ព័ត៌មានជាតិ

ខេត្តសៀមរាប មានករណីវិជ្ជមានជំងឺកូវីដ-១៩ ចំនួន០៣នាក់ហើយ គិតត្រឹមថ្ងៃទី២២នេះ

បានផុស

៤ years មុន

នៅ

ថ្ងៃចន្ទ ២២ មីនា ២០២១

ដោយ

បន្ទាប់ពីក្រសួងសុខាភិបាលប្រកាសរកឃើញអ្នកឆ្លងជំងឺកូវីដ១៩ថ្មីចំនួន៧៣នាក់ ក្នុងនោះក៏មានម្នាក់រស់នៅខេត្តសៀមរាបផងដែរ ធ្វើឲ្យខេត្តសៀមរាបមានអ្នកឆ្លងជំងឺកូវីដ១៩ មានចំនួន៣នាក់ គិតត្រឹមថ្ងៃទី២២ ខែមីនា ឆ្នាំ២០២១នេះ ខណៈខេត្តកែប ទើបតែមានករណីជំងឺកូវីដ-១៩ នៃសហគមន៍ «ព្រឹត្តិការណ៍២០កុម្ភៈ» ជាលើកដំបូង ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយឡែកនៅក្នុងចំណោមអ្នកដែលត្រូវបានក្រសួងសុខាភិបាលប្រកាសរកឃើញចំនួន៧៣នាក់នោះ ក្នុងនោះមានម្នាក់ជាបុរស អាយុ៣៨ឆ្នាំ ដែលរស់នៅក្នុងក្រុងសៀមរាប ខេត្តសៀមរាប មានវិជ្ជមានជំងឺកូវីដ-១៩ ដូច្នេះគិតមកទល់ព្រឹកថ្ងៃទី២២ ខែមីនានេះ ខេត្តសៀមរាប មានករណីវិជ្ជមានជំងឺកូវីដ-១៩ ក្នុង«ព្រឹត្តិការណ៍សហគមន៍ ២០កុម្ភៈ» ចំនួន០៣នាក់ ក្នុងនោះករណីលើកទី០១ ជាស្ត្រី ទីលំនៅបច្ចុប្បន្នក្នុងស្រុកពួក ដែលមានអ្នកពាក់ព័ន្ធត្រូវបានរកឃើញប្រមាណជាង២០នាក់ ប៉ុន្តែទទួលបានលទ្ធផលអវិជ្ជមានទាំងអស់ ចំនួន២លើករួចហើយ , ករណីលើកទី០២ ដែលមានអ្នកពាក់ព័ន្ធត្រូវបានរកឃើញប្រមាណ៤០០នាក់ ត្រូវបានក្រុមគ្រូពេទ្យចាត់ចែងយកសំណាក និងប្រឹក្សាសុខភាព ព្រមទាំងតម្រូវឱ្យធ្វើចត្តាឡីស័កនៅតាមមណ្ឌលចត្តាឡីស័ក នឹងតាមផ្ទះផងដែរ ក្នុងនោះមនុស្សប្រមាណជាង ១៤០នាក់ ទទួលបានលទ្ធផលបង្ហាញថា ពួកគាត់ គឺអវិជ្ជមានទាំងអស់ និង លើកទី០៣ ជាបុរស ទីលំនៅបច្ចុច្បន្នក្នុងក្រុងសៀមរាប ហើយអាជ្ញាធរកំពុងធ្វើការស្រាវជ្រាវ ។

សូមជម្រាបថា គិតត្រឹមម៉ោង៧ព្រឹកថ្ងៃទី២២ខែមីនា ឆ្នាំ២០២១នេះ កម្ពុជាបានរកឃើញអ្នកឆ្លងកូវីដ១៩ សរុបចំនួន ១.៧៥៣នាក់ ក្នុងនោះអ្នកជាសះស្បើយចំនួន ៩៦៧នាក់, អ្នកកំពុងសម្រាកព្យាបាលចំនួន ៧៨១នាក់ និង អ្នកស្លាប់ដោយសារកូវីដ១៩ ចំនួន០៣នាក់ ៕

អត្ថបទ ៖ គឿនវេត

Related Topics:រដ្ឋបាលខេត្តសៀមរាប