រដ្ឋមន្រ្តី៖ យុវជនយកចិត្តទុកដាក់លើការប្រើប្រាស់បច្ចេកវិទ្យា តែមិនបានភ្ជាប់ជាមួយការសិក្សាពីអក្សរសិល្ប៍ជាតិទេ

បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានលើកឡើងថា យុវជនច្រើនយកចិត្តទុកដាក់តែលើការប្រើប្រាស់បច្ចេកវិទ្យា ប៉ុន្តែ មិនបានផ្សារភ្ជាប់ជាមួយការសិក្សាស្វែងយល់ពីអក្សរសាស្ត្រអក្សរសិល្ប៍ជាតិនោះទេ។

រដ្ឋមន្ត្រីក្រសួងអប់រំ លើកឡើងបែបនេះ នៅថ្ងៃទី១១ ខែមីនា ឆ្នាំ២០២៥ ក្នុងពិធីបិទ ទិវាជាតិអំណានលើកទី១០ ក្រោមប្រធានបទ “ការអានផ្សារភ្ជាប់អន្តរជំនាន់មនុស្សក្នុងសង្គម” នៅវិទ្យាស្ថានបច្ចេកវិទ្យាកម្ពុជា។ ក្នុងឱកាសនេះ បណ្ឌិតសភាចារ្យ ហង់ជួន ណារ៉ុន បានលើកឡើងពីបញ្ហាប្រឈមរបស់យុវជនខ្មែរក្នុងសម័យបច្ចុប្បន្ន ដែលជាសម័យជឿនលឿន និងជាសម័យ AI ថា ៖ “បញ្ហាប្រឈមនៃអំណានក្នុងយុគសម័យ AI ដែលយុវជនច្រើនយកចិត្តទុកដាក់តែលើការប្រើប្រាស់បច្ចេកវិទ្យា តែមិនបានផ្សារភ្ជាប់ជាមួយការសិក្សាស្វែងយល់ពីអក្សរសាស្ត្រអក្សរសិល្ប៍ជាតិនោះទេ”។

ជុំវិញករណីទាំងអស់នេះ លោកបណ្ឌិត បានលើកឡើងថា ក្រសួងត្រូវតែខិតខំប្រឹងប្រឹងបន្តការងារនេះបន្ថែមទៀត និងត្រូវពង្រឹងការដាក់បញ្ចូលកញ្ចប់អំណានដំបូងទៅក្នុងកម្មវិធីសិក្សាបណ្តុះបណ្ដាលគ្រូតែម្តង។ រដ្ឋមន្ត្រីក្រសួងអប់រំ បានផ្តល់អនុសាសន៍ដល់ភាគីពាក់ព័ន្ធទាំងអស់ ឱ្យចាប់ផ្តើមត្រួតពិនិត្យមើលបញ្ហាប្រឈមនៅតាមសាលារៀន ហើយប្រែក្លាយបញ្ហាប្រឈមទាំងនោះ ឱ្យទៅជាផែនការសកម្មភាពដែលត្រូវអនុវត្ត ក្នុងឆ្នាំ២០២៥នេះតែម្តង។

ចំពោះបញ្ហាខ្វះខាតបណ្ណាល័យ បណ្ឌិតសភាចារ្យ ក៏បានណែនាំឱ្យមានកិច្ចសហការជាមួយដៃគូអភិវឌ្ឍដើម្បីពិនិត្យមើលលទ្ធភាពក្នុងការរៀបចំបណ្ណាល័យអេឡិចត្រូនិក (ឌីជីថល) និងការប្រើប្រាស់ AI ដើម្បីបង្កើតសៀវភៅសិក្សា ដោយមានការចូលរួមគាំទ្រផ្នែកបច្ចេកទេសពីអ្នកជំនាញបច្ចេកវិទ្យា ដើម្បីជួយដោះស្រាយបញ្ហាប្រឈមក្នុងវិស័យអប់រំ។

បើនិយាយពីការធ្លាក់ចុះនៃអារ្យធម៌ខ្មែរវិញ រដ្ឋមន្ត្រីក្រសួងអប់រំ បានគូសបញ្ជាក់ថា មូលហេតុនៃការធ្លាក់ចុះអារ្យធម៌ខ្មែរ គឺមកពីកត្តាពីរយ៉ាង គឺការបាត់បង់ធនធានមនុស្ស និងសង្គ្រាមអូសបន្លាយយូរអង្វែង។ ហេុតនេះ លោកបណ្ឌិត បានសំណូមពរបុគ្គលគ្រប់រំ ត្រូវថែរក្សាឱ្យបាននូវសុខសន្តិភាព ដើម្បីឱ្យសេដ្ឋកិច្ចមានការអភិវឌ្ឍ និងរីកចម្រើនទៅមុខ ហើយការរស់នៅប្រកបដោយភាពសុខដុមរមនា៕