ព័ត៌មានជាតិ

អគ្គនាយក ប.ស.ស បន្តចុះទស្សនកិច្ចនៅមន្ទីរពេទ្យមិត្តភាពខ្មែរ-សូវៀត ពិនិត្យលើលំហូរការផ្ដល់សេវាជូនសមាជិក ប.ស.ស

បានផុស

២ ថ្ងៃ មុន

នៅ

ថ្ងៃព្រហស្បតិ៍ ២៧ មីនា ២០២៥

ដោយ

បន្ទាប់ពីបានចុះទស្សនកិច្ចនៅមន្ទីរពេទ្យជាតិតេជោសន្ដិភាពរួចមក នៅព្រឹកថ្ងៃទី២៦ ខែមីនា ឆ្នាំ២០២៥ នេះ លោក ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្ដុះបណ្ដាលវិជ្ជាជីវៈ បានអញ្ជើញបន្តចុះទស្សនកិច្ចដោយផ្ទាល់នៅមន្ទីរពេទ្យមិត្តភាពខ្មែរ-សូវៀត ដើម្បីពិនិត្យលើស្ថានភាព និងរំហូរនៃការផ្ដល់សេវាជូនសមាជិក ប.ស.ស. ព្រមទាំងជួបសំណេះសំណាល និងសួរសុខទុក្ខអ្នកជំងឺ គ្រួសារអ្នកជំងឺ ដែលមកទទួលសេវានៅមន្ទីរពេទ្យមិត្តភាពខ្មែរ-សូវៀត ជាច្រើនរូបផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយគ្នានោះផងដែរ លោកប្រតិភូរាជរដ្ឋាភិបាល បានជួបពិភាក្សាជាមួយលោកសាស្ត្រាចារ្យ ងី ម៉េង នាយកមន្ទីរពេទ្យមិត្តភាពខ្មែរ-សូវៀត ដើម្បីឈ្វេងយល់អំពីចំណុចខ្វះខាតជាមួយគ្នាដើម្បីបំពេញបន្ថែម សំដៅដល់ការបង្កើនកិច្ចសហការឱ្យកាន់តែជិតស្និទ្ធ ដើម្បីធានាបានគុណភាពនៃការផ្ដល់សេវាជូនសមាជិក ប.ស.ស. ប្រកបដោយប្រសិទ្ធភាព ឆាប់រហ័ស ច្បាស់លាស់ ជាមួយនឹងក្រមសីលធម៌វិជ្ជាជីវៈ។

ការចុះពិនិត្យការផ្តល់សេវាជូនសមាជិក ប.ស.ស នៅតាមមន្ទីរពេទ្យរដ្ឋនេះធ្វើឡើងដោយសារបច្ចុប្បន្នមានសមាជិក ប.ស.ស រាប់រយនាក់ ក្នុង១ថ្ងៃៗ បានទៅទទួលសេវានៅតាមមន្ទីរពេទ្យថ្នាក់ជាតិនៅក្នុងរាជធានីភ្នំពេញយ៉ាងច្រើនកុះករធ្វើឱ្យកកស្ទះនិងត្រូវចំណាយពេលវេលាយូរក្នុងការទៅទទួលសេវាព្រោះសមាជិក ប.ស.ស ម្នាក់ៗ តម្រូវឱ្យតម្រង់ជួរចូលម្នាក់ម្តងៗទៅតាមលេខរៀងអ្នកទៅមុនបានមុន និងអ្នកទៅក្រោយ ត្រូវរង់ចាំតាមលេខរៀងជាបន្តបន្ទាប់។ ការកកស្ទះនេះដោយសារតែមានការគាំទ្រពីប្រជាពលរដ្ឋមកលើសេវា ប.ស.ស កើនឡើងជាបន្តបន្ទាប់ ខណៈបច្ចុប្បន្ននេះចំនួនសមាជិក ប.ស.ស បានកើនឡើងជិត២លាន៨សែននាក់ និងមានមូលដ្ឋានសុខាភិបាល ដែលជាដៃគូជាមួយ ប.ស.ស ចំនួន ១,៥៩៥ មូលដ្ឋាន ក្នុងនោះវិស័យឯកជនចំនួន ១៦៣មូលដ្ឋាន៕

អត្ថបទ ៖ សំអឿន