ព័ត៌មានជាតិ

បង្វែរសាឡាងនៅស្ទឹងត្រង់ក្រូចឆ្មារ ទៅប្រើដឹកចម្លងពលរដ្ឋទៅស្រុកកំពង់លែងវិញ

បានផុស

៤ years មុន

នៅ

ថ្ងៃអង្គារ ២៣ មីនា ២០២១

ដោយ

បើតាមការបញ្ជាក់របស់រដ្ឋមន្ត្រីក្រសួងសាធារណការនិងដឹកជញ្ជូន បានលើកពីគម្រោងក្នុងការយកសាឡាងពីក្រូចឆ្មារស្ទឹងត្រង់ ទៅដាក់នៅខេត្តកំពង់ឆ្នាំងវិញ សម្រាប់បម្រើការដឹកជញ្ជូនពលរដ្ឋឆ្លងទៅស្រុកកំពង់លែង ដែលមិនទាន់មានស្ពានធ្វើដំណើរទៅមកនៅឡើយ។

ថ្លែងក្នុងពេលដាក់ឲ្យប្រើប្រាស់បណ្តោះអាសន្នស្ពានស្ទឹងត្រង់ក្រូចឆ្មារនៅព្រឹកនេះ ឯកឧត្ដម ស៊ុន ចាន់ថុល បានបញ្ជាក់ថា ដោយសារស្ពានស្ទឹងត្រង់ក្រូចឆ្មារបានបញ្ចប់ការសាងសង់រួចហើយនោះ សាឡាងដែលប្រើនៅទីនេះនឹងយកទៅប្រើប្រាស់សម្រាប់ចម្លងប្រជាពលរដ្ឋពីទីរួមខេត្តកំពង់ឆ្នាំទៅស្រុកកំពង់លែងតភ្ជាប់ជាមួយផ្លូវជាតិ ៥០C។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឯកឧត្តមបន្តថា ដោយសារពីទីរួមខេត្តកំពង់ឆ្នាំងទៅស្រុកកំពង់លែងមិនទាន់មានស្ពាន ដូច្នេះការប្រើប្រាស់សាឡាងជាមធ្យោបាយតែមួយគត់ សម្រាប់បម្រើការដឹកជញ្ជូនរបស់ប្រជាពលរដ្ឋ។

រដ្ឋាភិបាលបានដាក់ឲ្យប្រើប្រាស់បណ្តោះអាសន្ន ស្ពានឆ្លងកាត់ទន្លេមេគង្គតភ្ជាប់រវាងស្រុកក្រូចឆ្មាររបស់ខេត្តត្បូងឃ្មុំ និងស្រុកស្ទឹងត្រង់ខេត្តកំពង់ចាម។

ស្ពានឆ្លងកាត់ទន្លេងមេគង្គទើបដាក់ឲ្យដំណើរការនេះ មានប្រវែងសរុប ១១៣១ម៉ែត្រ ទទឹង១៣,៥ ម៉ែត្រ (ក្នុងនោះមានគន្លងផ្លូវរថយន្ត៣,៥មx២ គន្លងទោចក្រយានយន្ត១,៩មx២ គន្លងផ្លូវថ្មើរជើង១,១មx២+០,២៥មx២ (បង្កាន់ដៃ) ជាប្រភេទស្ពានបេតុងសរសៃដែក ឬបេតុងអាមេ។

គម្រោងសាងសង់ស្ពានស្ទឹងត្រង់-ក្រូចឆ្មារ ជាគម្រោងស្ពានមិត្តភាពកម្ពុជាចិនទី៨ ដែលបានបើកការដ្ឋានសាងសង់កាលពីថ្ងៃទី១ ខែធ្នូ ឆ្នាំ២០១៧ ចំណាយថវិកាប្រមាណ៥៨,៤២លានដុល្លារអាមេរិក។

តាមរយៈស្ពាននេះ អាចជួយទាញភូមិសាស្រ្តរវាងខេត្តកំពង់ចាម និងខេត្តត្បូងឃ្មុំឱ្យកាន់តែកៀកចូលជិតគ្នា ជួយសម្រួលដល់ការធ្វើដំណើររបស់បងប្អូនប្រជាពលរដ្ឋ បម្រើដល់ការដឹកជញ្ជូនទំនិញកសិផលទៅកាន់ទីផ្សារ ទាក់ទាញការវិនិយោគ លើកកម្ពស់ជីវភាពរស់នៅរបស់ប្រជាជន ជាពិសេសចូលរួមចំណែកដល់ការជំរុញកំណើនសេដ្ឋកិច្ចជាតិបានមួយកម្រិតថែមទៀត៕