សិស្សវិទ្យាល័យម្នាក់ ​ចេះបង្កើតមុខរបរ​ខ្លួន​ឯង មិន​រំពឹងលុយ​ពី​​ឪពុកម្តាយ យក​ផ្គត់ផ្គង់​ការ​​សិក្សា​

សិស្សវិទ្យាល័យ នេត យ៉ង់ យុវជន គឹម សុង ដែល​រស់នៅក្នុងសង្កាត់ រតន: ក្រុងបាត់ដំបង ខេត្តបាត់ដំបង បានឆ្លៀតរកចំណូល​ពីការចិញ្ចឹមត្រី ដើម្បីជួយទប់ទល់កម្រិតជីវភាព​ក្នុង​គ្រួសារ ដោយសារ​មិនចង់​រំពឹងលើឪពុកម្តាយទាំងស្រុងពេក ខណះ​ការ​ចំណាយ​ការ​សិក្សា​ក៏ច្រើន រួមទាំង​ក្នុង​គ្រួសារ​​ក៏​មានបងប្អូន​ច្រើន​​កំពុងនៅ​​សិក្សា​នៅឡើយ ដែល​បង្កើន​បន្ទុក​ចំណាយ​ដល់​ឪពុកម្តាយ​ថែម​ទៀត។

ការរកចំណូល​បន្ថែមពីការចិញ្ចឹម​ត្រីនេះ​ មិន​ប៉ះពាល់ក្នុងការសិក្សានោះទេ ដែលការងារ​នេះ​បាន​អនុវត្ត​បាន​ជាង ២ ឆ្នាំមក​ហើយ។ នេះបើតាម គឹមសុង។

គីមសុង បាន​រៀបរាប់​ថា ការចាប់ផ្តើមចិញ្ចឹមដំបូង​ដោយសារ​បានពីការសន្សំលុយ ដែលឪពុកម្តាយទុក​ឲ្យ​រៀនម្តងៗទើប ខ្លួនយល់ឃើញពីមុខរបរចិញ្ចឹមត្រី ដែល​អាចជាប្រភពចំណូលមួយសម្រាប់ទ្រទ្រង់​ការ​សិក្សារបស់​ខ្លួន​មិន​ឲ្យ​ប្រឈម ខណះគ្រួសារក៏មានការខ្វះខាតលើការ​ចំណាយ​ក្នុងជីវិភាពរស់នៅប្រចាំថ្ងៃ។

ពាក់ព័ន្ធ​ការ​ចិញ្ចឹម​វិញ គឹមសុង បាន​រៀបរាប់​បង្ហាញ​ថា «ព្រឹកឡើងខ្ញុំដាក់ចំណីម្តង មុនទៅសាលារៀន ហើយនៅពេលល្ងាច ពេល​ចេញពីរៀនគួរនៅម៉ោង ៧ កន្លះយប់ ដាក់ចំណីម្តងទៀត។ ក្រៅពីនេះវាសុីឫសកំប្លោក និងកាកសំណល់ផ្ទះបាយ»។

ខណៈការ​ប្រមូលផលនៅឆ្នាំទី ៣ ត្រូវ​ប្រមូលក្នុងខែ ៤ ខាងមុខ បើតាម គឹមសុង «ការប្រមូលទិន្នផលត្រីអណ្ដែងនៅក្នុងខែ ៤ ខាងមុខនេះ អាចមានចំនួនច្រើនជាងកន្លងទៅ ដោយលើកនេះ ជាឆ្នាំទី ៣ នៃការចិញ្ចឹម ខ្ញុំបានទិញកូនត្រីចំនួន ៦ ពាន់កូន បើធៀបឆ្នាំមុនៗ ខ្ញុំចិញ្ចឹមត្រឹមតែ ៣ ឬ ៤ ពាន់កូនប៉ុណ្ណោះ ដោយសារតែខ្វះលុយទិញកូនត្រី«។

តាមរយៈ​មុខ​របរ​ចិញ្ចឹមត្រី​បន្ថែមនេះ គីម សុង បាន​អះអាង​ថា បាន​ជួយដោះបន្ទុកជីវភាពគ្រួសារ​បានមួយ​ចំណែក​ធំ ដែល​ជួយបន្ធូរបន្ថយភាពតានតឹងផ្នែកសេដ្ឋកិច្ចគ្រួសារ មិនមានការប្រឈមដូចគ្រាមុន។

ការចិញ្ចឹមត្រីរបស់សិស្សវិទ្យាល័យ គីម​សុង ក៏ទទួលបានការកោតសរសើរពី​នលោកគ្រូអ្នកគ្រូ​បង្រៀននៅ​វិទ្យាល័យ នេត យ៉ង់ ដោយ​លើកឡើងប្រហាក់ប្រហែលគ្នាថា គឹមសុង ជាសិស្សស្លូតបូត ឧស្សាហ៍​ និងតស៊ូរៀនសូត្រ បន្ថែម​ពី​ការ​ចេះ​បង្កើត​មុខ​របរ​បន្ថែម​សម្រាប់រក​លុយផ្គត់ផ្គង់​ការ​សិក្សា។

ដោយ​លើក​ពី​គំរូ គីម សុង ​លោកគ្រូអ្នកគ្រូ​បង្រៀននៅ​វិទ្យាល័យ នេត យ៉ង់ បាន​ណែនាំ​ដល់សិស្សក្នុងវិទ្យាល័យទាំងអស់ ត្រូវ​ចេះ​ឆ្លៀតឱកាសបង្កើតសេដ្ឋកិច្ច​ដោយខ្លួនឯងដូច គឹមសុង ចៀសវាងការដើរលេង មានបក្សពួក​បង្កធ្វើរឿងមិនល្អ បង្កបញ្ហាក្នុងគ្រួសារ ក៏ដូចជាក្នុងសង្គម ហើយ​ដែល​អាចរក​ចំណូល​ជួយ​សេដ្ឋកិច្ចដល់​គ្រួសារ ដោយ​មិន​រំពឹងការផ្គត់ផ្គង់តែលើ​ឪពុកម្តាយទាំងស្រុង៕

អត្ថបទ៖ សៅ សារិទ្ធ