុងបាតុកម្មឱ្យសោះ រក្សាភាពស្ងប់ស្ងាត់បន្តធ្វើការធម្មតា កុំជ្រួលជ្រើម

បានផុស

១ នាទីute មុន

នៅ

ថ្ងៃព្រហស្បតិ៍ ២៧ កុម្ភៈ ២០២៥

ដោយ

លោកយាយ លោកតា ដែលជាអាណាព្យាបាល ក្រុមគ្រួសារ របស់ពលករខ្មែរដែលកំពុងធ្វើការនៅសាធារណរដ្ឋកូរ៉េបានបង្ហាញការព្រួយបារម្ភជាខ្លាំងលើសុវត្ថិភាព និងការប៉ះពាល់អាជីពការងាររបស់កូនៗចៅៗរបស់ខ្លួន ដែលខិតខំប្រឹងប្រែងទម្រាំបានចេញទៅធ្វើការងារនៅក្រៅប្រទេស បន្ទាប់ពីបានទទួលដំណឹងថា មានក្រុមអ្នកនយោបាយជ្រុលនិយមនៅក្រៅប្រទេសតែងតែបំផុសបំផុលកៀរគរពលករខ្មែរនៅក្រៅប្រទេស និងប្រទេសកូរ៉េផងដែរ ឱ្យចូលរួមសកម្មភាពធ្វើបាតុកម្មខុសច្បាប់នៅលើទឹកដីបរទេស ដែលពលករកំពុងធ្វើការនោះ។

ទន្ទឹមនឹងនេះ ក្នុងនាមជាចាស់ទុំដែលធ្លាប់ឆ្លងកាត់ភ្លើងសង្គ្រាមជោគជាំពីអតីតកាលហើយនោះ បានអំពាវនាវឱ្យកូនៗចៅៗទាំងអស់ ដែលកំពុងធ្វើការនៅប្រទេសកូរ៉េ សូមជឿទុកចិត្តមកលើរដ្ឋាភិបាលដែលជាតួអង្គសំខាន់តែមួយគត់ដែលអាចដោះស្រាយបញ្ហាដោយសន្តិវិធីបាន។

លោកតា សុន ទុយ ជាអាណាព្យាបាលរបស់ក្រុមគ្រួសារពលករដែលកំពុងធ្វើការនៅសាធារណកូរ៉េបានលើកឡើងថា លោកតា និងក្រុមគ្រួសារនៅក្នុងស្រុកមានការបារម្ភម្តងហើយម្តងទៀត លើសុវត្ថិភាព ទាំងការងារនិងផ្លូវចិត្តចំពោះកូនចៅរបស់ខ្លួនដែលកំពុងបម្រើការងារនៅសាធារណកូរ៉េ ពីព្រោះទម្រាំបានសម្រេចបញ្ជូនកូនចៅរបស់ខ្លួនទៅធ្វើការនៅបរទេសនេះ គឺពិបាកណាស់ ដូច្នេះហើយប្រសិនបើបាត់បង់ការងារដោយសារតែមានការបំផុសបំផុលឱ្យធ្វើបាតុកម្មពីសំណាក់ក្រុមប្រឆាំងច្រើនលើកច្រើនសារពេកនោះ លោកតាទទួលយកមិនបាននោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកតាបានសង្កត់ធ្ងន់ថា ចេះដឹងរឿងជាតិមិនខុសនោះទេ ក៏ប៉ុន្តែការទៅធ្វើបាតុកម្មប៉ាតណាប៉ាតណីលើទឹកដីបរទេសនេះមិនមែនជាការស្នេហាជាតិនោះទេ វាជាការបង្កចលាចល និងដាក់បន្ទុកមកលើជាតិខ្លួនឯងវិញទេតើ។ ដែលទាំងនេះលោកតាថា ជាសកម្មភាពខុសគេខុសឯង ខុសពីពលរដ្ឋប្រទេសដ៏ទៃទៀតដែលគេទៅធ្វើការដូចគ្នាចឹងដែរ តែគេមានសណ្តាប់ធ្នាប់ជាង។ ផុតពីបាតុកម្មមួយចូលបាតុកម្មមួយទៀតឥតឈប់ឈរ ដែលលោកតាលើកឡើងថា ឃើញសកម្មភាពទាំងនេះម្តងៗគឺអាម៉ាស់ខ្លាំងណាស់ ខណៈម្ចាស់ស្រុកគេដើរតាមផ្លូវទៅធ្វើការ ដោយឡែកយើងជាពលរដ្ឋបរទេសបែរដើរហែរក្បួនតាមផ្លូវទៅវិញ។ លោកតាបានចោទសួរថា តើនេះជារឿងល្អគួរណាស់មែនទេ?

ដោយឡែកលោកយាយ ភី ស៊ាមគាវ ជាអាណាព្យាបាលរបស់ក្រុមគ្រួសារពលករនៅសាធារណកូរ៉េម្នាក់ទៀតបានលើកឡើងពីក្តីបារម្ភដូចគ្នា ត្បិតកូនចៅរបស់ខ្លួននឹងមិនទៅចូលរួមធ្វើបាតុកម្មដែលជាការបំផុសបំផុលពីសំណាក់ក្រុមប្រឆាំងច្រើនលើកច្រើនសារក៏ដោយ ពីព្រោះលោកយាយថា ត្រីមួយកន្ត្រកស្អុយមួយ ស្អុយទាំងអស់ ពីព្រោះបើគេផ្តាច់ការងារ គឺផ្តាច់ទាំងអស់គ្នាហើយ ដោយសារពលរដ្ឋនៅបរទេសធ្វើឱ្យមានភាពចលាចលនៅលើទឹកដីបរទេសជាច្រើនលើកច្រើនសារ។ លោកយាយបានលើកឡើងថា តែងមានការបារម្ភជានិច្ចលើសុវត្ថិភាពរបស់កូនចៅរបស់ខ្លួន បន្ទាប់ពីឃើញហេតុការតែងកើតឡើងនៅតាមការផ្សព្វផ្សាយនានា។

ក្រុមគ្រួសាររបស់លោកយាយតែងទូន្មានកូនចៅរបស់ខ្លួនជានិច្ចអំពីការធ្វើបាតុកម្ម ដោយកន្លងមកលោកយាយតែងប្រាប់កូនចៅថាមិនឱ្យទៅចូលរួមបាតុកម្មនោះទេ។ ការចេះប្រើគំនិតពិចារណាឱ្យបានគ្រប់ជ្រុងជ្រោយ ខិតខំធ្វើការ សន្សំប្រាក់ ជារឿងចាំបាច់ ពីព្រោះកូនចៅដែលទៅធ្វើការនៅសាធារណរដ្ឋកូរ៉េជាប្រភពចំណូល និងជាអ្នកផ្គត់ផ្គង់គ្រួសារជាចាំបាច់។

ទន្ទឹមនឹងនេះ លោកយាយ លោកតា ដែលជាអាណាព្យាបាលពលករនៅកូរ៉េផ្តាំហើយផ្តាំទៀតទៅដល់កូនចៅគ្រប់ៗគ្នាដែលកំពុងធ្វើការនៅប្រទេសកូរ៉េសូមរក្សាភាពស្ងប់ស្ងាត់បន្តធ្វើការជាធម្មតា កុំជ្រួលជ្រើមតាមការញុះញង់របស់ក្រុមអ្នកនយោបាយប្រឆាំង ពីព្រោះពួកគេបាននិងកំពុងបោកប្រាស់កូនចៅហើយ។ បន្ទាប់ពីមានបាតុកម្មរួច ពួកទាំងនោះគេបានវិលត្រលប់ទៅប្រទេសដែលពួកគេរស់នៅ មិនមែនប្រទេសកូរ៉េនោះទេ ដូច្នេះប្រសិនបើប៉ះពាល់ដល់កន្លែងធ្វើការ នោះអ្នកដែលរងផលប៉ះពាល់គឺពលករ មិនមែនអ្នកគៀរគធ្វើបាតុកម្មនោះទេ។

គួរបញ្ជាក់ផងដែរថា ការលើកឡើងពីក្តីព្រួយបារម្ភរបស់អាណាព្យាបាលរបស់ក្រុមគ្រួសារពលករខ្មែរបែបនេះ បន្ទាប់ពីមានការកៀរគរពលករខ្មែរនៅសាធារណរដ្ឋកូរ៉េសារជាថ្មីពីសំណាក់ក្រុមអតីតអ្នកនយោបាយប្រឆាំង ដើម្បីចូលរួមបាតុកម្មប្រឆាំងដំណោះស្រាយរបស់រដ្ឋាភិបាលលើករណីកោះគុតជាមួយភាគីថៃ។

នេះពុំមែនលើកទីមួយទេ ដែលអតីតក្រុមអ្នកនយោបាយប្រឆាំងទាំងនេះបានកៀរគរពលរដ្ឋខ្មែរធ្វើបាតុកម្ម ក៏ប៉ុន្តែពុំមានពលករខ្មែរច្រើននោះទេចូលរួមសកម្មភាពរបស់ពួកគេនោះ ពីព្រោះពលករបានយល់ឃើញថា ការធ្វើបាតុកម្មរបស់ក្រុមប្រឆាំង គឺគ្មានខ្លឹមសារដែលអាចដោះស្រាយបញ្ហាបានឡើយ៕