គណៈកម្មការចម្រុះកិច្ចការព្រំដែន កម្ពុជា-ឡាវ ជួបពិភាក្សាស្តីពីការងារបោះបង្គោល

អភិបាលខេត្តស្ទឹងត្រែងលោក សរ សុពុត្រា បានទទួលជំនួបពិភាក្សាការងារជាមួយគណៈកម្មការចម្រុះកិច្ចការព្រំដែន កម្ពុជា-ឡាវ – ឡាវ-កម្ពុជា កាលពីថ្ងៃទី ២១ ខែមីនា ឆ្នាំ ២០២៥ ដើម្បីពិភាក្សាអំពីវឌ្ឍនភាពការងារបោះបង្គោលព្រំដែនប្រទេសទាំងពីរ ក្នុងភូមិសាស្ត្រខេត្តស្ទឹងត្រែង នៅសាលាខេត្តស្ទឹងត្រែង។ 

ក្នុងជំនួបនោះ លោក សរ សុពុត្រា បានវាយតំលៃខ្ពស់ចំពោះបេសកកម្មរបស់ គណៈកម្មការចម្រុះកិច្ចការព្រំដែននៃភាគីទាំងសងខាង ដែលបានប្រឹងប្រែងដោយឈរលើគោលការណ៍ស្មើភាពគ្នា សម្រាប់ប្រជាជាតិទាំងពីរ។ លោកបានសង្កត់ធ្ងន់ថា៖«បេសកកម្មនេះ គឺជាបេសកកម្មសន្តិភាព ជាប្រទេសដែលមានភូមិផងរបងជាមួយគ្នា ដែលយើងចង់កសាងសន្តិភាពសំរាប់ជាតិទាំងសងខាង គឺឱកាសឱ្យប្រជាជនរស់នៅសុខដុមរមនា»។

លោក​បាន​កត់​សម្គាល់​ថា ការ​ផ្តល់​អាទិភាព​ដល់​ផលប្រយោជន៍​ជាតិ​បាន​នាំ​ទៅ​រក​ទំព័រ​ថ្មី​ក្នុង​ប្រវត្តិសាស្ត្រ ដោយ​ថ្នាក់ដឹកនាំ​នៃ​ប្រទេស​ទាំង​ពីរ​ខិតខំកសាងទំនុកចិត្ត ការ​យោគយល់​គ្នា ​និងបង្កើន​ភាព​ស្និទ្ធស្នាល​គ្នា​ទៅ​វិញ​ទៅ​មក។

ការគាំទ្រ រវាងកម្ពុជា ឡាវ តែងតែទន្ទឹមគ្នា ហើយដើរស្របគ្នា ដើម្បីផលប្រយោជន៍របស់ប្រជាជន ។ តាមរយៈអនុស្សាវរីយ៍ និងមនោសញ្ចេតនានៃថ្នាក់ដឹកនាំទាំងពីរប្រទេស គឺជាជំនួយស្មារតីសំរាប់កិច្ចពិភាក្សា របស់គណៈកម្មការចម្រុះនៃប្រទេសទាំងពីរ ហើយយើងនិងទទួលបានលទ្ធផលល្អ ជាពិសេសគឺបានកសាងនូវភាពរឹងមាំ ដែលប្រទេសទាំងពីរមានបង្គោលព្រំដែនដ៏ជាក់លាក់ ដោយមិនអាចឱ្យប្រទេសណាមួយវាយតម្លៃអំពីការដឹកនាំរបស់ប្រទេសទាំងពីរឡើយ។ នេះបើតាមលោក សរ សុពុត្រា។

បើតាមលោកអភិបាលខេត្ត ការខិតខំប្រឹងប្រែងរបស់គណៈកម្មការចម្រុះកិច្ចការព្រំដែន កម្ពុជា-ឡាវ – ឡាវ-កម្ពុជា គឺជាការខិតខំបំពេញនាំមកនូវបុព្វហេតុជាតិ ភាពរឹងមាំសម្រាប់ព្រំដែនមានការបែងចែកយ៉ាងជាក់លាក់ ហើយរួមគ្នាដើម្បីនាំមកនូវសន្តិភាពជូនប្រជាជនយើងទាំងអស់គ្នា៕