ផលិត​ករភាពយន្តខ្នាត​ធំ​ដ៏​ល្បី​របស់​បរទេស​ ស្នើយក​ប្រទេស​កម្ពុជា ពិសេស​តំបន់​អង្គរវត្ត​ជា​ទីតាំង​ផលិតវិដេអូ

ភ្នំពេញ ៖ ផលិតករ​ភាពយន្តខ្នាតធំដ៏ល្បី​មួយ​ មកពីក្រុមហ៊ុន Bright Bay Creativeបាន​សុំ​យក​ប្រទេសកម្ពុជា ជាពិសេសនោះ​គឺ​តំបន់​ប្រាសាទ​អង្គរវត្តធ្វើជាតំបន់​ថតវិដេអូបែបផ្សងព្រេង។

លោក MICHAEL W. FAHEY ផលិតករ​ភាពយន្ត​ពី​ក្រុមហ៊ុន Bright Bay Creative និងសហការី បានលើកឡើងថា ដោយសារតែ​មើលឃើញ​កម្ពុជា​ធ្លាប់​ទទួល​បដិសណ្ឋារកិច្ច​ល្អ​ទាំងភ្ញៀវជាតិ និងអន្តរជាតិតូច​ធំ និង​មាន​សុខសន្តិភាព សុវត្ថិភាព​ដ៏​ល្អ រួម​ទាំងភាព​ល្បីល្បាញជាបេតិកភណ្ឌពិភពលោក និងភាព​រួសរាយរាក់​ទាក់របស់ប្រជាជនកម្ពុជា ទើប​លោក​គោរពស្នើសុំអនុសាសន៍ពីលោក ហួត ហាក់ រដ្ឋមន្ត្រីក្រសួងទេសចរណ៍ ដើម្បីគាំទ្រ​កិច្ចសហការគាំទ្រលើ​គម្រោងថតវីដេអូបែបផ្សងព្រេងនៅប្រាសាទអង្គរវត្ត និងតំបន់ផ្សេងៗទៀត ក្នុងខេត្តសៀមរាបនាពេលខាងមុខ​។

ជាលទ្ធផលនៃជំនួបនៅថ្ងៃទី២៧ ខែមីនា ឆ្នាំ២០២៥នេះ ដែលមានសារៈសំខាន់ និងប្រកបដោយផ្លែផ្កានេះ លោករដ្ឋមន្ត្រី ហួត ហាក់ បានកោតសរសើរ និងវាយតម្លៃខ្ពស់ ចំពោះគំរោងវីដេអូ និងការសម្រេចចិត្តដ៏ត្រឹមត្រូវរបស់ក្រុមហ៊ុនដែលបានជ្រើសរើសប្រទេសកម្ពុជា ជាទីតាំងថត និងសូមស្វាគមន៍ក្នុងការផ្តល់កិច្ចសហការគាំទ្រដល់ក្រុមហ៊ុន។

សូមបញ្ជាក់ថា ក្រុម​ហ៊ុន​Bright Bay Creative ក៏មាន​ដៃគូក្រុមហ៊ុន​សហការ​ជា​ច្រើន​ដូចជា NETFLIX, Youtube, Discovery, NFLPA, IMG, Facebook, COMPLEX, Music Television(MTV) , FOX Sport និង ដៃគូសហការជាច្រើនទៀត ដែល​រាល់​វីដេអូ​នីមួយៗ ទទួលបានការទស្សនា និង​តាម​ដាន​ជិត២០០លាននាក់៕

កែសម្រួលដោយ ៖ នាគព័ន្ធ