​បរទេស​មួ​យក្រុម​ ហែលទឹក​ចម្ងាយ ១២០ គីឡូ​ម៉ែត្រ ​ពី​ខេត្ត​ស្ទឹងត្រែង ​រៃអង្គាសថវិកា​​ជួយ​ការពារ​ផ្សោតទន្លេមេគង្គ

ក្រុមអ្នកហែលទឹកទន្លេមេគង្គបរទេសមួយក្រុម​ បានចូលរួម​បេសកកកម្ម​ដើម្បី​​ហែលទឹកចម្ងាយ ១២០ គីឡូម៉ែត្រ តាមដងទន្លេមេគង្គចាប់ពីខេត្តស្ទឹងត្រែង ឆ្ពោះមកកាន់គោលដៅបញ្ចប់នៅខេត្តក្រចេះ ដើម្បី​រៃអង្គាសថវិកា​​ជួយ​ការពារ​ផ្សោតទន្លេមេគង្គ។

កញ្ញា អ៊ឹម រចនា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ខណៈ​​មកទទួល​ក្រុម​អ្នកហែលទឹកដែល​បាន​មកដល់ទីរួមខេត្តក្រចេះនៅរសៀលថ្ងៃទី២០ ខែមីនា ឆ្នាំ២០២៥ បាន​ថ្លែង​ថា ចំពោះបេសកកម្ម​ហែល​ទឹកនាពេល​នេះបានបញ្ជាក់​ឲ្យឃើញពីភាពស្អាត និងសុវត្ថិភាពនៃទន្លេមេគង្គ ដែលផ្ដល់ឱ្យសត្វផ្សោត និងសហគមន៍អាចលូតលាស់រីកចម្រើន។

កញ្ញា ក៏បានបញ្ជាក់ផងដែរថា កិច្ចសហការទាំងនេះ បានរួមចំណែកយ៉ាងសំខាន់ ដែលជាមធ្យោបាយឆ្ពោះទៅរកការអភិរក្សប្រកបដោយប្រសិទ្ធភាព។

លោក ឆេង សំបូរ ជាប្រធានផ្នែកកិច្ចការសាធារណ ចំណេះដឹង និង​ព័ត៌មាន នៃអង្គការ WWF បានឲ្យកម្ពុជាថ្មីដឹងថា យុទ្ធនាការហែលទឹកទន្លេមេគង្គចម្ងាយ ១២០ គីឡូម៉ែត្រ ធ្វើឡើងគឺក្នុងគោលបំណងទី១ ចង់ផ្សព្វផ្សាយឲ្យមាន​ការចូលរួមពីប្រជាពលរដ្ឋ សហគមន៍​ ដែលរស់នៅក្នុងតំបន់ទីជំរកសត្វផ្សោតរស់នៅត្រូវគិតឡើងវិញ ត្រូវចូលរួមការពារផ្សោត ចូលរួម​ការពារទន្លេមេគង្គ ពីព្រោះទន្លេមេគង្គទាំងមូលមានធនធានច្រើនណាស់នៅខាងក្រោម ដែលផ្ដល់ផលប្រយោជន៍ទៅដល់ប្រជាជនអាស្រ័យដើម្បីជីវភាពរស់នៅ។

គោលបំណង​ទី២ សំខាន់បំផុត គឺរៃអង្គាសថវិកាប្រមាណពី ២ ម៉ឺនដុល្លារ ទៅ ២៥ ០០០ ដុល្លារ ដើម្បីចូលរួមជួយទៅដល់កម្មវិធីឆ្មាំទន្លេ ក៏ដូចជាកម្មវិធីសិក្សាស្រាវជ្រាវនៅក្នុងទន្លេមេគង្គ ក៏ដូចជាគាំទ្រនឹងលើកកម្ពស់ ទៅដល់ជីវភាព​សហគមន៍។

លោកបន្តថា ចំពោះយុទ្ធនាការហែលទឹកនេះ ក្រុមអ្នកហែលទឹកមានចំនួន ៥ រូប ដែលបានធ្វើដំណើរមកពីសហរដ្ឋ​អាមេរិក អង់គ្លេស និង​អាហ្វ្រិក ចាប់ពីថ្ងៃទី១៧ ដល់ថ្ងៃទី២០ ខែមីនា ឆ្នាំ២០២៥។

បេសកកម្មហែលទឹកចម្ងាយ​នេះ​មានរយៈពេល ៤ ថ្ងៃ ដោយ​បានចាប់ផ្តើមហែលពី ខេត្តស្ទឹងត្រែង ឆ្ពោះមកកាន់ខេត្តក្រចេះ​។ ក្នុងនោះ ក្រុមអ្នកហែលទឹក ត្រូវសម្រាកនៅលើកោះចំនួន ៣ កន្លែង មានដូចជា កោះជ្រឹម ក្នុងខេត្តស្ទឹងត្រែង និង​កោះ​ចំនួន ២ទៀត គឺកោះផ្ដៅ និងកោះព្រហ្មចារីយ៍ ក្នុងខេត្តក្រចេះ។

ការហែលទឹក​ចម្ងាយ ១២០ គីឡូម៉ែត្រនេចាត់ទុកថា ជាដំណើរដ៏វែងឆ្ងាយ ហើយមិនមែនងាយស្រួលប៉ុន្មានដែរ ដោយ​សារ​ត្រូវឆ្លងកាត់តំបន់ជាច្រើន ដែល​មានស្ថានភាពខុសៗគ្នា។ កន្លែងខ្លះទឹកស្ងប់ក៏ប៉ុន្តែខ្យល់បក់បោកខ្លាំង រលកខ្លាំង កន្លែង​ខ្លះទឹករាក់​ហូរខ្លាំង កន្លែងខ្លះថ្មច្រើន និងកន្លែងខ្លះទៀតនៅខាងក្រោមទឹកមានមង អ្នកនេសាទ។ ដូច្នេះ ទាំងអស់នឹង​ហើយក៏ជាឧបសគ្គ​ ប៉ុន្តែយ៉ាងណាមិញ​ ក្រុមការងារនៅតែគិតថា មិនមែនជាបញ្ហាទេ ដោយសារតែវាជាកម្មវត្ថុ ជា​គោល​បំណងដែលក្រុមការងារចង់មកស្វែងយល់ថា តើអ្វីដែលកំពុងកើតមានក្នុងទន្លេមេគង្គ ហើយអ្វីដែលក្រុមការងារកំពុងធ្វើនឹងអាចជួយ ក៏ដូចជាចូលរួមទាំងអស់គ្នាដើម្បីដោះស្រាយបញ្ហាទាំងអស់នោះ។

ក្នុងរយៈចម្ងាយដ៏សែនឆ្ងាយស្មុកស្មាញ់ពី​ខេត្ត​ស្ទឹងត្រែង​ដល់ខេត្តក្រចេះ លោក ឆេង សំបូរ បានចាត់ទុកវាជាទីជំរកដ៏សំខាន់របស់សត្វផ្សោត។ ហើយការដែលក្រុមអ្នកហែលទឹក ចូលរួមធ្វើយុទ្ធនាការហែលទឹកទន្លេមេគង្គនោះ គឺចង់បង្កើនការយល់ដឹងរបស់ប្រជាជន ប្រជាសហគម ហើយផ្សារភ្ជាប់ទៅនឹងការផ្សព្វផ្សាយរបស់អាជ្ញាធរ និងអ្នកពាក់ព័ន្ធឲ្យបានទូលំទូលាយ នៅទូទាំងប្រទេស ក៏ដូចជានៅក្រៅប្រទេសតាមរយៈ ក្រុមជាជនជាតិបរទេស និងផ្តិតយករូបភាពអ្វីដែល​ពួក​គាត់ទទួលបាន និង​បាន​ឃើញនាពេលនេះ យកទៅផ្សព្វផ្សាយនៅដល់ប្រទេសរបស់ពួកគាត់ ឲ្យប្រជាជនគាត់ ដែលជាប្រពន្ធផ្សព្វផ្សាយសង្គម បានដឹងថា នៅក្នុងប្រទេសកម្ពុជា នៃទន្លេមេគង្គមានសក្តានុពល ដែល​អាចទាញ​ចេញ ពីវិស័យ​អេកូទេសរចណ៍ ការទស្សនាមើលផ្សោត ឬក៏ទន្លេមេគង្គនោះវាយ៉ាងណា។

មួយវិញទៀត យុទ្ធនាការនេះ ជាយុទ្ធនាការប្រវត្តិសាស្ត្រទី១ នៅក្នុងប្រទេសកម្ពុជា ក្នុងខេត្តទាំងពីរជាប់ដងទន្លេមេគង្គ។ លោកបន្ត​ថា យុទ្ធនាការនេះ មិនមែនជាយុទ្ធនាការមួយដងនោះទេ ក្រុមការងារនឹងធ្វើក្នុងរូបភាពផ្សេង ឬសកម្មភាពណាមួយផ្សេងៗ និង​បន្តធ្វើជារៀងឆ្នាំ ដើម្បីចូលរួមជួយទៅដល់កម្មវិធីឆ្មាំទន្លេ ក៏ដូចជាកម្មវិធីសិក្សាស្រាវជ្រាវនៅក្នុងទន្លេមេគង្គ ក៏ដូចជាគាំទ្រនឹងលើកកម្ពស់ទៅដល់ជីវភាពសហគម៕

អត្ថបទ ប្រុញ វិធិន