ព័ត៌មានជាតិ

នគរបាលពន្លត់អគ្គិភ័យ ទទួលបានការហ្វឹកហាត់ប្រើប្រាស់រថយន្តប្រភេទជណ្ដើរ ពីសមាគមអ្នកពន្លត់អគ្គិភ័យជប៉ុន

បានផុស

១៩ វិនាទី មុន

នៅ

ថ្ងៃសុក្រ ២១ មីនា ២០២៥

ដោយ

កាលពីព្រឹកថ្ងៃទី ២១ ខែមីនា ឆ្នាំ ២០២៥ នេះ កម្លាំងសមត្ថកិច្ចជំនាញរបស់ការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានហ្វឹកហាត់រៀនអំពីវិធីប្រើប្រាស់រថយន្តប្រភេទជណ្ដើរ និងប្រើប្រាស់ទឹកទុយោបាញ់ទឹក ពីសមាគមអ្នកពន្លត់អគ្គិភ័យជប៉ុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការហ្វឹកហាត់នេះមានការអញ្ជើញចូលរួមពី លោក KATSUAKI GODA ប្រធានក្រុមការងារសមាគមអ្នកពន្លត់អគ្គិភ័យជប៉ុន ព្រមទាំងក្រុមការងារសមាគមអ្នកពន្លត់អគ្គិភ័យជប៉ុន ដែលតែងតែបង្ហាត់បង្រៀនដល់មន្ត្រីជំនាញការិយាល័យនគរបាលបង្ការពន្លត់អគ្គិភ័យ និងសង្គ្រោះ ដើម្បីធានាបាននូវការជួយសង្គ្រោះប្រជាពលរដ្ឋ និងឆ្លើយតបតាមតម្រូវការចាំបាច់ នៃការងារពន្លត់អគ្គិភ័យផងដែរ។

លោក KATSUAKI GODA បានណែនាំដល់មន្ត្រីជំនាញការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ ត្រូវតែបង្កើនការយកចិត្តទុកដាក់ខ្ពស់បំផុត ជាពិសេសត្រូវធ្វើការស្វែងយល់ និងរៀនសូត្របន្ថែមទៀត ក្នុងការងារជួយសង្គ្រោះប្រជាពលរដ្ឋឲ្យបានទាន់ពេលវេលា។

ជាមួយនេះ ប្រធានក្រុមការងារសមាគមអ្នកពន្លត់អគ្គិភ័យជប៉ុន ក៏បានអរគុណដល់មន្ត្រីជំនាញការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ ដែលបានយកចិត្តទុកដាក់ខ្ពស់ក្នុងការហ្វឹកហាត់រៀនសូត្រអំពីការប្រើប្រាស់រថយន្តជណ្តើរ ក៏ដូចជាវិធីជួយសង្គ្រោះមនុស្សដែលជាប់ក្នុងអគារ។

គួរជម្រាបថា តាមការសង្កេត នៅរាជធានីភ្នំពេញ តែងតែមានអគារខ្ពស់ៗ ដែលចាំបាច់ត្រូវធ្វើការហ្វឹកហាត់ឲ្យបានត្រឹមត្រូវនៅពេលមានអគ្គិភ័យកើតឡើង ហើយត្រូវការអន្តរាគមន៍ភ្លាមៗ៕

អត្ថបទ ៖ សុភា