អ្នកជំនាញរកឃើញកំណត់ត្រាថ្មីសម្រាប់ពិភពលោក នៅភ្នំបាណន់ ជាសត្វខ្យងគោក និងដាក់ឈ្មោះថា ខ្យងឧទយាទិត្យ

អ្នកនាំពាក្យក្រសួងបរិស្ថាន លោក ខ្វៃ អាទិត្យា ឱ្យដឹងថា អ្នកជំនាញ រកឃើញខ្យងគោកមួយប្រភេទនៅភ្នំបាណន់ ក្នុងខេត្តបាត់បំដង និងទទួលស្គាល់ថាជាប្រភេទខ្យងគោកថ្មី ដែលជាកំណត់ត្រាថ្មីសម្រាប់ពិភពលោក ។  តាមអ្នកនាំពាក្យ ខ្យងប្រភេទនេះ  ត្រូវបានគេដាក់ឈ្មោះឱ្យថាខ្យងឧទយាទិត្យ «Clostophis udayaditinus» គឺដើម្បីឧទ្ទិសដល់ព្រះបាទ ឧទយាទិត្យវរ្ម័នទី២ (១០៥០ -១០៦៦) ដែលជាព្រះរាជាខ្មែរ ដំបូងគេដែលបានកសាងប្រាសាទភ្នំបាណន់ នៅលើកំពូលភ្នំបាណន់។

លោក ខ្វៃ អាទិត្យា អនុរដ្ឋលេខាធិការក្រសួងបរិស្ថាន ឱ្យដឹងថា ការស្រាវជ្រាវត្រូវបានធ្វើឡើងកាលពីឆ្នាំ ២០២៤ ដោយអង្គការសត្វព្រៃ និងរុក្ខជាតិកម្ពុជា សហការជាមួយក្រសួងបរិស្ថាន និងក្រុមអ្នកជំនាញមកពីសាកលវិទ្យាល័យ Chulalongkorn, សាកលវិទ្យាល័យ Mahidol និងសាកលវិទ្យាល័យ Khon Kaenនិងគាំទ្រថវិកាពីសហភាពអឺរ៉ុប (EU) តាមរយៈគម្រោង Bcoming។

អ្នកនាំពាក្យក៏បានឱ្យដឹងថា តាមការសិក្សា កន្លងមកពីតំបន់ភ្នំថ្មកំបោរ ប្រទេសកម្ពុជា គេបានកត់ត្រាខ្យងគោកចំនួន១៣ប្រភេទ ពីពួក(Genus)ចំនួន៥ ក្នុងនោះក៏មិនទាន់មានពួក  “Clostophis”នេះដែរ។ ដូចនេះការសិក្សា ក៏បានបញ្ជាក់អំពីការរកឃើញនូវប្រភេទខ្យងគោកកំណត់ត្រាថ្មីសម្រាប់ពិភពលោក និងក៏បានបង្កើតនូវកំណត់ត្រាពួកថ្មីសម្រាប់ប្រទេសកម្ពុជាផងដែរ។  ខ្យងគោកពួក Clostophis ជាពួកខ្យងដែលមានទំហំតូច (ជាទូទៅតូចជាង២មីលីម៉ែត្រ)  ហើយ ខ្យងឧទយាទិត្យClostophis udayaditinus  គឺជាខ្យងទី២០នៃពួក Clostophis ដែលត្រូវបានគេរកឃើញ។

បើតាមលោក ខ្វៃ អាទិត្យា តំបន់ទេសភាពភ្នំថ្មកំបោរនៅប្រទេសកម្ពុជាសម្បូរទៅដោយប្រភេទសត្វដែលមានវត្តមានតែនៅក្នុងតំបន់ទាំងនេះ (Endemic) ។ លោក ចាត់ទុកថា ការរកឃើញនេះមានសារសំខាន់ព្រោះវាជាកំណត់ត្រាដំបូងនៃពួកខ្យង Clostophis នៅកម្ពុជា បានបង្ហាញពីលក្ខណ:ពិសេសនៃលក្ខខណ្ឌភូមិសាស្រ្ត និងប្រពន្ធអេកូឡូស៊ីនៃតំបន់ថ្មកំបោរកម្ពុជា ដែលមានសារសំខាន់សម្រាប់ការអភិរក្ស៕