អាជ្ញាធរស្រុកចិត្របុរី និងអាវុធហត្ថខេត្តក្រចេះ ចុះជួយជួសជុលផ្ទះសំបែងពលរដ្ឋរងគ្រោះដោយខ្យល់កន្ត្រាក់

លោកឧត្តមសេនីយ៍ត្រី សាក់ សារ៉ាង មេបញ្ជាការកងរាជអាវុធហត្ថខេត្តក្រចេះ បានដឹកនាំកម្លាំង​ដោយ​សហការជាមួយ អាជ្ញាធរស្រុកចិត្របុរី ចុះជួយជួសជុលផ្ទះសម្បែងជូនប្រជាពលរដ្ឋ ដែលគ្មានលទ្ធភាពក្រោយរងគ្រោះដោយខ្យល់កន្ត្រាក់​។

សកម្មភាពដឹកនាំកម្លាំងចុះជួយធ្វើផ្ទះជូនប្រជាពលរដ្ឋនៅស្រុកចិត្របុរី ធ្វើឡើងនៅថ្ងៃទី១៩ ខែមិនា ឆ្នាំ២០២៥ និង​ក៏​បាន​នាំយក​ទៅ​អំណោយដល់គ្រួសាររងគ្រោះដោយខ្យល់កន្ត្រាក់ ក្រោយពីមានហេតុការណ៍ខ្យល់កន្ត្រាក់លាយឡំភ្លៀង ដែលកើតឡើងកាលពីថ្ងៃទី១៦ ខែមិនា ឆ្នាំ២០២៥កន្លងទៅថ្មីៗនេះ។

កាលពីថ្ងៃទី១៦ ខែមិនា ឆ្នាំ២០២៥ ខេត្តក្រចេះបានទទួលរងនៅឥទ្ធិពលខ្យល់កន្ត្រាក់មួយមេធំ ដោយលាយឡំជាមួយទឹកភ្លៀង បណ្តាលឲ្យស្រុកមួយចំនួនក្នុងខេត្ត រងផលប៉ះពាល់ដល់ផ្ទះសំបែងរបស់ប្រជាពលរដ្ឋ។ ក្នុងនោះរួមមាន៖ ១. ស្រុកស្នួល៖ ប៉ះពាល់ ៤ គ្រួសារ ស្មើរ ០៤ ខ្នងផ្ទះ។ ២. ស្រុកព្រែកប្រសព្វ៖ ប៉ះពាល់ចំនួន ២៩ ខ្នងផ្ទះ ស្មើនឹង ២៩ គ្រួសារ។ ៣. ស្រុកចិត្របុរី៖ ប៉ះពាល់ចំនួន ២៣៥ គ្រួសារ ស្មើចំនួន ២៣១ ខ្នងផ្ទះ៕

អត្ថបទ៖ ប្រុញ វិធិន