បន្ទាប់ពីទទួលបណ្ដឹងពីពលរដ្ឋម្នាក់ ក្រសួងយុត្តិធម៌ ចាត់មន្ត្រីចុះស្រាវជ្រាវករណីដីធ្លីនៅតំបន់អន្ទង់អាំង

បន្ទាប់ពីទទួលបានបណ្ដឹងពីពលរដ្ឋម្នាក់ ក្រសួងយុត្តិធម៌ នឹងចាត់មន្ត្រីជំនាញចុះស្រាវជ្រាវផ្ទាល់ពាក់ព័ន្ធនឹងករណីដីធ្លីនៅតំបន់អន្ទង់អាំង ក្នុងខេត្តពោធិ៍សាត់។ កាលពីថ្ងៃសុក្រ សប្ដាហ៍មុន អ្នកស្រី សែម សុខគា ដែលអះអាងថា ខ្លួនជាពលរដ្ឋ​រង​គ្រោះដោយសារ​ការ​បណ្តេញ​ចេញ​ពី​ដីធ្លី​នៅ​តំបន់អន្ទង់អាំង បានដាក់​ញត្ដិ​ទៅ​កាន់ក្រសួង​យុត្តិធម៌ដើម្បី​ជួយ​អន្ដរាគមន៍​លើនេះ។

បើតាមអ្នកនាំពាក្យក្រសួងយុត្តិធម៌ គឺក្រសួងបានទទួលរួចហើយនូវពាក្យបណ្ដឹងពីពលរដ្ឋឈ្មោះ សែម សុខគា កាលពីរសៀលថ្ងៃទី១៤ ខែមីនា ឆ្នាំ២០២៥ ហើយបាននិងកំពុងធ្វើការពិនិត្យស្រាវជ្រាវលើករណីនេះ។

ដើម្បីភាពច្បាស់លាស់ និងត្រឹមត្រូវនៅក្នុងចំណាត់ការរឿងនេះ ក្រសួងយុត្តិធម៌ នឹងចាត់ក្រុមការងារចុះស្រាវជ្រាវដោយផ្ទាល់បន្ថែមនៅទីតាំងជាក់ស្តែង ក៏ដូចជាជួបផ្ទាល់ជាមួយម្ចាស់បណ្ដឹង ព្រមទាំងភាគីដែលមានការពាក់ព័ន្ធ ដើម្បីពិនិត្យ និងស្រាវជ្រាវករណីនេះឱ្យបានត្រឹមត្រូវទៅតាមនីតិវិធី ជាធរមាន។ នេះជាការបញ្ជាក់របស់អ្នកនាំពាក្យក្រសួងយុត្តិធម៌ តាមរយៈសេចក្ដីប្រកាសព័ត៌មាន នាថ្ងៃទី១៦ ខែមីនា ឆ្នាំ២០២៥។

កាលពីពេលថ្មីៗនេះ មានការចុះផ្សាយលើបណ្តាញសារព័ត៌មាន និងបណ្តាញសង្គម ពាក់ព័ន្ធករណីបុគ្គលឈ្មោះ សែម សុខគា ដែលអះអាងថា ខ្លួនជាពលរដ្ឋរស់នៅក្នុងតំបន់អន្ទង់អាំង (ភ្នំ១៥០០) ក្នុងស្រុកវាលវែង ខេត្តពោធិ៍សាត់ ហើយបានឡើងមកភ្នំពេញ ដើម្បីដាក់ពាក្យបណ្ដឹងស្នើសុំឱ្យក្រសួងយុត្តិធម៌ ធ្វើអន្តរាគមន៍លើសំណុំរឿងពាក់ព័ន្ធនឹងរឿងដីធ្លីនៅតំបន់ភ្នំ១៥០០។​

ជាការកត់សម្គាល់ ពេលថ្មីៗនេះ រដ្ឋបាលខេត្តពោធិ៍សាត់ បានប្រាប់ដល់ប្រជាពលរដ្ឋ ដែលពាក់ព័ន្ធនឹងតំបន់អន្ទង់អាំង រុះរើ និងចាកចេញពីតំបន់អន្ទង់អាំង ដោយសាររដ្ឋ នឹងត្រូវរៀបចំតំបន់នេះឱ្យទៅជាតំបន់បៃតង។ ក្នុងករណីមិនព្រមរុះរើ រដ្ឋបាលខេត្ត នឹងចាត់វិធានការទៅតាមផ្លូវច្បាប់។

ក្នុងវិធានការនេះ ក៏មាន​ពលរដ្ឋ​ខ្លះបានធ្វើការតវ៉ា និងមិនព្រមរើចេញពីតំបន់អន្ទង់អាំងនោះឡើយ។ តែយ៉ាងណា បើតាមការអះអាងរពីលោក កែវ រតនៈ រដ្ឋមន្ត្រីក្រសួងរ៉ែ និងថាមពល និងជាប្រធាន​ក្រុម​ការ​ងារ​រាជ​រដ្ឋាភិ​បាល​ចុះមូលដ្ឋានខេត្ត​ពោធិ៍សាត់​ គឺប្រជាពល​រដ្ឋ ២​ភាគ​៣ បាន​យល់​ព្រម​​ចេញ​ពី​តំបន់​អន្ទង់​អាំង ​ដើម្បី​ទុក​ដីតំបន់​នោះ​ឱ្យរដ្ឋ​អភិរក្ស​ជា​ឧទ្យាន​ជាតិ​បៃតង​។​ ខណៈនៅមាន​ពលរដ្ឋ​ជាង​២០​គ្រួសារ​ទៀត​ក្នុង​ចំណោម១០០​គ្រួសារ ​បន្ត​តវ៉ា​ដល់​ភ្នំពេញ​ ​គឺដោយសារតែ​ពលរដ្ឋ​ទាំង​នោះ ត្រូវ​បាន​មនុស្ស​ផ្សេង​ទៀត​ប្រើ​ប្រាស់​ឱ្យចេញ​តវ៉ា​ ដើម្បី​ការពារ​ដី​ពួកគេ​ដែល​បាន​កាន់​កាប់​ខុស​ច្បាប់​។​ នេះជាការអះអាងរបស់លោក កែវ រតនៈ ដដែល ក្នុងកិច្ចសម្ភាសជាមួយវិទ្យុបារាំង​អន្តរ​ជាតិ ​RFI។

ដោយឡែកករណីអ្នកស្រី សែម សុខគា ដែលយំស្រែកមុខក្រសួងយុត្តិធម៌ បានបញ្ជាក់ថា ដីរបស់អ្នកស្រី មិនស្ថិតនៅក្នុងតំបន់អន្ទង់អាំងឡើយ៕