ព័ត៌មានជាតិ

អាកាសចរណ៍មកពីអឺរ៉ុប នឹងបើកការហោះហើរត្រង់មកប្រទេសកម្ពុជានៅចុងឆ្នាំ២០២៥

បានផុស

៣៤ នាទីutes មុន

នៅ

ថ្ងៃអង្គារ ៤ មីនា ២០២៥

ដោយ

ក្រុមហ៊ុនអាកាសចរណ៍ Turkish Airlines នឹងបើកជើងហោះហើរពីទីក្រុង អ៊ីស្តង់ប៊ុល ប្រទេសតួគី មកកាន់ទីក្រុងភ្នំពេញ ចាប់ផ្តើមនៅខែធ្នូ ឆ្នាំ២០២៥ ខាងមុខនេះ។ នេះបើយោងតាមសេចក្តីប្រកាសព័ត៌មានរបស់ក្រសួងទេសចរណ៍នៅលើផេកផ្លូវការនៅប៉ុន្មាននាទីមុននេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហ៊ុនអាកាសចរណ៍ Turkish Airlines នឹងចាប់ផ្តើមតភ្ជាប់ជើងហោះហើរពីទីក្រុង អ៊ីស្តង់ប៊ុល ប្រទេសតួគី មកកាន់ទីក្រុងភ្នំពេញដោយប្រើយន្តហោះខ្នាតធំ Airbus A330 ឬ Boeing 777។

ជាមួយគ្នានេះ នៅក្នុងសេចក្តីប្រកាសព័ត៌មានរបស់ក្រសួងទេសចរណ៍ក៏ឲ្យដឹងទៀតថា ក្រុមហ៊ុនអាកាសចរណ៍ Emirates Airlines មកពីតំបន់មជ្ឈិមបូព៌ា ក៏នឹងបើកការហោះហើរពីទីក្រុង ឌូបៃ មកកាន់ខេត្តសៀមរាប ដែលនឹងចាប់ផ្តើមនៅខែមិថុនា ឆ្នាំ២០២៥ ដោយប្រើយន្តហោះខ្នាតធំ boeing 777 300er។

ពាក់ព័ន្ធការតភ្ជាប់ជើងហោះហើរដោយផ្ទាល់របស់ក្រុមហ៊ុនអាកាសចរណ៍ Turkish Airlines ពីតំបន់អឺរ៉ុបមកកម្ពុជា កម្ពុជាថ្មីបានទាក់ទងទៅមន្រ្តីអ្នកនាំពាក្យអាកាសចរណ៍ស៊ីវិល ដោយនៅមិនទទួលទាន់បានការឆ្លើយតបនៅឡើយទេ។

យ៉ាងណាមិញ លោក ស៊ីន ចាន់សិរីវុត្ថា មន្រ្តីអ្នកនាំពាក្យអាកាសចរណ៍ស៊ីវិលបានបញ្ជាក់ប្រាប់កម្ពុជាថ្មីកន្លងទៅថា ការតភ្ជាប់ជើងហោះហើរពីគោលដៅណាមួយ ក្រុមហ៊ុនត្រូវការសិក្សាពីតម្រូវការទីផ្សារជាមុនសិន។

លោកថា កម្ពុជាមិនទាន់មានជើងហោះហើរត្រង់មកពីប្រទេសនៅតំបន់អឺរ៉ុប ដោយសារមកពីកត្តាទីផ្សារ។

«តម្រូវការជារឿងសំខាន់ យន្តហោះមួយមិនអាចដឹកជញ្ជូនទទេ គ្មានអ្នកដំណើរជិះនោះទេ»។ លោក ស៊ីន ចាន់សិរីវុត្ថា អះអាង។

បើតាមលោក ស៊ីន ចាន់សិរីវុត្ថា កន្លងទៅមានក្រុមហ៊ុនអាកាសចរណ៍របស់បារាំង Air France ធ្លាប់សាកល្បងហោះហើរមកប្រទេសកម្ពុជា ប៉ុន្តែមិនទទួលបានជោគជ័យក៏បានបិទទៅវិញ។

ក្នុងសេចក្តីប្រកាសព័ត៌មានរបស់ក្រុមហ៊ុនអាកាសចរណ៍ Turkish Airlines កម្ពុជាជាគោលដៅប្រទេសទី ៧ នៅតំបន់អាស៊ីអាគ្នេយ៍ ហើយភ្នំពេញជាទីក្រុងទី ១១ នៅក្នុងតំបន់ ដែលក្រុបហ៊ុនបានប្រតិត្តិការភ្ជាប់ការហោះហើរជាមួយបណ្តាញដឹកជញ្ជូនគ្របដណ្តប់ ២១ ប្រទេស និង ២០ ទីក្រុងនៅជុំវិញពិភពលោក៕