បង្កើតអនុគណៈកម្មការចូលរួមគ្រប់គ្រងចាក់វ៉ាក់សាំងកូវីដ១៩

ក្រសួងការបរទេស និងសហប្រតិបត្តិការអន្តរជាតិកម្ពុជា នៅថ្ងៃទី ២២ ខែមីនា បានសម្រេចបង្កើតអនុគណៈកម្មការចំពោះកិច្ចទទួល បន្ទុកកិច្ចការចាក់វ៉ាក់សាំងបង្ការជំងឺកូវីដ-១៩។

សេចក្តីសម្រេច ដែលចុះហត្ថលេខាដោយលោកឧបនាយករដ្ឋមន្ត្រី ប្រាក់ សុខុនរដ្ឋមន្ត្រីក្រសួងការបរទេស បានបញ្ជាក់ថា អនុគណៈកម្មការនេះមានតួនាទី ចូលរួមសម្របសម្រួលគ្រប់គ្រងដឹកនាំចាត់ចែងការងារចាក់វ៉ាក់សាំង​កូវីដ-១៩ ជាមួយក្រសួងសុខាភិបាល និងទទួលខុសត្រូវលើសម្រង់ស្ថិតិអ្នកស្ម័គ្រចិត្តចាក់វ៉ាក់សាំង ក្នុងក្របខ័ណ្ឌក្រសួង។

ប្រភពដដែលបញ្ជាក់ថា អនុគណៈកម្មការនេះ ក៏មានតួនាទី ក្នុងការងារប្រតិបត្តិការចាក់វ៉ាក់សាំងជូនថ្នាក់ដឹកនាំ មន្ត្រីរាជការក្រសួង តាមការសម្រេចរបស់គណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខ័ណ្ឌទូទាំងប្រទេសហើយក៏តាមដាន និងរាយការណ៍ វឌ្ឍនភាពការងារចាក់វ៉ាក់សាំងជូនគណៈកម្មការចំពោះកិច្ចសហការសាំងឲ្យបានទៀងទាត់។

ក្រៅពីនេះ គឺតួនាទីការងារសម្របសម្រួលការងារចាក់វ៉ាក់សាំង ជូនមន្ត្រី និងបុគ្គលិករបស់ស្ថានតំណាងបរទេស អង្គការសហ ប្រជាជាតិ អង្គការអន្តរជាតិ និងអង្គការក្រៅរដ្ឋាភិបាលអន្តរជាតិ ប្រចាំនៅកម្ពុជា និងក្រុមគ្រួសារ ព្រមទាំង រៀបចំរបាយការណ៍ និងរាយការណ៍ជូនរដ្ឋមន្ត្រីក្រសួងការបរទេស ព្រមទាំងកិច្ចការផ្សេងៗទៀតដែលពាក់ព័ន្ធ នឹងការងារចាក់វ៉ាក់សាំងបង្ការជំងឺកូវីដ-១៩។ 

អនុគណៈកម្មការនេះមានលោក ប្រាក់ ងួនហុង អគ្គលេខាធិការក្រសួងការបរទេស ជាប្រធាន និងសមាជិជាច្រើនទៀតសរុប២១ នាក់៕

អត្ថបទ ៖ កោះកែវ