សម្ដេចតេជោ ស្នើអ្នកធុរកិច្ចពួតដៃជារដ្ឋ ដើម្បីសម្រេចឱ្យបានគោលដៅកម្ពុជាជាប្រទេសអ្នកមានឆ្នាំ២០៥០

ប្រមុខរដ្ឋស្ដីទី សម្ដេចតេជោ ហ៊ុន សែន បានស្នើដល់អ្នកធុរកិច្ចទាំងអស់រួមពួតដៃគ្នាជាមួយរាជរដ្ឋាភិបាលកម្ពុជា ដើម្បីសម្រេចឱ្យបានចក្ខុវិស័យប្រែក្លាយកម្ពុជា ទៅជាប្រទេសមានចំណូលមធ្យមកម្រិតខ្ពស់ ឆ្នាំ២០៣០ និងប្រទេសចំណូលខ្ពស់នៅឆ្នា២០៥០។

ការស្នើរបស់សម្ដេចតេជោ គឺក្រោយពេលដែលអង្គការសហប្រជាជាតិ បានអនុម័តជាឯកច្ឆ័នសម្រេចឱ្យកម្ពុជាចាប់ផ្តើមចាកចេញជាផ្លូវការពីចំណាត់ក្រុមប្រទេសអភិវឌ្ឍន៍តិចតួច (LDC Category) ក្នុងអំឡុងពេល ៥ឆ្នាំ ពោលគឺនៅចុងឆ្នាំ២០២៩ ខាងមុខ។

ការចាកចេញពីក្រុមប្រទេសអភិវឌ្ឍន៍តិចតួច នាពលអនាគត់នេះ នឹងផ្តល់ឱកាសឱ្យកម្ពុជានូវផែនទីបង្ហាញផ្លូវជាក់លាក់មួយដើម្បីប្រែក្លាយប្រទេសកម្ពុជាទៅជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងចំណូលខ្ពស់នៅឆ្នាំ២០៥០។

ឈរលើគោលដៅនេះ ថ្លែងពីពិធីពិសាអាហារសាមគ្គីនៃសន្និបាតប្រចាំឆ្នាំរបស់សមាគមឧកញ៉ាកម្ពុជា នាយប់ថ្ងៃទី១៤ ខែមីនា ឆ្នាំ២០២៥នេះ សម្ដេចតេជោ ហ៊ុន សែន ប្រមុខរដ្ឋស្ដីទី និងជាប្រធានកិត្តិយសសមាគមឧកញ៉ាកម្ពុជា បានអំពាវនាវក្នុងចំណោមក្រុមអ្នកជំនាញធំៗរបស់កម្ពុជា ដូច្នេះថា៖ «សូមឱ្យអ្នកធុរកិច្ចទាំងឡាយ ដែលមានគោរមងារជាលោកអ្នកឧកញ៉ា អ្នកឧកញ៉ា ឧកញ៉ា ឬមិនមែនឧកញ៉ា ដែលកំពុងធ្វើធុរកិច្ច គាំទ្រនូវគោលដៅ ដែលបានដាក់ចេញរួចមកហើយ គឺសម្រេចចាកចេញផុតពីប្រទេសអភិវឌ្ឍតិចតួច នៅឆ្នាំ២០២៩ ហើយត្រូវធ្វើឱ្យប្រទេសកម្ពុជា ទៅជាប្រទេសដែលមានប្រាក់ចំណូលមធ្យមកម្រិតខ្ពស់ នៅឆ្នាំ២០៣០ និងត្រូវធ្វើឱ្យប្រទេសកម្ពុជា សម្រេចគោលដៅនៅឆ្នាំ២០៥០ ក្លាយទៅជាប្រទេសមានប្រាក់ចំណូលប្រាក់តែម្ដង»។

សម្ដេចតេជោ ហ៊ុន សែន បានដាក់ក្ដីសង្ឃឹមថា ទាំងរាជរដ្ឋាភិបាល ណ្ដាគណបក្សនយោបាយនៅកម្ពុជា ទាំងប្រជាជនកម្ពុជា ដែលក្នុងនោះរាប់ទាំងវិស័យឯកជន នឹងចូលរួមចំណែកកុំឱ្យកម្ពុជាធ្លាក់ទៅក្នុងអន្ទាក់នៃប្រទេសប្រាក់ចំណូលមធ្យមឱ្យសោះ។

ក្នុងន័យនេះ សម្ដេចតេជោ គូសបញ្ជាក់ថា ប្រទេសមួយចំនួនលើពិភពលោក បានជាប់ក្នុងអន្ទាក់នៃប្រទេសដែលមានប្រាក់ចំណូលមធ្យម។ ដូច្នេះ កម្ពុជាត្រូវខិតខំ ដើម្បីជៀសវាងលើបញ្ហានេះ ដោយខិតខំបង្កើនសមត្ថភាពរបស់រដ្ឋ ខិតខំបង្កើនសមត្ថភាពរបស់វិស័យឯកជន ដើម្បីពន្លឿននូវការរីកលូតលាស់របស់ជាតិ កុំឱ្យធ្លាក់ក្នុងអន្ទាក់ប្រទេសមានប្រាក់ចំណូលមធ្យម តែត្រូវក្លាយជាប្រទេសដែលមានការអភិវឌ្ឍ មានប្រាក់ចំណូលខ្ពស់តែម្ដង។

ស​ម្ដេចតេជោ ក៏បានអះអាងពីការខ្វះកម្លាំងពលកម្មបម្រើក្នុងស្រុកផងដែរ ដោយសម្ដេចបានអំពាវនាវឱ្យពលរដ្ឋខ្មែរដែលចេញទៅធ្វើការនៅប្រទេសថៃ អាចវិលមកស្វែងរកការងារធ្វើនៅក្នុងប្រទេសកំណើតរបស់ខ្លួនវិញ៕

ដោយ៖ ធឿន វ៉ានសុង