គ្រួសារជនរងគ្រោះ រួមទាំង​អតីតមេឃុំ​ស្នើសុំពិនិត្យ​​ឡើងវិញ ករណី​ឃាត់ខ្លួនបុរស ៣ នាក់ភ្ជួរដី​ដាំ​​ដំឡូង និង​ស្វាយ​ចន្ទី

ក្រុមគ្រួសារសាច់ញាតិរបស់បុរស ៣ នាក់ ដែលត្រូវបានជាប់ឃុំនៅពន្ធនាគារខេត្តក្រចេះកាលពី​ពេលថ្មីៗនេះដោយសារទៅស៊ីឈ្នួលភ្ជួររាស់ដីចម្ការអ្នកស្រុក ដើម្បីដាំដំឡូងមី បាន​អំពាវនាវស្នើសុំទៅដល់ថ្នាក់ដឹកនាំគ្រប់ជាន់ថ្នាក់នៅក្នុងខេត្តក្រចេះ ឱ្យមានការសន្ដោសប្រណីដោះលែងដល់ប្ដីពួកគាត់​ត្រឡប់​មកវិញ។ ប្រជាពលរដ្ឋទាំង ៣ គ្រួសារ រស់នៅភូមិត្រពាំងទ្រាំង ឃុំចង្ក្រង់ ស្រុកចិត្របុរី ខេត្តក្រចេះ។

អ្នកស្រី ព្រំ ឈឿន និងកូនប្រសារស្រី

អ្នកស្រី ព្រំ ឈឿន និងកូនប្រសារស្រីបានរៀបរាប់ថា ប្ដីរបស់ពួកគាត់ទាំងពីរ បានមកស៊ីឈ្នួលភ្ជួរដីឲ្យគេ ត្រូវបានកម្លាំងសមត្ថកិច្ចចាប់ឃាត់ខ្លួន និងរឹបអូសយកត្រាក់ទ័រទៅរក្សាទុក។ ចំណែកមនុស្សត្រូវបានបញ្ជូនទៅឃុំខ្លួនបាត់កាលពីថ្ងៃម្សិលមិញ។

គ្រួសារជនរងគ្រោះ​បានរៀបរាប់ថា ជាទូទៅ ប្ដីគាត់មុននឹងចេញទៅធ្វើការស៊ីឈ្នួលភ្ជួររាស់ដីគេ តែងតែ​សួររកលិខិតស្នាម និងការបញ្ជាក់អំពីកម្មសិទ្ធិដីត្រឹមត្រូវ ទើប​បានទៅស៊ីឈ្នួលភ្ជួរ ហើយចំពោះដីដែលទៅភ្ជួរ ត្រូវសមត្ថកិច្ចចាប់នោះ ឃើញម្ចាស់ដីក៏បានយកលិខិតមកឲ្យមើល ដោយមានការបញ្ជាក់ពីអាជ្ញាធរត្រឹមត្រូវ ទើប​សម្រេចចិត្តទៅស៊ីឈ្នួល​ភ្ជួរ​ឲ្យ​គេទៅ​។ តែមិនដឹងមូលហេតុអ្វី បានជាត្រូវបានគេចាប់ហើយឃុំខ្លួនដាក់ពន្ធនាគារបាត់ ដែលធ្វើឲ្យក្រុមគ្រួសារ និងកូនចៅទន្ទឹងរង់ចាំនៅផ្ទះមានការភ័យខ្លាចពិបាកចិត្តជាខ្លាំង។

ពលរដ្ឋ​លើកឡើងថា ត្រាក់ទ័រទាំងពីរ​គ្រឿង​នោះ គឺក្រុមគ្រួសារពួកគាត់បានខ្ចីលុយពីធនាគារ ដើម្បីទិញយកមកស៊ីឈ្នួលភ្ជួររាស់ដីចំការដីស្រែនៅតំបន់នោះ ទើបបង់លុយធនាគារបានមួយឆ្នាំតែប៉ុណ្ណោះ។ ឥឡូវប្ដីត្រូវបានឃុំខ្លួននៅក្នុងពន្ធនាគារ ដែលធ្វើឲ្យគ្រួសារកំពុងតែជួបនូវវិបត្តិ សេដ្ឋកិច្ចក្នុងគ្រួសារផង និង​ត្រូវរកលុយសងបំណុលធនាគារទៀត។

គ្រួសារទាំងពីរក៏បានអំពាវនាវទៅដល់អាជ្ញាធរ និងថ្នាក់ដឹកនាំជួយរកដំណោះស្រាយ និងបន្ធូរបន្ថយសន្ដោសប្រណីដល់ក្រុមគ្រួសារពួកគាត់ ដោយអនុញ្ញាតឲ្យប្ដីរបស់​ពួក​គាត់​ចេញមកនៅក្រៅឃុំវិញ។ បើមិនដូច្នោះទេ ក្រុមគ្រួសារទាំងពីរជួបបញ្ហាមិនមានចំណូលសម្រាប់ផ្គត់ផ្គង់គ្រួសារ ហើយនៅសងបំណុលធនាគារមិនបានទៀត។

អ្នកស្រី ចាន់ បុប្ផា ជាម្ចាស់ដី

ដោយឡែក អ្នកស្រី ចាន់ បុប្ផា ជាម្ចាស់ដីបានឲ្យដឹងថា គ្រួសាររបស់គាត់បានទិញដីនេះតាំងពីឆ្នាំ២០១៩ មកម្ល៉េះ នៅចំណុចភូមិល្អ ឃុំចង្រ្កង់ ស្រុកចិត្របុរី ខេត្តក្រចេះ ហើយបានអាស្រ័យផលដាំដំឡូងមី និងស្វាយចន្ទីរយះពេលប្រមាណជា ៥ ឆ្នាំ ហើយមានសំបុត្រទិញលក់ និងមានការទទួលស្គាល់ដោយអាជ្ញាធរភូមិឃុំ។ ក្រុមគ្រួសារគាត់បានយកលិខិតបញ្ជាក់​ទទួលស្គាល់កាន់កាប់ និងប្រើប្រាស់ដីនោះទៅដាក់នៅធនាគាខ្ចីលុយយកទៅដាំស្វាយ ចន្ទី និងដំឡូងមី តែក្រោយ​មកត្រូវភ្លើងឆេះស្វាយចន្ទីអស់ ក៏បានជួលត្រាក់ទ័រមកភ្ជួរដីនោះដាំដំឡូងមីទាំងអស់វិញ។

អ្នកស្រីបាន​អំពាវនាវទៅដល់អាជ្ញាធរ ក៏ដូចជាកម្លាំងសមត្ថកិច្ចពាក់ព័ន្ធ​ជួយសម្របសម្រួល និងដោះស្រាយឱ្យប្ដី​របស់អ្នកស្រី​​ឲ្យ​បាននៅក្រៅឃុំវិញ។ ចំពោះដីធ្លីប្រសិនបើអាជ្ញាធរ ឬសមត្ថកិច្ចស្រាវជ្រាវរកឃើញថា មានពាក់ព័ន្ធទៅនឹងដីរបស់រដ្ឋ ក៏អ្នកស្រី​ព្រមប្រគល់ជូនរដ្ឋវិញ ប្រសិនបើដីនៅតំបន់នោះមានការអនុវត្តច្បាប់ឬដករហូតពិតប្រាកដ។

ដោយឡែកអ្នកស្រី ពេញ ពៅ អតីតមេឃុំចង្ក្រង់ បានឲ្យដឹងដែរថា ដី​ដែលមាន​បញ្ហា​ពិតជាមានការទទួលស្គាល់ពី​អាជ្ញាធរ​​មូលដ្ឋានមែន មិនមានការពាក់ព័ន្ធនឹងដីក្រុមហ៊ុន ហើយគម្របព្រៃឈើក៏បានស្នើសុំកាត់ឆ្វៀលរួចហើយដែរ។ បើតាមការពិនិត្យឃើញថា ដីនោះ​បានធ្វើការបង្កបង្កើនផលរាល់ឆ្នាំដីស្រឡះស្រាប់ បានជាអ្នកស្រី​ទទួលស្គាល់។

អ្នកស្រីបានបន្តឲ្យដឹងថា ដីនោះដំបូងឡើយ គឺជនជាតិដើមភាគតិចកាន់កាប់ និងអាស្រ័យផលយូរណាស់មកហើយ។អាជ្ញាធរមូលដ្ឋានក៏បានចេញលិខិតទទួលស្គាល់ និងប្រើប្រាស់ដីឲ្យទៅម្ចាស់ដី ដែលទិញកាលពីអំឡុងឆ្នាំ២០១៩ ហើយពួកគេក៏បានអាស្រ័យផលយូរឆ្នាំមកហើយដែរ។

គួរ​បញ្ជាក់ថា បុរសជាម្ចាស់ដី និងម្ចាស់ត្រាក់ទ័រ ២ នាក់ផ្សេងទៀត ត្រូវបានកម្លាំងកងរាជអាវុធស្រុកចិត្របុរី ចុះបង្រ្កាប​និង​ឃាត់ខ្លួន កាលពីថ្ងៃទី២៧ ខែកុម្ភ: ឆ្នាំ២០២៥ ហើយបញ្ជូនទៅសាលាដំបូងខេត្តក្រចេះ នៅព្រឹកថ្ងៃពី០៣ ខែមិនា ឆ្នាំ​២០២៥។ រីឯត្រាក់ទ័រពីរ​គ្រឿង ក៏​ត្រូវបានយកទៅរក្សាទុកផ្នែករដ្ឋបាលព្រៃឈើក្រចេះ៕

អត្ថបទ៖ ប្រុញ វិធិន