ព័ត៌មានជាតិ

សមាជិក ប.ស.ស ជាបុគ្គលិកក្រុមហ៊ុនឯកជនទទួលបានអត្ថប្រយោជន៍ជាច្រើន ពី ប.ស.ស

បានផុស

១ សប្តាហ៍ មុន

នៅ

ថ្ងៃពុធ ១៩ មីនា ២០២៥

ដោយ

បេឡាជាតិសន្តិសុខសង្គម(ប.ស.ស.)បានឱ្យដឹងថា បុគ្គលិកក្រុមហ៊ុនឯកជន ក្លាយជាសមាជិក ប.ស.ស. និងមានប័ណ្ណ ប.ស.ស. រួចរាល់ហើយ នឹងទទួលបានអត្ថប្រយោជន៍ជាច្រើនពី ប.ស.ស.ចាប់តាំងពីការទៅពិនិត្យព្យាបាលជំងឺនៅតាមមន្ទីរពេទ្យដោយមិនគិតថ្លៃរហូតដល់ទទួលបានប្រាក់រ៉ឺត្រែតបន្ទាប់ពីចូលនិវត្តន៍ក្រោយអាយុ ៦០ ឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប.ស.ស បានបញ្ជាក់បន្ថែមថា អត្ថប្រយោជន៍ទាំងនោះរួមមានពេលឈឺទៅមន្ទីរពេទ្យជាដៃគូរបស់ ប.ស.ស. គឺ ប.ស.ស. នឹងរ៉ាប់រងលើថ្លៃព្យាបាលរហូតដល់ជាសះស្បើយ និងផ្ដល់ប្រាក់ឧបត្ថម្ភផ្សេងៗ។

ចំពោះស្ត្រីពេលមានផ្ទៃពោះ នឹងទទួលបានការធានារ៉ាប់រងលើសេវាថែទាំសុខភាព មុននិងក្រោយសម្រាល សេវាថ្លៃសម្រាល ជាមួយនឹងប្រាក់បំណាច់ប្រចាំថ្ងៃ ៧០% នៃប្រាក់ឈ្នួលជាប់ភាគទានប្រចាំថ្ងៃ រយៈពេល ៩០ ថ្ងៃ ព្រមទាំងប្រាក់ឧបត្ថម្ភបន្ថែមពីរាជរដ្ឋាភិបាល និងប្រាក់ពិនិត្យសុខភាពម្តាយ និងកូន។

ប្រសិនបើមានគ្រោះថ្នាក់ ឬបាត់បង់ជីវិត ដោយសារគ្រោះថ្នាក់ការងារ នោះ ប.ស.ស. នឹងធានារ៉ាប់រងលើសេវាសង្គ្រោះបន្ទាន់, ការព្យាបាល និងថែទាំ, ផ្ដល់ប្រាក់ឧបត្ថម្ភ ផ្តល់ប្រាក់វិភាជន៍បូជាសព រួមទាំងអត្ថប្រយោជន៍របបសន្តិសុខសង្គមផ្សេងៗ ជាច្រើនទៀត ស្របទៅតាមច្បាប់ស្តីពីរបបសន្តិសុខសង្គម។ លើសពីនេះបុគ្គលិកក្រុមហ៊ុនដែលជាសមាជិក ប.ស.ស.នឹងទទួលបានប្រាក់សោធនជរាភាព (ប្រាក់រ៉ឺត្រែត) បន្ទាប់ពីខ្ញុំចូលនិវត្តន៍ក្រោយអាយុ ៦០ ឆ្នាំ។

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា គិតត្រឹមសប្ដាហ៍ទី ៤ ខែមករា ឆ្នាំ ២០២៥ នេះ ប.ស.ស. មានសមាជិកកើនឡើងដល់ ២ ៧៨៥ ៥២៦ នាក់ ស្រី ១ ៥៤៤ ២២៣ នាក់ ក្នុងនោះ បុគ្គលស្ថិតក្នុងវិស័យសាធារណៈចំនួន ៤៩៥ ៥៩៣ នាក់ , បុគ្គលក្រោមបទប្បញ្ញត្តិច្បាប់ស្តីពីការងារចំនួន ១ ៦០៣ ៤៨២ នាក់ , បុគ្គលស្វ័យនិយោជន៍ ចំនួន ៥២៣ ០១៣ នាក់ និងអ្នកក្នុងបន្ទុកសមាជិក ប.ស.ស. ចំនួន ១៦៣ ៤៣៨ នាក់។

លោក កត្តា អ៊ន បានបន្តទៀតថា ការកើនឡើង នៃចំនួនសមាជិក ប.ស.ស ជាបន្តបន្ទាប់នេះ ដោយសារប្រជាពលរដ្ឋមានជំនឿទុកចិត្តមកលើសេវា ប.ស.ស និងយល់ដឹងពីអត្ថប្រយោជន៍ផ្សេងៗ។ មានប័ណ្ណ ប.ស.ស. ជួយសម្រាលបន្ទុកនៅក្នុងគ្រួសារបានយ៉ាងច្រើននៅពេលទៅពិគ្រោះ និងព្យាបាលជំងឺផ្សេងៗ នៅតាមមូលដ្ឋានសុខាភិបាលជាដៃគូជាមួយ ប.ស.ស ព្រោះរាល់ការចំណាយគឺជាបន្ទុករបស់ ប.ស.ស៕

អត្ថបទ ៖ សំអឿន