ព័ត៌មានជាតិ
ខេត្តបន្ទាយមានជ័យ និងក្រសួងសន្តិសុខសាធារណៈចិន សន្យាសហការគ្នាបំបែកទីតាំងឧក្រិដ្ឋកម្ម និងអំពើឆបោកឱ្យអស់
បន្ទាយមានជ័យ ៖ រដ្ឋបាលខេត្តបន្ទាយមានជ័យដឹកនាំដោយលោក អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ និង សហការីកងកម្លាំងពាក់ព័ន្ធ កាលពីថ្ងៃទី២ ខែមីនា ឆ្នាំ២០២៥ បានទទួលបដិសណ្ឋារកិច្ចសំដែងការគួរសមពិភាក្សាការងារជាមួយប្រតិភូចិនដឹកនាំដោយលោកLIU ZHONGYI ឧបការីរដ្ឋមន្ត្រីក្រសួងសន្តិសុខសាធាណៈចិនក្នុងគោលបំណងយើងរួមគ្នា ប្រយុទ្ធប្រឆាំង ឧក្រិដ្ឋកម្មឆ្លងដែន និងអំពើឆបោកតាមប្រព័ន្ធអនឡាញ។

លោក អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យបានមានប្រសាសន៍ថា សភាពការណ៍សន្តិសុខ សណ្ដាប់ធ្នាប់សាធារណៈ និងរបៀបរៀបរយសង្គមទាំងផ្ទៃក្នុងខេត្ត និងតាមតំបន់ព្រំដែនជាទូទៅមានលក្ខណៈល្អប្រសើរ សន្តិសុខតាមខ្សែបន្ទាត់ព្រំដែនខេត្តរក្សាបាននូវបូរណភាព និងអធិបតេយ្យភាពជាតិ ព្រមទាំងប្រែក្លាយតំបន់ព្រំដែនជាព្រំដែនសន្តិភាព សេដ្ឋកិច្ច ពាណិជ្ជកម្ម ឧស្សាហកម្ម និងទេសចរណ៍។

កន្លងមកក៏ដូចបច្ចុប្បន្ន រដ្ឋបាលខេត្ត មានកិច្ចសហការគ្នាយ៉ាងល្អជាមួយ រដ្ឋបាលខេត្តស្រះកែវ នៃប្រទេសថៃ តាមរយៈការជួបប្រជុំប្រចាំឆ្នាំ ប្រចាំខែ ឬការងារបន្ទាន់ភ្លាមៗរវាងរដ្ឋបាល និងកងកម្លាំងឈរជើងការពារនៅតាមព្រំដែន ដើម្បីពង្រឹងកិច្ចសហការល្អជាមួយគ្នា ក្នុងការទប់ស្កាត់រាល់បទល្មើសឆ្លងដែនផ្សេងៗបានយ៉ាងល្អប្រសើរ។

ទន្ទឹមនឹងកត្តាសន្តិសុខខាងលើនេះ បច្ចុប្បន្ន មានជនបរទេសមិនមែនអន្តោប្រវេសន្ត កំពុងស្នាក់នៅ និងប្រកបមុខរបរធុរកិច្ចផ្សេងៗដូចជា បើកក្រុមហ៊ុន រោងចក្រ សណ្ឋាគារ កាស៊ីណូ លក់ទំនិញ។ មានមនុស្សចំនួនប្រមាណជា ១៦,១៥២នាក់ ស្រី ៤,០៨៦នាក់ ស្នាក់នៅតាមរយៈចុះក្នុងប្រព័ន្ធ FPCS មាន ៧សញ្ជាតិ ក្រៅពីនេះមានភ្ញៀវទេសចរចិនស្នាក់នៅក្នុងខេត្តប្រមាណជា ១,២៤៧នាក់។

លោកលាវ ចុងយី ឧបការីរដ្ឋមន្ត្រីក្រសួងសន្តិសុខសាធារណៈចិន បានមានប្រសាសន៍ថ្លែងនូវអំណរគុណចំពោះរដ្ឋបាលខេត្តបន្ទាយមានជ័យ ដែលបានអនុញ្ញាតឱ្យក្រុមប្រតិភូចិន ចូលរួមពិភាក្សាការងារមួយចំនួនដូចជា បញ្ហាសន្តិសុខ សេដ្ឋកិច្ច ជាពិសេសបញ្ហាឧក្រិដ្ឋកម្មឆ្លងដែនអន្តោប្រវេសន្តដោយខុសច្បាប់ និងអំពើឆបោកតាមប្រព័ន្ធអនឡាញ ក្នុងនោះរួមមានជនជាតិចិនមួយចំនួនផងដែរ។

លោក លាវ ចុងយី បានបន្តថា ការជួបសម្ដែងការគួរសមនិងពិភាក្សាគ្នានាថ្ងៃនេះ គឺក្នុងគោលបំណង ពង្រឹងទំនាក់ទំនងសហប្រតិបត្តិការកម្ពុជា-ចិន ឱ្យកាន់តែល្អប្រសើរ សំខាន់ត្រូវធ្វើការសហការគ្នាក្នុងការប្រយុទ្ធប្រឆាំងការឆបោកតាមអនឡាញ ឧក្រិដ្ឋកម្មឆ្លងដែនខុសច្បាប់ យើងរួមគ្នាត្រូវធ្វើការក្ដាប់ឱ្យបានមុខសញ្ញាទីតាំងឆបោក និងការចាប់ជុំរិត។
ជាការឆ្លើយតបលោកអ៊ុំ រាត្រី ក៏បានទទួលនិងសំណូមពរពីគណៈប្រតិភូចិន ចំពោះការសហការប្រយុទ្ធប្រឆាំងបទល្មើសផ្សេងៗ នៅក្នុងតំបន់គោលដៅ ពិសេសមុខសញ្ញាតំបន់ក្រុងប៉ោយប៉ែតធ្វើយ៉ាងណា យើងពិនិត្យគ្រប់គ្រងឱ្យបានម៉ត់ចត់បំផុត ជាក់ស្ដែងកន្លងទៅថ្មីៗនេះ សមត្ថកិច្ចយើងបានធ្វើការឃាត់ខ្លួនជនឆបោកចំនួន ២៣០នាក់ នៅក្នុងក្រុងប៉ោយប៉ែត។

ក្រោយពីទទួលជួបពិភាក្សាការងារសន្តិសុខរួចមក លោកLIU ZHONGYI ឧបការីក្រសួងសន្តិសុខសាធារណៈជន និងប្រតិភូបានបន្ត អមដំណើរដោយលោកលៀម សូដា អភិបាលរងខេត្ត និង មន្ត្រីពាក់ព័ន្ធ បន្តទៅទស្សនកិច្ចនៅច្រកទ្វារអន្តរជាតិប៉ោយប៉ែត៕
ដោយ ៖ អពៅ


-
ព័ត៌មានអន្ដរជាតិ៩ ម៉ោង ago
កម្មករសំណង់ ៤៣នាក់ ជាប់ក្រោមគំនរបាក់បែកនៃអគារ ដែលរលំក្នុងគ្រោះរញ្ជួយដីនៅ បាងកក
-
សន្តិសុខសង្គម២ ថ្ងៃ ago
ករណីបាត់មាសជាង៣តម្លឹងនៅឃុំចំបក់ ស្រុកបាទី ហាក់គ្មានតម្រុយ ខណៈបទល្មើសចោរកម្មនៅតែកើតមានជាបន្តបន្ទាប់
-
ព័ត៌មានអន្ដរជាតិ៤ ថ្ងៃ ago
រដ្ឋបាល ត្រាំ ច្រឡំដៃ Add អ្នកកាសែតចូល Group Chat ធ្វើឲ្យបែកធ្លាយផែនការសង្គ្រាម នៅយេម៉ែន
-
ព័ត៌មានជាតិ៤ ថ្ងៃ ago
សត្វមាន់ចំនួន ១០៧ ក្បាល ដុតកម្ទេចចោល ក្រោយផ្ទុះផ្ដាសាយបក្សី បណ្តាលកុមារម្នាក់ស្លាប់
-
ព័ត៌មានជាតិ១៩ ម៉ោង ago
បងប្រុសរបស់សម្ដេចតេជោ គឺអ្នកឧកញ៉ាឧត្តមមេត្រីវិសិដ្ឋ ហ៊ុន សាន បានទទួលមរណភាព
-
កីឡា១ សប្តាហ៍ ago
កញ្ញា សាមឿន ញ៉ែង ជួយឲ្យក្រុមបាល់ទះវិទ្យាល័យកោះញែក យកឈ្នះ ក្រុមវិទ្យាល័យ ហ៊ុនសែន មណ្ឌលគិរី
-
ព័ត៌មានអន្ដរជាតិ៥ ថ្ងៃ ago
ពូទីន ឲ្យពលរដ្ឋអ៊ុយក្រែនក្នុងទឹកដីខ្លួនកាន់កាប់ ចុះសញ្ជាតិរុស្ស៊ី ឬប្រឈមនឹងការនិរទេស
-
ព័ត៌មានអន្ដរជាតិ៣ ថ្ងៃ ago
តើជោគវាសនារបស់នាយករដ្ឋមន្ត្រីថៃ «ផែថងថាន» នឹងទៅជាយ៉ាងណាក្នុងការបោះឆ្នោតដកសេចក្តីទុកចិត្តនៅថ្ងៃនេះ?