បុណ្យទន្លេ៣ថ្ងៃ ខេត្តតាកែវទទួលបានប្រជាពល​រដ្ឋ និងភ្ញៀវទេសចរសរុបជាង ៣៥ម៉ឺននាក់

ព្រឹត្តិការណ៍បុណ្យទន្លេ លើកទី៩ នៅខេត្តតាកែវ ដែលប្រព្រឹត្តទៅក្រោមប្រធានបទ «គុណតម្លៃនៃទន្លេ ផ្សារភ្ជាប់វប្បធម៌ និងទេសចរណ៍ធម្មជាតិ» បានបញ្ចប់ដោយជោគជ័យ ខណៈសន្ដិសុខសណ្ដាប់ធ្នាប់ប្រព្រឹត្តទៅដោយរលូន។ ក្នុងព្រឹត្តិការណ៍លើទី១ សម្រាប់ខេត្តតាកែវ ដែលជាខេត្តមានវ័យចំណាស់ជាងគេនេះ រយៈពេល៣ថ្ងៃនៃពិធីបុណ្យ មានប្រជាពលរដ្ឋ និងភ្ញៀវទេសចរជាតិ និងអន្តរជាតិចូលរួមសម្សាន្ដសរុបជាង ៣៥ម៉ឺននាក់ ក្នុងនោះភ្ញៀវអន្តរជាតិមានប្រមាណជាង ១០០០នាក់។ នេះបើតាមការបញ្ជាក់ពីលោក ហួត ហាក់ រដ្ឋមន្ត្រីក្រសួងទេសចរណ៍នៅព្រឹកថ្ងៃទី២៥ មីនានេះ។

លោករដ្ឋមន្ត្រីក្រសួងទេសចរណ៍ ក៏បានសម្តែងការកោតសរសើរ និងវាយតម្លៃខ្ពស់ចំពោះកិច្ចខិតខំរបស់គណៈកម្មការអន្តរក្រសួងរៀបចំបុណ្យទន្លេលើកទី៩នេះ ដែលបានរួមសហការគ្នាអស់ពីកម្លាំងកាយចិត្តបំពេញតួនាទីភារកិច្ចដោយការទទួលខុសត្រូវខ្ពស់ និងសម្រេចបានលទ្ធផលគួរជាទីមោទនៈ ទាំងការរៀបចំ ទាំងការពង្រឹងសន្តិសុខសុវត្ថិភាព និងសណ្តាប់ធ្នាប់សាធារណៈ ដែលផ្ដល់ឱកាសឱ្យប្រជាពលរដ្ឋ និងភ្ញៀវទេសចរបានចូលរួមទស្សនាកម្សាន្តយ៉ាងសប្បាយរីករាយ។

បើតាមលោក ហួត ហាក់ ការរៀបចំព្រឹត្តិការណ៍បុណ្យទន្លេលើកទី៩ រយៈពេល៣ថ្ងៃ ចាប់ពីថ្ងៃទី២១-២៣ ខែមីនា ឆ្នាំ២០២៥ នៅខេត្តតាកែវ សម្រាប់ថ្ងៃទី១ ទទួលបានភ្ញៀវទេសចរប្រមាណជាង ១០ម៉ឺននាក់ នៅថ្ងៃទី២ ដែលជាថ្ងៃបើកពិធីជាផ្លូវការក្រោមអធិបតីភាពដ៏ខ្ពង់ខ្ពស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ទទួលបានវត្តមានប្រជាពលរដ្ឋ និងភ្ញៀវទេសចរប្រមាណជាង ១១ម៉ឺននាក់ ចំណែកនៅថ្ងៃទី៣ ដែលជាថ្ងៃបិទបញ្ចប់ទទួលបានប្រជាពលរដ្ឋ និងភ្ញៀវទេសចរប្រមាណជាង ១៤ម៉ឺននាក់បន្ថែមទៀត។

សូមបញ្ជាក់ថា បើតាមការបញ្ជាក់ពីលោក ហួត ហាក់ រដ្ឋមន្ត្រីក្រសួងទេសចរណ៍ ព្រឹត្តិការណ៍បុណ្យទន្លេលើកទី១០ នៅឆ្នាំ២០២៦ នឹងត្រូវធ្វើឡើងនៅខេត្តពោធ៍សាត់ ដែលត្រូវធ្វើជាម្ចាស់ផ្ទះ។ តើខេត្តពោធិ៍សាត់ មានសក្តានុពលអ្វីខ្លះដែលទ្រទ្រង់ដល់ទេសចរណ៍សហគមន៍តាមដងទន្លេ? សូមត្រៀមខ្លួនទាំងអស់គ្នា ក្នុងដំណើរឆ្ពោះទៅកាន់ព្រឹត្តិការណ៍បុណ្យទន្លេលើកទី១០ ឆ្នាំ២០២៦ នៅលើទឹកដីខេត្តពោធិ៍សាត់៕

អត្ថបទ៖ សុខុម