ដើមមេសានឹងមានពិធីសូធ្យព្រះត្រៃបិដកនៅភ្នំឧត្តុង្គរម្លឹកខួបនៃការបកប្រែគម្ពីរមកជាភាសាខ្មែរ

នាយករដ្ឋមន្ត្រីកម្ពុជា សម្ដេចធិបតី ហ៊ុន​ ម៉ាណែត បានកំណត់យកថ្ងៃទី១ ខែមេសា ឆ្នាំ២០២៥នេះ ដើម្បីរៀបចំពិធីខួបទី៥៦ឆ្នាំ នៃការបកប្រែគម្ពីព្រះត្រៃបិដកខ្មែរ និងរំលឹកគុណក្រុមជំនុំព្រះត្រៃបិដក អមដោយការសូធ្យគម្ពីរព្រះត្រៃបិដកខ្មែរ រយៈពេល៣ឬ៥ថ្ងៃ។

ក្នុងលិខិតផ្ញើទៅកាន់រដ្ឋមន្ត្រីក្រសួងធម្មការចុះថ្ងៃទី១១ ខែមីនា ឆ្នាំ២០២៥ ទីស្ដីការគណៈរដ្ឋមន្ត្រីបានបញ្ជាក់តាមចំណាររបស់សម្ដេចធិបតីដោយ​កំណត់យកភ្នំព្រះរាជទ្រព្យ (ព្រះសក្យមុនីចេតិយ) ជាជម្រើសនៃការរៀបចំពិធីខួបទី៥៦ឆ្នាំ នៃការបកប្រែគម្ពីព្រះត្រៃបិដកខ្មែរ និងឱ្យក្រសួងធម្មការពិភាក្សាជាមួយគណៈសង្ឃនាយកនិងធ្វើការសម្រេចរួម។

តាមចំណាររបស់សម្ដេចធិបតីក៏បញ្ជាឱ្យពិចារណា​ផ្លាស់ប្ដូរកន្លែងរៀបចំពិធីសូធ្យគម្ពីព្រះត្រៃបិដកខ្មែរដែលធ្វើរៀងរាល់៥ឆ្នាំម្ដងនៅប្រាសាទអង្គរវត្ត មកធ្វើនៅភ្នំព្រះរាជទ្រព្យដែលជាទីតាំងតម្កល់ព្រះបរមសារីរិកធាតុវិញ។

បើតាមលិខិតនោះសម្ដេចនាយករដ្ឋមន្ត្រីក៏បញ្ជាឱ្យក្រសួងធម្មការ និងសាសនា រៀបចំឡើងវិញនូវក្រុមជំនុំព្រះត្រៃបិដក ដើម្បីផ្ទៀងផ្ទាត់ឡើងវិញនូវគម្ពីរព្រះត្រៃបិដកខ្មែរ និងប្រែអដ្ឋកថាដីកា និងយោជនា ជាសេចក្ដីពន្យល់របស់ព្រះអរហន្តទៅលើគម្ពីរព្រះត្រៃបិដក ដែលជាព្រះពុទ្ធវចនៈនិងត្រូវយកចិត្តទុកដាក់ក្នុងការរៀបចំសមាសភាព ក៏ដូចជាវិសាលភាពនៃមុខការនិងតួនាទីភារកិច្ចឱ្យបានច្បាស់លាស់ដើម្បីធានានូវប្រសិទ្ធភាពនិងសុក្រឹតភាពនៃការងារសំខាន់នេះ៕

អត្ថបទដោយ ហ៊ុន សិរីវឌ្ឍន៍