ព័ត៌មានជាតិ

ក្រោយភ្លៀងលាយឡំខ្យល់កន្ត្រាក់បំផ្លាញផ្ទះពលរដ្ឋ សមត្ថកិច្ចចេញប្រតិបត្តិការជួយសង្គ្រោះភ្លាមៗ

បានផុស

៣៩ វិនាទី មុន

នៅ

ថ្ងៃចន្ទ ១៧ មីនា ២០២៥

ដោយ

សៀមរាប ៖ កម្លាំងសមត្ថកិច្ចនៃខេត្តសៀមរាប នៅថ្ងៃទី១៧ ខែមីនា ឆ្នាំ២០២៥ បាន ជួយរុះរើផ្ទះពលរដ្ឋដែលរងគ្រោះដោយខ្យល់កន្រ្តាក់ ក្នុងមូលដ្ឋានក្រុងស្រុក ចំនួន១០ រួមមាន ក្រុងសៀមរាប ក្រុងរុនតាឯកតេជោសែន, ស្រុកប្រាសាទបាគង, ស្រុកស្វាយលើ, ស្រុកអង្គរធំ, ស្រុកពួក, ស្រុកបន្ទាយស្រី, ស្រុកសូទ្រនិគម, ស្រុកជីក្រែង និងស្រុកអង្គរជុំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមត្ថកិច្ចបានឱ្យដឹងថា ភ្លៀងលាយខ្យល់កន្ត្រាក់ បានវាយប្រហារលើមូលដ្ឋានក្រុងស្រុកចំនួន១០ កាលពីរសៀលល្ងាចថ្ងៃទី១៦ ខែមីនា ឆ្នាំ២០២៥ បានបំផ្លាញផ្ទះសម្បែងប្រជាពលរដ្ឋចំនួន ១៧៨គ្រួសារ, ដួលរលំបាក់ដើមឈើ ចំនួន ៧១ដើម បានបណ្តាលឱ្យមានមនុស្សរងរបួស៧នាក់ (ស្រី៣នាក់) និងមានអ្នកស្លាប់ម្នាក់ដោយសាររន្ទះបាញ់ ព្រមទាំងផលប៉ះពាល់ផ្សេងទៀត ដូចជា រលំបង្គោលភ្លើងលំអផ្លូវ រលំបាក់មែកឈើលើដងផ្លូវផងដែរ។

សមត្ថកិច្ចបានបន្តថា បន្ទាប់ពីមានគ្រោះធម្មជាតិនេះ កងកម្លាំងនៃស្នងការដ្ឋាននគរបាលខេត្តសៀមរាប បានចេញប្រតិបត្តិការជួយសង្គ្រោះភ្លាមៗ ជាពិសេសការកាត់ដើមឈើដែលដួលរលំមកលើផ្លូវ ដើម្បីយកចេញឱ្យបានលឿន ដើម្បីអាចឱ្យបងប្អូនធ្វើចរាចរណ៍បានធម្មតាវិញ និងជួយរុះរើផ្ទះពលរដ្ឋដែលរងគ្រោះដោយខ្យល់កន្រ្តាក់ ជាបន្តបន្ទាប់រហូតដល់ថ្ងៃទី១៧ ខែមីនានេះ។

សូមជម្រាបថា ករណីបាតុភូតធម្មជាតិកាលពីម្សិលមិញនេះ គឺគេសង្កេតឃើញថា ពេលពលរដ្ឋមានទុក្ខលំបាក អាជ្ញាធរមូលដ្ឋាននិងកម្លាំងសមត្ថកិច្ចនៃខេត្តសៀមរាប បានចុះទៅដល់គោលដៅភ្លាមៗ ដើម្បីជួយប្រជាពលរដ្ឋឱ្យបានទាន់ពេលវេលា៕

ដោយ ៖ ជុន កុសល