ព័ត៌មានជាតិ

អាជ្ញាធរកោះកុង បង្កើនការផ្សព្វផ្សាយពីអត្ថប្រយោជន៍នៃQR Codeទប់ស្កាតកូវីដ១៩

បានផុស

៤ years មុន

នៅ

ថ្ងៃចន្ទ ២២ មីនា ២០២១

ដោយ

អាជ្ញាធរ និងក្រុមការងារព័ត៌មានវិទ្យារបស់រដ្ឋបាលខេត្តកោះកុង បាននឹងកំពុងបង្កើតការផ្សព្វផ្សាយ និងបិទQRCode ជូនដល់អង្គភាព មន្ទីរ វត្តអារាម រដ្ឋបាលក្រុងស្រុក និងហាងលក់ដូរអាជីវកម្មនានា ដើម្បីទប់ស្កាត់ការរីករាលដាលជំងឺកូវីដ១៩ជាមួយរាជរដ្ឋាភិបាលកម្ពុជា។

ជាង១សប្តាហ៍ទៅហើយ ដែលក្រុមកាងារព័ត៌មានវិទ្យាខេត្តកោះកុង បានផ្តោតលើការយកចិត្តទុកដាក់ខ្ពស់ លើការងារចំពោះមុខតាមរយៈបិទផ្សព្វផ្សាយអំពីគោលដៅបន្តអនុវត្តនូវវិធានការបង្ការ និងទប់ស្កាត់ហានិភ័យនៃជំងឺកូវីដ-១៩ ដែលដាក់ឱ្យប្រើប្រាស់ប្រព័ន្ធ QR Code “ទប់ស្កាត់កូវីដ Stop Covid”។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អ៊ុក សុតា នាយករងរដ្ឋបាលខេត្តកោះកុង បានឱ្យដឹងនៅរសៀលថ្ងៃទី២២ ខែមីនា ឆ្នាំ២០២១នេះថា គោលដៅចម្បងរបស់ក្រុមការងារលោក ចង់បង្កើនការយល់ដឹងអំពីការប្រើប្រាស់ប្រព័ន្ធនេះជាសាធារណ ដោយពលរដ្ឋម្នាក់ៗអាចស្កេននៅពេលចូលទីតាំងដែលមានមនុស្សចេញ-ចូលច្រើន ហើយអាចទទួលបានដំណឹងឆាប់រហ័ស ប្រសិនបើទីតាំងនោះ មានករណីឆ្លងជំងឺ។

លោកនាយករងខេត្តកោះកុង បន្ថែមថា កន្លងទៅថ្មីៗ ក្រុមការងារព័ត៌មានវិទ្យាខេត្ត បានចែកចាយលិខិតQRCodeស្ទើរតែគ្រប់ទីតាំងអគាររដ្ឋបាល មន្ទីរ អង្គភាព វត្តអារាម ហាងលក់ដូរ ព្រមទាំងភោជយីដ្ឋានជាដើម ធ្វើយ៉ាងណាសាធារណៈជនចូលរួមអនុវត្តវិធានការទប់ស្កាត់កូវីដតាមបែបថ្មីទំនើបមួយនេះ។

ក្រៅពីការចុះអប់រំពីរបៀបប្រើប្រាស់ និងបិទលិខិតQRCode ក៏មានសហគ្រាស ធនាគារ និងបណ្តាក្រុមហ៊ុនអាជីវកម្មផ្សេងៗបានស្នើសុំមន្ទីរប្រៃសណីយ៍ និងទូរគមនាគមន៍ ដើម្បីទទួលបានការលិខិតQRCodeប្រកបដោយការទទួលខុសត្រូវរួមគ្នាជាមួយរាជរដ្ឋាភិបាល ក្រសួងសុខាភិបាល រដ្ឋបាលខេត្ត និងមន្ទីរអង្គភាពជំនាញ។

លោក អ៊ូច ទូច ប្រធានមន្ទីរសាសនា និងធម្មការខេត្តកោះកុង បង្ហាញការគាំទ្រចំពោះយន្តការចុះពិនិត្យ និងបិទផ្សាយលិខិតQRCodeទប់ស្កាត់កូវីដក្នុងសហគមន៍នេះ។ លោកយល់ថា ការធ្វើបែបនេះផ្តល់អត្ថប្រយោជន៍យ៉ាងច្រើន បន្ថែមពីលើវិធានការរបស់ក្រសួងសុខាភិបាលដែលមានស្រាប់ ដើម្បីចូលរួមអនុវត្តន៍ឱ្យកាន់តែមានប្រសិទ្ធភាពខ្ពស់ ។ ជាពិសេសតាមបណ្តាវត្តអារ៉ាម ដែលតែងមានពុទ្ធិសាសនិកចេញចូលគោរពបូជា និងយកចង្ហាន់ប្រគេនព្រះសង្ឃជារៀងរាល់ថ្ងៃ។

លោក អ៊ូច ទូច រំពឹងដែរថា នៅពេលមានប្រព័ន្ធតាមដានសុខភាពគ្រប់ទីតាំងហើយ ទាំងព្រះសង្ឃ និងពលររដ្ឋទូទៅ អាចដឹងព័ត៌មានអំពីកូវីដកាន់តែឆាប់រហ័ស ករណីមានការសង្ស័យណាមួយកើតឡើង រីឯក្រុមមន្ត្រីជំនាញក៏ងាយស្រួលគ្រប់គ្រងមានវិធានការទប់ស្កាត់ចំពោះការរីករាលដាលបានយ៉ាងល្អ។

អាជ្ញាធរកោះកុង បង្កើនការផ្សព្វផ្សាយពីអត្ថប្រយោជន៍នៃQR Codeតាមកូវីដអាជ្ញាធរ និងក្រុមការងារព័ត៌មានវិទ្យារបស់រដ្ឋបាលខេត្តកោះកុង បាននឹងកំពុងបង្កើតការផ្សព្វផ្សាយ និងបិទQRCode ជូនដល់អង្គភាព មន្ទីរ វត្តអារាម រដ្ឋបាលក្រុងស្រុក និងហាងលក់ដូរអាជីវកម្មនានា ដើម្បីទប់ស្កាត់ការរីករាលដាលជំងឺកូវីដ១៩ជាមួយរាជរដ្ឋាភិបាលកម្ពុជា។

បើតាមរបាយការណ៍ក្រុមការងារព័ត៌មានវិទ្យាខេត្ត ឱ្យដឹងថា ដំណើរការផ្សព្វផ្សាយលិខិតប្រព័ន្ធQRCodeរបស់ក្រុមការងារ ក្នុងក្របខណ្ឌខេត្តចុះផ្សព្វផ្សាយមានប្រមាណ៥៣ទីតាំងហើយ ស្មើនឹង៤២៤ផ្ទាំងនៃQRCodeដែលបានផលិត សម្រាប់ចែកចាយជូនមន្ទីរ អង្គភាព រដ្ឋបាលក្រុងស្រុកភោជនីយដ្ឋាន និងទីតាំងសាធារណជនទូទាំងខេត្តឥតគិតថ្លៃ។ មិនត្រឹមតែប៉ុណ្ណឹងទេ ក៏មានបណ្តាសហគ្រា គ្រឹះស្ថានរដ្ឋ ឯកជន ដ៏ទៃទៀតបានជ្រួលជ្រាបអំពីសារៈសំខាន់នៃប្រព័ន្ធQRCodeទប់ស្កាត់កូវីដ ចូលរួមបិទលិខិតអនុវត្តដោយខ្លួនឯងផងដែរ។

គួរជម្រាបដែរថា ក្រោយក្រុមការងារគ្រូបង្គោលខេត្ត បានរៀបចំវគ្គបណ្តុះបណ្តាលផ្សព្វផ្សាយអំពីដំណើរការតំឡើងប្រើប្រាស់ប្រព័ន្ធQRCodeនេះរួចហើយនោះ គឺខេត្តសង្កេតឃើញមានមន្ទីរជំនាញ រដ្ឋបាលក្រុងស្រុក ឃុំសង្កាត់បន្តបង្កើនអប់រំពីវិធីប្រើប្រាស់កាន់តែទូលំទូលាយដល់មូលដ្ឋានថែមទៀត លើទីតាំង២៨៥ ស្មើនឹងលិខិតQRCodeចំនួន១,៤២៤ផ្ទាំង៕

អត្ថបទ ៖ សិរីវឌ្ឍនៈ