ព័ត៌មានជាតិ

ទំនាក់ទំនងចិន-អឺរ៉ុបឈានដល់៥០ឆ្នាំនៅខែឧសភា ខណៈប្រធាធិបតីចិនមិនចូលរួមផ្ទាល់

បានផុស

៥០ វិនាទី មុន

នៅ

ថ្ងៃចន្ទ ១៧ មីនា ២០២៥

ដោយ

ខណៈពេលដែលសហភាពអឺរ៉ុបនិងមហាអំណាចចិនរៀបចំអបអរសាទរចំណងទំនាក់ទំនង៥០ឆ្នាំ (១៩៧៥-២០២៥) នៅក្នុងខែឧសភាខាងមុខ អវត្តមានមេដឹកនាំកំពូលចិន គឺប្រធានាធិបតី ស៊ី ជីនពីង (Xi Jinping) នៅក្នុងជំនួបមេដឹកនាំកំពូលអឺរ៉ុប បានទាក់ទាញការចាប់អារម្មណ៍ជាសកល។

ប្រធានាធិបតីចិនចាប់ដៃជាមួយប្រធានគណៈកម្មការអឺរ៉ុបក្នុងជំនួបកាលឆ្នាំ២០២៣។ ក្រសួងការបរទេសចិន

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការមិនទៅចូលរួមដោយផ្ទាល់ក្នុងខួបទំនាក់ទំនង៥០ឆ្នាំរបស់សហភាពអឺរ៉ុបនិងប្រទេសចិនរបស់ប្រធានាធិបតីចិនបានក្លាយជាទីចាប់អារម្មណ៍យ៉ាងខ្លាំងក្នុងពិភពលោក ដោយសារតែការប្រែប្រួលដ៏ខ្លាំងនៃទំនាក់ទំនងការទូត សង្គ្រាម និងសង្គ្រាមពាណជ្ជកម្មដែលរដ្ឋបាលលោកដូណាល់ ត្រាំ របស់សហរដ្ឋអាមេរិកកំពុងតែបង្កើតនូវផលលំបាកដល់គូប្រជែងរបស់ខ្លួន និងប៉ះពាល់ដល់ទីផ្សារសកលលោកតែម្តង។

តាមសេចក្តីរាយការណ៍របស់ Financial Times ប្រធានាធិបតីចិន បានបដិសេធចូលរួមកិច្ចប្រជុំកំពូលដ៏សំខាន់មួយនៅទីក្រុងប្រ៊ុចសែល ដែលប្រារព្ធខួបលើកទី៥០នៃទំនាក់ទំនងការទូត អឺរ៉ុប-ចិន ដែលបង្កឱ្យមានការព្រួយបារម្ភក្នុងចំណោមមន្ត្រីអឺរ៉ុបអំពីការប្តេជ្ញាចិត្តរបស់ទីក្រុងប៉េកាំងក្នុងការពង្រឹងទំនាក់ទំនងរបស់ពួកគេ។

យោងសេចក្តីរាយការណ៍ដែលស្រង់សម្តីប្រភពដែលដឹងពីបញ្ហានេះ នាយករដ្ឋមន្ត្រីចិន លោក លី ឈាង (Li Qiang) នឹងតំណាងឱ្យប្រទេសចិននៅក្នុងកិច្ចប្រជុំកំពូល ដោយជួបជាមួយប្រធានក្រុមប្រឹក្សាអឺរ៉ុប និងគណៈកម្មាការអឺរ៉ុបនៅទីក្រុងប្រ៊ុចសែល។

ជាប្រពៃណី កិច្ចប្រជុំកំពូល អឺរ៉ុប-ចិន ឆ្លាស់គ្នារវាងទីក្រុងព្រុចសែល និងទីក្រុងប៉េកាំង ដោយនាយករដ្ឋមន្ត្រីចិនបានចូលរួមកិច្ចប្រជុំនៅទីក្រុងប្រ៊ុចសែល ហើយប្រធានាធិបតីចិនធ្វើជាម្ចាស់ផ្ទះកិច្ចប្រជុំកំពូលនៅទីក្រុងប៉េកាំង។

ទោះបីជាយ៉ាងណាក៏ដោយ ដោយសារសារៈសំខាន់នៃកិច្ចប្រជុំកំពូលនៅឆ្នាំនេះ ដែលជាការរំលឹកដល់ពាក់កណ្តាលសតវត្សនៃទំនាក់ទំនងការទូត សហភាពអឺរ៉ុបបានសង្ឃឹមសម្រាប់ការចូលរួមរបស់ប្រធានាធិបតី ស៊ី។ មន្ត្រីទូតជាច្រើននៅតំបន់អឺរ៉ុបចាត់ទុកការអវត្តមានរបស់ប្រធានាធិបតីចិនថាជាសញ្ញាមួយនៃការដើរថយក្រោយនៃទំនាក់ទំនងការទូតនាពេលថ្មីៗ។

ការពិភាក្សារវាងភាគីទាំងពីរកំពុងបន្ត ប៉ុន្តែក្នុងដំណាក់កាលដំបូងនេះបានត្រឹមតែបង្កើនទស្សនៈនៅទីក្រុងប្រ៊ុចសែលថា ប្រទេសចិនប្រហែលជាមិនត្រូវបានរៀបចំដើម្បីចាត់វិធានការជាក់ស្តែងដើម្បីគាំទ្រការអំពាវនាវរបស់ខ្លួនសម្រាប់កិច្ចសហប្រតិបត្តិការពហុភាគី ជាពិសេសនៅពេលដែលទំនាក់ទំនងសហភាពអឺរ៉ុប និងចិននៅតែមានភាពរអាក់រអួល។

មានការកត់សម្គាល់ថា ទំនាក់ទំនងរវាងភាគីទាំងពីរបានរង្គោះរង្គើតាំងពីរុស្ស៊ីចូលឈ្លានពានអ៊ុយក្រែនក្នុងឆ្នាំ២០២២ ដោយសហភាពអឺរ៉ុបបានចោទចិនថាគាំទ្រសកម្មភាពរបស់វិមានក្រឹមឡាំង។ លើសពីនេះ ភាពតានតឹងពាណិជ្ជកម្មបានកើនឡើង ជាពិសេសទាក់ទងនឹងការនាំចេញយានជំនិះអគ្គិសនីរបស់ប្រទេសចិន ដែលសហភាពអឺរ៉ុបអះអាងថា ទទួលបានការឧបត្ថម្ភធនដោយអយុត្តិធម៌។

អតិរេកពាណិជ្ជកម្មរបស់ចិនជាមួយសហភាពអឺរ៉ុបមានចំនួន ៣០៤,៥ពាន់លានអឺរ៉ូកាលពីឆ្នាំ២០២៤ ដែលនាំឱ្យមន្ត្រីអឺរ៉ុបអំពាវនាវឱ្យមានសកម្មភាពបន្ថែមទៀតពីទីក្រុងប៉េកាំងលើការធ្វើឱ្យមានតុល្យភាពពាណិជ្ជកម្មឡើងវិញ។ ពួកគេបានជំរុញឱ្យប្រទេសចិនកាត់បន្ថយការឧបត្ថម្ភធនឧស្សាហកម្ម និងដកចេញនូវរបាំងសម្រាប់អាជីវកម្មបរទេសដែលកំពុងស្វែងរកការចូលទៅក្នុងទីផ្សារដ៏ធំរបស់ខ្លួន៕

ដោយ រ៉ាន់ រើយ