ទីតាំងចំនួន ២ ក្នុងខេត្តក្រចេះ ត្រៀមរៀបចំសង្រ្កាន្ត​ឆ្នាំថ្មី ២០២៥

អាជ្ញាធរ​ខេត្តក្រចេះ បាន​សម្រេច​ជ្រើសរើស​យក​ទីតាំងធំៗចំនួន ២ កន្លែង ​សម្រាប់រៀបចំអបអរសាទរ​សង្រ្កាន្តឆ្នាំ​ថ្មីឆ្នាំ ២០២៥។

ទីតាំងធំៗទាំងពីរកន្លែងទី ១ នៅ​វិមាន​រណសិរ្សសង្រ្គោះជាតិ ២ធ្នូ ក្នុងស្រុកស្នួល និងបរិវេណវិមានឯករាជ្យក្នុងទីរួមខេត្តក្រចេះ​តែម្តង។ នេះជាការបញ្ជាក់ពីលោក វ៉ា ថន អភិបាលខេត្តក្រចេះ​ និងជាប្រធានសហភាពសហព័ន្ធយុវជនកម្ពុជាខេត្តក្នុងកិច្ចប្រជុំត្រៀមរៀបចំសង្រ្កាន្តឆ្នាំ​ថ្មី ដើម្បីអបអរសាទទទួលទេវតាឆ្នាំថ្មីឆ្នាំម្សាញ់ ដែលនឹងឈានចូលមកដល់ក្នុងខែមេសា ខាងមុខនេះ។

លោក វ៉ា ថន បានណែនាំដល់គ្រប់អាជ្ញាធរក្រុងស្រុក ពិសេសក្រុមយុវជននៃសហភាពសហព័ន្ធយុវជនកម្ពុជាខេត្ត (ស.ស.យ.ក) ត្រូវពិនិត្យមើលបណ្តាលទីវត្តអារាមធំៗ ដែលនិយមរៀបចំសង្រ្កាន្តឆ្នាំថ្មី និងត្រូវសហការផ្សារភ្ជាប់ជាមួយព្រះសង្ឃ ក្នុងការសម្របសម្រួលរៀបចំ ដើម្បីឲ្យកម្មវិធីប្រព្រឹត្តទៅមានភាពអធឹកអធមសប្បាយរីករាយ និងសម្បូរបែប។

បន្ថែមពីនេះ លោកអភិបាលខេត្តក៏​ណែនាំ​ដល់​កង​កម្លាំងសមត្ថកិច្ច ត្រូវចូលរួមរក្សាការពារសន្តិសុខសណ្តាប់ធ្នាប់ នៅតាមទីតាំងពិធី និងតាមទីសាធារណៈ រួមនិងការហាមប្រាណមិនឲ្យមានការលេងជះទឹកនៅតាមដងផ្លូវ ជៀសវាងការបង្កគ្រោះថ្នាក់ និងខូចខាតទ្រព្យសម្បតិ្តជាយថាហេតុ៕

អត្ថបទ៖ ប្រុញ វិធិន