សមាគមធនាគារ​បញ្ជាក់​ពីស្ថានភាព​បំណុល​នៅ​កម្ពុជា ខណៈ​ខេត្ត​​ក្រុង​ ៣ មាន​អត្រាកម្ចី​ខ្ពស់ជាង​គេ

សមាគមធនាគារ និងមីក្រូហិរញ្ញវត្ថុនៅកម្ពុជា​ បាន​បញ្ចេញ​របាយការណ៍ស្តីពីស្ថានភាព​បំណុល​នៅ​កម្ពុជា គិត​ត្រឹម​ដំណាច់​ឆ្នាំ ២០២៤។ ការ​ចេញ​របាយការណ៍នេះ​ ដើម្បី​បញ្ជាក់បន្ថែម​ទៅ​ការ​ផ្សាយ​ទិន្នន័យ​របស់ការិយាល័យឥណទានកម្ពុជា (CBC) ដែលបង្ហាញថា ប្រទេសកម្ពុជាមានប្រជាជនជំពាក់បំណុលរហូតដល់ជិត ៦០ ពាន់លានដុល្លារ (៦០ប៊ីលាន) គិតត្រឹម​ដំណាច់ឆ្នាំ២០២៤។

​សមាគមធនាគារ និងមីក្រូហិរញ្ញវត្ថុនៅ​កម្ពុជា​បាន​បញ្ជាក់ថា របាយការណ៍​របស់ CBC កត់ត្រាតែទិន្នន័យឥណទាន​ឬកម្ចីប៉ុណ្ណោះ ប៉ុន្តែបើ​ផ្អែកតាមទិន្នន័យពីរបាយការណ៍ធនាគារជាតិនៃកម្ពុជាឆ្នាំ ២០២៤ ប្រាក់បញ្ញើអតិថិជនក្នុងវិស័យធនាគារនិងហិរញ្ញវត្ថុបានកើនដល់ ៥៧ ពាន់លានដុល្លារ (៥៧​ ប៊ី​លាន​)​។ បើនិយាយពីបម្រែ​បម្រួល​ក្នុងឆ្នាំ២០២៣ និង២០២៤ ឥណទានមានកំណើនត្រឹមតែ ៣% ប៉ុណ្ណោះ ខណៈដែលប្រាក់បញ្ញើមានកំណើនរហូតដល់ ១៦.៣%។ ប៉ុន្តែឥណទានដែលអតិថិជន​បង់​សង​យឺត​លើស​ ៩០ ថ្ងៃ ក៏បានកើនដល់ជាង ៦% ផងដែរ។

បំណុលឬឥណទាន មិនមែនសុទ្ធតែអាក្រក់នោះទេ ហើយឥណទាននៅកម្ពុជា​ត្រូវបានបញ្ចេញជូនអតិថិជនក្នុងវិស័យផ្សេងៗគ្នា (ពិពិធកម្ម) ដូចជា ការជួញដូររាយ ទិញផ្ទះជាកម្មសិទ្ធិផ្ទាល់ខ្លួន ការជួញដូរអចលនទ្រព ការខ្ចីជាបុគ្គល សំណង់ កសិកកម្មរុក្ខាប្រមាញ់និងនេសាទ ការជូញដូរដុំ កម្មន្តសាល សណ្ឋាគារនិងភោជនីយដ្ឋាន និងផ្សេងៗ។ នេះបើតាម​​សមាគមធនាគារ និងសមាគមមីក្រូហិរញ្ញវត្ថុនៅ​កម្ពុជា។

របាយការណ៍​របស់​សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជាក៏​បានបញ្ជាក់បន្ថែម​ថា ឥណទានក្នុងរាជធានីភ្នំពេញ កណ្តាល និងសៀមរាប ​មានកម្រិត​ខ្ពស់គឺបណ្តាលមកពីតំបន់ទាំងនេះ​ជាបណ្តុំនៃសកម្មភាពសេដ្ឋកិច្ច និងមានចំនួនប្រជាជនច្រើន​៕

ប្រៀបធៀបកម្ចី និងបញ្ញើក្នុងវិស័យធនាគារ ក្នុងឆ្នាំ២០២៣ vs ២០២៤

គោលបំណងកម្ចីក្នុងវិស័យធនាគារ

គោលបំណងកម្ចីក្នុងវិស័យមីក្រូហិរញ្ញវត្ថុ