រោងចក្រធំមួយនៅខេត្តកំពង់ស្ពឺ ប្រកាសជ្រើស​រើស កម្មករនិយោជិត ៣ពាន់កន្លែង

ក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា ក្រុមហ៊ុន ឆើរី អេឡេហ្គង់ មេនូហ្វេកឆឺរីង ដែលមានទីតាំងស្ថិតនៅខេត្តកំពង់ស្ពឺបានប្រកាសជ្រើសរើសកម្មករនិយោជិត ផ្នែកកាត់ដេរប្រមាណ៣ពាន់កន្លែង ហើយកម្មករនិយោជិតដែលបម្រើការងារនៅក្នុងក្រុមហ៊ុននេះ មិនត្រឹមទទួលបានប្រាក់ខែគោលប៉ុណ្ណោះទេ ថែមទាំងទទួលបាននូវប្រាក់អត្ថប្រយោជន៍ជាច្រើនស្របទៅតាមច្បាប់ស្តីពីការងារផងដែរ។

បើតាមក្រសួងក្រសួងការងារ មុខតំណែងដែលក្រុមហ៊ុន ធើរី អេឡេហ្គង់ មេនូហ្វេកឆឹរឹង ប្រកាសជ្រើសរើសរួមមានផ្នែកដេរ ផ្នែកត្រួតពិនិត្យគុណភាព ប្រធានក្រុមដេរ ផ្នែកតុកាត់ និងផ្នែកវិចខ្ចប់ ដោយកម្មករនិយោជិតនឹងទទួលបានប្រាក់ខែគោលចំនួន២០៨ដុល្លារ លុយព្រីមមកធ្វើការទៀងទាត់២០ដុល្លារ លុយបាយថ្ងៃត្រង់ ២០០០រៀល លុយបាយថែមម៉ោង ២០០០រៀល លុយធ្វើដំណើរ៧ដុល្លារ និងប្រាក់រង្វាន់លើកទឹកចិត្តការធ្វើគ្រប់ចំនួន គោលដៅ ពី ២០០០រៀលទៅ១០០០០រៀល។

ក្រសួងការងារបានណែនាំដល់យុវជន និងអ្នកកំពុងស្វែងរកការងារដែលចាប់អារម្មណ៍ចង់ដាក់ពាក្យ សូមទាក់ទងមក ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ តាមរយៈលេខទូរស័ព្ទ ១២៩៧
ឬ ១២៨៦ និងតេលេក្រាម ឬ Cool App លេខ ០៧៧ ២៣២ ៣៧៨ ឬគេហទំព័រwww.nea.gov.kh។

គួរបញ្ជាក់ថា គិតត្រឹមឆមាសទី១ ឆ្នាំ២០២៤ ខេត្តកំពង់ស្ពឹ មានរោងចក្រកំពុងដំណើរការសរុបចំនួន៤២៣កន្លែង និងមានសហគ្រាសធុនតូច និងមធ្យមប្រមាណជិត១០០០កន្លែងដោយមានកម្មករ-កម្មការិនីប្រមាណជាង២សែននាក់ កំពុងធ្វើការ ហើយក្នុងចំណោមរោងចក្រទាំងនោះអ្នកវិនិយោគប្រមាណ៩០ភាគរយជាជនជាតិចិន៕

អត្ថបទ៖ សំអឿន