កងពលធំអន្តរាគមន៍លេខ២ ដំណើរការបាញ់គ្រាប់ពិតនៅភ្នំខ្យង ខេត្តសៀមរាប

នៅថ្ងៃទី២៧ ខែកុម្ភៈ ឆ្នាំ២០២៥ កងពលធំអន្តរាគមន៍លេខ២ ធ្វើពិធីបាញ់គ្រាប់ពិតមេរៀនទី១ អាវុធAK47 ត្រួតពិនិត្យលទ្ធផលសិក្ខាកាមពលទាហានហ្វឹកហ្វឺន ឆ្នាំ២០២៤ ក្នុងភូមិសាស្ត្រភ្នំខ្យងVA (៣១-២៨ )ភូមិរុងរឿង ឃុំកន្ទួត ស្រុកស្វាយលើ ខេត្តសៀមរាប ក្រោមអធិបតីភាព លោក កែវ ធី មេបញ្ជាការរងកងទ័ពជើងគោក មេបញ្ជាការ កងពលធំអន្តរាគមន៍លេខ២ ដោយមានការអញ្ជើញចូលរួមពីមេបញ្ជាការរង នាយនាយទាហានចូលរួមផងដែរ។

បើតាមរបាយការណ៍បានឲ្យដឹងថា ការអនុវត្តបាញ់គ្រាប់ពិតនេះមានរយៈពេល១ព្រឹក ដែលមានសិក្ខាកាម សរុបចំនួន ៩៧នាក់ ទទួលបានលទ្ធផលដូចជា និទ្ទេសពូកែ ចំនួន ១៥នាក់ ស្មើនឹង ១៦%, និទ្ទេសគ្រាន់បើ ចំនួន ៤៧នាក់ ស្មើនឹង ៤៨%, និទ្ទេសមធ្យម ចំនួន ៣៥នាក់ ស្មើនឹង ៣៦%។

ក្នុងឱកាសនេះដែរ លោក មេបញ្ជាការបានមាន ប្រសាសន៍ថា ចាប់ពីពេលហ្វឹកហ្វឺនរហូតមកដល់ថ្ងៃនេះបានអនុវត្តការបាញ់គ្រាប់ពិតកាំភ្លើងAK47 សម្រេចបានលទ្ធផលជោគជ័យល្អប្រសើរ ទាំងបច្ចេកទេសអាវុធ និងកាយវិការបាញ់។ លោកក៏បានរម្លឹកដាស់តឿនដល់សិក្ខាកាមទាំងអស់ត្រូវតែហ្វឹកហាត់រៀនសូត្រជាប់ជានិច្ច “ស៊ូបង្ហូរញើសនៅលើទីលាន  ប្រសើរជាងបង្ហូរឈាមលើសមរភូមិ”។ ជាមួយគ្នានោះលោកមេបញ្ជាការក៏ បានលើកទឹកចិត្តជូនរង្វាន់ដល់ពលទាហានដែលមានស្នាដៃ និទ្ទេសពូកែផងដែរ។ ជាចុងបញ្ចប់  លោកមេបញ្ជាការបានថ្លែងអំណរគុណ កោតសរសើរចំពោះយោធិនដែលបំពេញការងារទទួលបានលទ្ធផលល្អ និងជោគជ័យគ្រប់ភារកិច្ចដែលថ្នាក់លើបានប្រគល់ជូន៕

ដោយ៖ជុន កុសល