ព័ត៌មានជាតិ

មន្ត្រីបច្ចេកទេសក្រសួងធនធានទឹក ចុះពិនិត្យការដ្ឋានសាងសង់ទំនប់ស្ទាក់ទឹក សម្រាប់ផលិតទឹកស្អាតក្នុងភូមិសាស្ត្រស្រុកគិរីសាគរ

បានផុស

២ សប្តាហ៍ មុន

នៅ

ថ្ងៃចន្ទ ១៧ មីនា ២០២៥

ដោយ

លោក អ៊ុក វុទ្ធី អនុរដ្ឋលេខាធិការ តំណាង លោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម នៅថ្ងៃទី ១៦ ខែមីនា ឆ្នាំ ២០២៥ បានដឹកនាំក្រុមការងារបច្ចេកទេសក្រសួង និង មន្ទីរធនធានទឹក និងឧតុនិយមខេត្តកោះកុង អញ្ជើញចុះពិនិត្យការដ្ឋានសាងសង់ទំនប់ស្ទាក់ទឹក សម្រាប់ផលិតទឹកស្អាតរបស់ក្រុមហ៊ុនលោកអ្នកឧកញ៉ា លី យ៉ុងផាត់ ស្ថិតក្នុងភូមិព្រែកខ្សាច់ ឃុំព្រែកខ្សាច់ ស្រុកគីរីសាគរ ខេត្តកោះកុង ដោយមានការចូលរួមពី លោកអភិបាលរង នៃគណៈអភិបាលខេត្តកោះកុង និងតំណាងក្រុមហ៊ុនលោកអ្នកឧកញ៉ា លី យ៉ុងផាត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកអនុរដ្ឋលេខាធិការ បានបញ្ជាក់ឱ្យដឹងថា ក្រុមការងារក្រសួង បានលើកឡើងអំពីទិដ្ឋភាពច្បាប់ស្ដីពីការគ្រប់គ្រងធនធានទឹកនៅក្នុងព្រះរាជាណាចក្រកម្ពុជា ដែលតម្រូវឱ្យបុគ្គលដែលរៀបចំសំណង់ការងារទឹក និងការយកទឹកមកប្រើប្រាស់សម្រាប់អាជីវកម្ម ត្រូវសុំការអនុញ្ញាតពីក្រសួងធនធានទឹក និងឧតុនិយម។ ទន្ទឹមនឹងនេះ ក្រុមការងារក្រសួង ក៏បានស្នើឱ្យភាគីក្រុមហ៊ុនរៀបចំបែបបទស្នើសុំការអនុញ្ញាតតាមនីតិវិធីច្បាប់ជាធរមាន មកក្រសួងធនធានទឹក និងឧតុនិយម ដោយមានភ្ជាប់មកជាមួយនូវឯកសារបច្ចេកទេសទំនប់ពាក់ព័ន្ធផងដែរ។

គម្រោងសំណង់ស្ទាក់ទឹកសម្រាប់ផលិតទឹកស្អាតនេះមានសមត្ថភាពស្តុកទឹកបានប្រមាណ ៧,២ លានម៉ែត្រគូប និងមានផ្ទៃអាងរក្សាទឹកប្រមាណ ៤២,៣០ ហិតា។ ទំនប់មានកម្ពស់ ៣៥ ម៉ែត្រ ប្រវែង ២៧០ ម៉ែត្រ ជម្រៅទឹកអតិបរមា ៣៣,៣ ម៉ែត្រ។ ទំនប់ស្ទាក់ទឹកសម្រាប់ផលិតទឹកស្អាតនេះ នឹងបម្រើដល់តំបន់សេដ្ឋកិច្ចពិសេស តំបន់លំនៅឋាន និងភូមិឋានប្រជាពលរដ្ឋនៅផ្នែកខាងក្រោម៕

អត្ថបទ ៖ សិរីវឌ្ឍនៈ