ព័ត៌មានជាតិ

សហគ្រិនស្ត្រីកម្ពុជានៅខេត្តកោះកុង កំពុងបង្កើនចំនួនស្ត្រីជាសមាជិក ដើម្បីពង្រឹងវិស័យអាជីវកម្ម និងសេដ្ឋកិច្ចក្នុងសង្គម

បានផុស

៣ ថ្ងៃ មុន

នៅ

ថ្ងៃពុធ ២៦ មីនា ២០២៥

ដោយ

សមាគមសហគ្រិនស្ត្រីកម្ពុជានៅខេត្តកោះកុង បាននិងកំពុងបង្កើនការកសាងចំនួនស្ត្រីជាសមាជិករបស់ខ្លួន ដើម្បីពង្រឹងវិស័យអាជីវកម្ម និងលើកកម្ពស់សេដ្ឋកិច្ចក្នុងសហគមន៍ គ្រាបង្កើតសមាគមបានជាង ១ ឆ្នាំ កន្លងទៅនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមាគមសហគ្រិនស្ត្រីកម្ពុជា សាខាខេត្តកោះកុង បានរៀបចំពិធីរាត្រីសមោសរ Gala-Dinner CWEA-KOH KONG ក្រោមប្រធានបទ “សិទ្ធិ សមភាព និងភាពអង់អាច នៃនារីសម័យសន្តិភាព” ដើម្បីរំលឹកខួប ១ ឆ្នាំ នៃការបង្កើតសមាគមនេះឡើង។

លោកស្រី ថុង ណាត់ស្យា ប្រធានសមាគមសហគ្រិនស្ត្រីកម្ពុជានៅខេត្តកោះកុង ថ្លែងនៅយប់ថ្ងៃទី ២៥ ខែមីនា ឆ្នាំ ២០២៥ ថា សហគ្រិនស្ត្រីរបស់លោកស្ត្រី ផ្សារភ្ជាប់នឹងយុទ្ធនាការសកម្មភាពជាច្រើនដូចជា ៖ យុទ្ធនាការផ្សព្វផ្សាយពីផលិតផលរបស់សមាជិកក្នុងពិធីតាំងពិព័រណ៍ពាណិជ្ជកម្មនានា ជួយស្វែងរកទីផ្សារលក់ចេញនូវផលិតផល ស្វែងរកប្រភពហិរញ្ញវត្ថុពីដៃគូសហការ សម្រាប់ធុរកិច្ច សហគ្រាសធុនតូច និងមធ្យម។

លោក ថុង ណាត់ស្យា ពន្យល់ទៀតថា បេសកកម្មរបស់សមាគមសហគ្រិនស្ត្រីកម្ពុជានៅខេត្តកោះកុង នឹងចូលរួមចលនា ដើម្បីជួយបង្កើន និងកសាងចំនួនស្ត្រីជាសមាជិក សម្រាប់ឆ្ពោះទៅរកភាពជោគជ័យក្នុងអាជីវកម្មឱ្យបានច្រើន ដើម្បីជះឥទ្ធិពលជាវិជ្ជមានក្នុងសង្គមជាតិ។ សមាគមសហគ្រិនស្ត្រីកម្ពុជាខេត្តកោះកុង នឹងបើកវគ្គបណ្ដុះបណ្ដាល និងផ្តល់ជំនាញថ្មីៗ មកចែករំលែកជូនស្ត្រីជាសមាជិក ក៏ដូចជាអាជីវករក្នុងខេត្តឱ្យបានកាន់តែស៊ីជម្រៅទៅលើសកម្មភាពអាជីវកម្ម ក្នុងសម័យកាលឌីជីថល ស្របនឹងភាពរីកចម្រើន និងតម្រូវការទីផ្សារក្នុងពេលបច្ចុប្បន្ន។

លោកស្រី មិថុនា ភូថង អភិបាលខេត្តកោះកុង មើលឃើញច្រើនពីលទ្ធផលការងារស្នូលរបស់សមាគមសហគ្រិនស្ត្រីកម្ពុជានៅខេត្តកោះកុង ដោយលោកស្រីយល់ថា សមាគមនេះពិតជាបានសហការ និងធ្វើសកម្មភាពជាច្រើនជួយអប់រំបណ្តុះបណ្តាល ពង្រឹងគុណភាពផលិតផល និងផ្សព្វផ្សាយបានកាន់តែទូលំទូលាយពីផលិតផលដែលមានស្រាប់ទៅកាន់ទីផ្សារក្នុងរយៈពេលជាង ១ ឆ្នាំនេះ។

លោកស្រីអភិបាលខេត្ត រំលេចទៀតដែរថា រាជរដ្ឋាភិបាលកម្ពុជា បានចាត់ទុកស្ត្រីជាស្នូលឆ្អឹងខ្នងមួយដ៏សំខាន់ក្នុងការចូលរួមចំណែកអភិវឌ្ឍន៍សេដ្ឋកិច្ចជាតិដែលផ្តោតលើមូលធនមនុស្ស ការលើកកម្ពស់វិស័យយេនឌ័រ អប់រំសុខភាព ផ្តល់ភាពអង់អាច និងការដឹកនាំគ្រប់កម្រិតតាមស្ថាប័ននីមួយៗ។

រីឯលោកស្រី ចាន់ ភារី ប្រធានសមាគមសហគ្រិនស្ត្រីកម្ពុជា ក៏បានកោតសរសើរ ព្រមទាំងវាយតម្លៃខ្ពស់ពីកិច្ចប្រឹងប្រែងសមាជិក នៃសហគ្រិនស្ត្រីកម្ពុជានៅខេត្តកោះកុង។ ទន្ទឹមនោះ លោកស្រី ជំរុញឱ្យមានការកៀរគរសមាជិកបន្ថែមចូលក្នុងសហគ្រិនស្ត្រីនៅខេត្តកាន់តែច្រើន ដោយផ្តោតលើការងារជួយស្ត្រីគ្នាឯងទៅអនាគត៕

អត្ថបទ ៖ សិរីវឌ្ឍនៈ