ព័ត៌មានជាតិ

ក្រុមមន្ត្រីជំនាញ ផ្ដើមចុះបញ្ជីដីធ្លីមានលក្ខណៈជាប្រព័ន្ធចំនួន ៥ ភូមិ នៅឃុំថ្មស ស្រុកបូទុមសាគរ

បានផុស

៧ ថ្ងៃ មុន

នៅ

ថ្ងៃចន្ទ ២៤ មីនា ២០២៥

ដោយ

ក្រុមមន្ត្រីជំនាញ បានផ្តើមចុះបញ្ជីដីធ្លីដែលមានលក្ខណៈជាប្រព័ន្ធជូនប្រជាពលរដ្ឋចំនួន ៥ នៅឃុំថ្មស ស្រុកបូទូមសាគរ ខេត្តកោះកុង ដើម្បីឆ្លើយតបនឹងគោលនយោបាយរបស់រាជរដ្ឋាភិបាល សម្រាប់ផ្តល់ភាពស្របច្បាប់ជូនពលរដ្ឋដែលកំពុងកាន់កាប់អចលនទ្រព្យសព្វថ្ងៃនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អំណឹះតទៅ ប្រជាពលរដ្ឋរស់នៅឃុំថ្មស ដែលមានភូមិថ្មស ភូមិស្រែត្រាវ ភូមិស្រែថ្មី ភូមិចំការលើ និងភូមិចម្លងគោ នឹងទទួលបានក្តីបំណងហើយតាមការចង់បាននូវប្លង់កម្មសិទ្ធិអចលនវត្ថុ គ្រាពួកគាត់ទន្ទឹងរង់ចាំជាយូរឆ្នាំមកហើយ។

ក្នុងកិច្ចប្រជុំផ្សព្វផ្សាយសេចក្តីសម្រេចកំណត់វិនិច្ឆ័យសម្រាប់ការចុះបញ្ជីដីធ្លីមានលក្ខណៈជាប្រព័ន្ធចំនួន ៥ ភូមិ ខាងលើនេះ លោក រស់ វីរ៉ាវុធ ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកោះកុង បានឱ្យដឹងនៅថ្ងៃទី ២៤ ខែមីនា ថា ដើម្បីអនុញ្ញាតឱ្យការងារជំនាញមួយនេះប្រព្រឹត្តទៅបានដោយរលូន លុះត្រាកិច្ចសហការជាមួយអាជ្ញាធរភូមិ-ឃុំ និងពលរដ្ឋជាម្ចាស់ដីធ្លីទាំងអស់ លើផ្តល់ឯកសារពាក់ព័ន្ធពីប្រវត្តិកាន់កាប់ដី ចង្អុលពីស្ថានភាពព្រំដីជាក់ស្តែង ផ្តល់ព័ត៌មានផ្ទាល់មាត់ទាំងឡាយ ដែលជាតម្រូវការចាំបាច់បំផុត។

លោក រស់ វីរ៉ាវុធ បានក៏បានអំពាវនាវដល់អ្នកពាក់ព័ន្ធទាំងអស់ មេត្តាអញ្ជើញមកចុះបញ្ជីដីធ្លីឱ្យបានគ្រប់ៗ គ្នា ទៅតាមកំណត់របស់មន្ទីរជំនាញ ចៀសវាងការអាក់ខានចំពោះការងារចុះបញ្ជីដីធ្លីមានលក្ខណៈជាប្រព័ន្ធនេះ ស្របតាមគោលនយោបាយរាជរដ្ឋាភិបាលកម្ពុជា អាណត្តិទី៧។ ដោយឡែកភូមិសាស្ត្ររស់នៅពលរដ្ឋឃុំថ្មស ភាគច្រើនស្ថិតនៅតំបន់ឧទ្យានជាតិបូទូមសាគរ ដូច្នេះរាល់ការវាស់វែងរួចរាល់ហើយស្នើសុំក្រសួងបរិស្ថានពិនិត្យផ្ទៀងផ្ទាត់លម្អិត ហើយបន្តសុំប្រទានកម្មបន្ត។

ដោយឡែកលោក ឈេង សុវណ្ណដា អភិបាលរងខេត្តកោះកុង បានសម្តែងរីករាយជំនួសពលរដ្ឋដែលផ្តើមមានការចុះបញ្ជីដីធ្លីស្របតាមច្បាប់នៅពេលនេះ ហើយលោកជំរុញដល់ពលរដ្ឋ និងអាជ្ញាធរមូលដ្ឋាន គប្បីចូលរួមសហការជាមួយមន្ត្រីជំនាញកាន់តែជិតស្និទ្ធ ដើម្បីឱ្យកិច្ចការងារស្នូលនេះប្រព្រឹត្តដោយភាពល្អប្រសើរ។

បើតាមលោកអភិបាលរងខេត្តកោះកុងដដែល បន្ទាប់ពីការចុះបញ្ជីដីធ្លីមានលក្ខណៈជាប្រព័ន្ធនេះរួចរាល់ហើយ ក្រុមការងារជំនាញ នឹងបិទផ្សព្វផ្សាយជាសាធារណៈអំពីការផ្ទៀងផ្ទាត់ទិន្នន័យចំពោះក្បាលនីមួយៗ ឱ្យបានច្បាស់លាស់ ទើបនឹងមានការចេញជាលិខិតសម្គាល់កម្មសិទ្ធិអចលនវត្ថុតាមក្រោយ។

សម្រាប់ការងារស្នូល នៃការផ្តល់ព័ត៌មានស្របច្បាប់កាន់កាប់ដីធ្លីជូនពលរដ្ឋ រដ្ឋបាលខេត្ត និងមន្ទីរជំនាញ កំពុងធ្វើការងារយ៉ាងសកម្មចំពោះការចុះបញ្ជីដីធ្លីជូនពលរដ្ឋ និងអ្នកពាក់ព័ន្ធ ដើម្បីសម្រេចទៅតាមផែនការរបស់ក្រសួងដែនដី និងរាជរដ្ឋាភិបាលកម្ពុជា៕

អត្ថបទ ៖ សិរីវឌ្ឍនៈ