ព័ត៌មានជាតិ

សមាគមធនាគារ បង្ហើបពីការបញ្ចុះអត្រាការប្រាក់កម្ចី នៅតាមគ្រឹះស្ថានធនគារ

បានផុស

២ ថ្ងៃ មុន

នៅ

ថ្ងៃព្រហស្បតិ៍ ២៧ មីនា ២០២៥

ដោយ

ថ្លែងនៅក្នុងវេទិកាពិភាក្សាក្នុងវិស័យហិរញ្ញវត្ថុស្តីអំពី «ការចូលរួមផ្សព្វផ្សាយចំណេះដឹងហិរញ្ញវត្ថុ និងប្រើប្រាស់ឥណទានប្រកបដោយការទទួលខុសត្រូវ» រៀបចំដោយ CBC រួមជាមួយក្លឹបអ្នកកាសែតកម្ពុជាកាលព្រឹកម្សិលមិញនេះ មន្រ្តីសមាគមធនាគារបានបង្ហើបពីការបញ្ចុះអត្រាការប្រាក់នៅតាមគ្រឹះស្ថានហិរញ្ញវត្ថុ ស្របនឹងកំណើនប្រាក់បញ្ញើមានការកើនឡើង ជាមួយបរិបទសេដ្ឋកិច្ចពិភពលោកមានការប្រែប្រួល។

លោក រ័ត្ន សោភ័ណ ប្រធានក្រុមប្រឹក្សាភិបាលសមាគមធនាគារនៅកម្ពុជាបានលើកកត្តាមួយចំនួន ដែលនាំឲ្យគ្រឹះស្ថានធនាគារនៅកម្ពុជាបានបញ្ចុះអត្រាការប្រាក់ទាំងការផ្តល់ឥណទាន និងប្រាក់បញ្ញើដល់អតិថិជន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានលើកហេតុផលថា កត្តាទីផ្សារអន្តរជាតិដូចជានៅអាមេរិកបានបន្ទាបអត្រាការប្រាក់ បន្ទាប់ពីដំឡើងប៉ុន្មានឆ្នាំជាប់គ្នា។ ដោយកត្តាទីផ្សារខាងក្រៅជះឥទ្ធិពលមួយចំណែកលើប្រតិបត្តិការហិរញ្ញវត្ថុក្នុងប្រទេសកម្ពុជា ថ្នាក់ដឹកនាំសមាគមធនាគារនៅកម្ពុជាក៏លើកពីកត្តាក្នុងស្រុកដែលមានទំនាក់ទំនងនិងជះឥទ្ធិពល ដល់ការប្រែប្រួលអត្រាការប្រាក់ក្នុងប្រទេស។

លោក រ័ត្ន សោភ័ណ បានគូសបញ្ជាក់ថា ប៉ុន្មានឆ្នាំចុងក្រោយនេះ កំណើននៃប្រាក់បញ្ញើនៅតាមគ្រឹះស្ថានហិរញ្ញវត្ថុមានការកើនឡើងយ៉ាងខ្លាំង។

រយៈពេល ២ ឆ្នាំចុងក្រោយជាប្រវត្តិសាស្ត្រ ដែលកំណើនប្រាក់បញ្ញើខ្ពស់ជាងឥណទាន។ ឆ្នាំ ២០២៤ កំណើនឥណទានមានប្រហែល ២ ពាន់លានដុល្លារស្មើ ៣.៣% ប៉ុន្តែកំណើនប្រាក់បញ្ញើមានជាង ៨ ពាន់លានដុល្លារ ស្មើ ១៦%។

«ដូច្នេះបានន័យថា ធនាគារនៅសល់លុយច្រើន ខណៈអនុបាតរវាងឥណទាន និងប្រាក់បញ្ញើក៏ជិតស្មើគ្នា។ ឥណទានមានសរុបប្រមាណ ៥៧ ពាន់លានដុល្លារ និងប្រាក់បញ្ញើមានខ្ទង់ប្រហែល ៥៤ ទៅ ៥៤ ពាន់លានដុល្លារ»។

លោក រ័ត្ន សោភ័ណ បញ្ជាក់បន្ថែមថា នៅពេលថ្លៃដើមប្រាក់បញ្ញើថយចុះ ការផ្តល់ឥណទានដល់អតិថិជនក៏ថយចុះតាមហ្នឹងដែរ។ នៅពេលថ្លៃដើមការប្រាក់បញ្ញើថោក ថ្លៃដើមឥណទានក៏ថោកដូចគ្នា។

ធនាគារជាអន្តរការីប្រមូលប្រាក់បញ្ញើ និងផ្តល់ឥណទាន។ បើតាមលោក រ័ត្ន សោភ័ណ ក្នុងរយៈពេល ១២ ខែចុងក្រោយនេះ អត្រាការប្រាក់ថយចុះក្នុងតារាងសមតុល្យ ទាំងការផ្តល់ឥណទាននិងទទួលប្រាក់បញ្ញើ៕