ព័ត៌មានជាតិ

ជាទស្សនវិស័យបន្ត ផ្លូវថ្មើរជើង(Walk Street) រដ្ឋបាលរាជធានី នឹងរិះរកកម្មវិធីកម្សាន្តថ្មីៗ និងរៀបចំស្តង់លក់ផលិតផលឱ្យកាន់តែស្អាត

បានផុស

៣ សប្តាហ៍ មុន

នៅ

ថ្ងៃអង្គារ ១១ មីនា ២០២៥

ដោយ

សម្រាប់ផ្លូវថ្មើរជើង (Walk Street) ជាទស្សនវិស័យបន្ត រដ្ឋបាលរាជធានីភ្នំពេញ នឹងខិតខំព្យាយាមរិះរកនូវកម្មវិធីកម្សាន្តថ្មីៗ និងការរៀបចំស្តង់លក់ផលិតផលឱ្យបានកាន់តែស្អាត មានរបៀបរៀបរយល្អជាងសព្វថ្ងៃនេះថែមទៀត។

លោកស្រី ដោ សម្ផស្ស នាយិការងរដ្ឋបាល និងជាអ្នកនាំពាក្យរដ្ឋបាលរាជធានីភ្នំពេញ បានឱ្យដឹងនៅព្រឹកថ្ងៃទី ១១ មីនា នេះថា ក្នុងរយៈពេលជាង ១ ខែនេះ ផ្លូវថ្មើរជើង ទទួលបានការសាទរពីគ្រប់មជ្ឈដ្ឋាន ទាំងភ្ញៀវទេសចរជាតិ និងអន្តរជាតិ ចំនួនភ្ញៀវបានចូលមកលេងកើនឡើងពី ១ សប្តាហ៍ ទៅ ១ សប្ដាហ៍។ ពួកគាត់បានមកលេងប្រកបដោយទឹកមុខញញឹម រីករាយ ព្រមទាំងបានចូលរួមលេងកម្សាន្តថែមទៀតផង។ ជាមធ្យមក្នុងមួយថ្ងៃ មានភ្ញៀវមកលេងចន្លោះ ៣-៤ ម៉ឺននាក់ ហើយថ្ងៃខ្លះ អាចច្រើនជាងនេះដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី ដោ សម្ផស្ស បញ្ជាក់ថា រដ្ឋបាលរាជធានីភ្នំពេញ មិនទាន់មានគម្រោងជាក់លាក់ណាមួយនៅឡើយទេ ក្នុងការកំណត់បើកជាផ្លូវការ ប៉ុន្តែគ្រាន់តែបានដឹងថាគម្រោងនេះត្រូវទទួលបានការគាំទ្រយ៉ាងកុះករពីមហាជន។ នេះគឺជាគោលដៅទេសចរណ៍ក្នុងស្រុកថ្មីមួយទៀតដែលរដ្ឋបាលរាជធានីភ្នំពេញបានខិតខំរៀបចំឡើង។ កម្មវិធីកម្សាន្តចម្រុះត្រូវបានរៀបចំជូនជារៀងរាល់សប្ដាហ៍ ជាពិសេសការដាក់ជូននូវផ្ទាំងទស្សនីយភាពបុរាណ ដូចជា ៖ ឈុតឆាកសម្តែងល្ខោនបាសាក់ ចាប៉ីដងវែង តន្ត្រីបុរាណ ការសម្តែងសៀក ការដាក់តាំងលក់ផលិតផល កសិផលក្នុងស្រុក ក្នុងន័យលើកកម្ពស់ផលិតផលជាតិ។ល។

លោកស្រី បន្ថែមទៀតថា ជាទស្សនវិស័យបន្ត រដ្ឋបាលរាជធានីភ្នំពេញ នឹងខិតខំព្យាយាមរិះរកនូវកម្មវិធីកម្សាន្តថ្មីៗ និងការរៀបចំស្តង់លក់ផលិតផលឱ្យបានកាន់តែស្អាត មានរបៀបរៀបរយល្អជាងសព្វថ្ងៃ។ ជាមួយគ្នានេះ នាពេលថ្មីៗ នេះ រដ្ឋបាលរាជធានីភ្នំពេញ បានធ្វើការកែសម្រួលផ្លូវរត់ និងពេលវេលារបស់រថយន្តក្រុងសាធារណៈ ដើម្បីជួយសម្រួលដល់ការធ្វើដំណើរប្រជាពលរដ្ឋអាចមកលេងកម្សាន្តនៅតំបន់ផ្លូវថ្មើរជើងកាន់តែច្រើនថែមទៀត៕

អត្ថបទ ៖ ស្រីរ័ត្ន