រកឃើញ០៣នាក់បន្ថែមទៀត ខណ្ឌឫស្សីកែវឆ្លងកូវីដ១៩

អាជ្ញាធរខណ្ឌឫស្សីកែវបានឲ្យដឹងថា គិតចាប់តាំងពីយប់ថ្ងៃទី២១រហូតដល់ព្រឹកថ្ងៃទី២២ខែ មីនាឆ្នាំ២០២១នេះ មានមនុស្ស៣នាក់បន្ថែមទៀតនៅក្នុងខណ្ឌនេះត្រូវបានរកឃើញថា បានឆ្លងជំងឺកូវីដ១៩។

បើតាមលោក ជា ពិសី អភិបាលខណ្ឌឫស្សីកែវ អ្នកជំងឺទាំង៣នាក់នោះរួមមាន៖

១/ ស្រ្តី អាយុ ៦៩ ឆ្នាំ ស្នាក់នៅក្រុមទី២  ភូមិសាមគ្គី សង្កាត់ប្ញស្សីកែវ ខណ្ឌប្ញស្សីកែវ រាជធានីភ្នំពេញ (ឆ្លងពី អ្នកជំងឺ ជាស្រ្តី អាយុ ៣១ ឆ្នាំ) ក្នុងនោះមានអ្នកពាក់ព័ន្ធចំនួន ០៣ នាក់  ត្រូវបានអោយធ្វើចត្តាឡីស័កក្នុងទីតាំងខាងលើដដែល។

២/ ស្ត្រី អាយុ ១៧ ឆ្នាំ (ពាក់ព័ន្ធនឹងអ្នកជំងឺជាបុរស អាយុ២១ឆ្នាំ) ស្នាក់នៅផ្លូវបេតុង  ភូមិស្ពានខ្ពស់ សង្កាត់គីឡូម៉ែតលេខ៦ ខណ្ឌប្ញស្សីកែវ រាជធានីភ្នំពេញ ក្នុងនោះមានអ្នកពាក់ព័ន្ធចំនួន ០១នាក់ត្រូវបានអោយធ្វើចត្តាឡីស័កនៅក្នុងទីតាំងនេះ។

អាជ្ញាធរបានបិទទីតាំងខាងលើនេះជាបណ្ដោះអាសន្ន ហើយអ្នកជំងឺ០២នាក់នេះត្រូវបានបញ្ជូនទៅព្យាបាល នៅមណ្ឌលសុខភាពចាក់អង្រែ។

នៅព្រឹកថ្ងៃទី២២ ខែមីនា ឆ្នាំ២០២១នេះដែរ  ក្នុងមូលដ្ឋានខណ្ឌឫស្សីកែវបានរកឃើញអ្នកមានវិជ្ជមានមេរោគកូវីដ១៩ម្នាក់បន្ថែមទៀតគឺជា បុរស អាយុ ៣២ឆ្នាំម្នាក់ ស្នាក់នៅផ្ទះជួល នៅភូមិបាក់ទូក សង្កាត់ទួលសង្កែទី១ ខណ្ឌប្ញស្សីកែវ រាជធានីភ្នំពេញ ។ អ្នកពាក់ព័ន្ធជាមួយអ្នកជំងឺ  រូបនេះមានចំនួន ០១ នាក់ ហើយបច្ចុប្បន្នអ្នកជំងឺ ត្រូវបានបញ្ជូនទៅព្យាបាល នៅអតីតសណ្ឋាគារThe Great Duke។ អាជ្ញាធរ ក៏បានសម្រេចបិទទីតាំងខាងលើនេះជាបណ្ដោះអាសន្នផងដែរ៕