អដ្ឋិធាតុកងទ័ពអាមេរិក ដែលស្លាប់ក្នុងសមរភូមិសង្គ្រាមនៅកម្ពុជា ធ្វើមាតុភូមិនិវត្តន៍ទៅស្រុកកំណើត

កម្ពុជា-សហរដ្ឋអាមេរិក តាមរយៈស្ថានទូតអាមេរិកនៅភ្នំពេញ កាលពីថ្ងៃទី​២៧ ខែមីនា ឆ្នាំ ២០២៥ បានរៀបចំពិធីមួយ ដើម្បីអបអរសាទរការប្រគល់អដ្ឋិធាតុកងទ័ពសហរដ្ឋអាមេរិកពីររូប ដែលត្រូវបានរកឃើញនៅកន្លែងធ្លាក់យន្តហោះ​អាមេរិក និងបានបាត់នៅខេត្តរតនគិរី កាលពី ៥៥ ឆ្នាំមុន នៅក្នុងសម័យសង្គ្រាមវៀតណាម។

សេចក្តីប្រកាសព័ត៌មានរបស់ស្ថានទូតអាមេរិកនៅភ្នំពេញ បានបញ្ជាក់ថា៖«នេះគឺជាពិធីប្រគល់អដិ្ឋធាតុដំបូង នៅព្រះរាជាណាចក្រកម្ពុជា គិតតាំងពីឆ្នាំ ២០១៥ មក ហើយជាព្រឹត្តិការណ៍ដំសំខាន់ក្នុងការស្រាវជ្រាវ និងស៊ើបអង្កេតទៅលើស្ថានភាពនៃការធ្លាក់យន្ត​ហោះ និងទីតាំងបាត់ខ្លួន​នៃសមាជិកកងទ័ពទាំងពីរនាក់​នោះ»។

អដ្ឋិធាតុ ដែលបានរកឃើញ នឹងត្រូវបានដឹកយកទៅមន្ទីរពិសោធន៍របស់អង្គភាពទទួលបន្ទុកផ្នែកឈ្លើយសឹក និងយុទ្ធជនបាត់ខ្លួនរបស់ក្រសួងការពារជាតិសហរដ្ឋអាមេរិក (DPAA) នៅទីក្រុង Honolulu ដើម្បីគេធ្វើការវិភាគបន្ថែម នៅក្នុងមន្ទីរពិសោធន៍​ដ៏ទំនើបរបស់ DPAA។

ឆ្នាំនេះ រដ្ឋាភិបាលសហរដ្ឋអាមេរិកអបអរសាទរខួបលើកទី ៧៥  នៃការបង្កើតទំនាក់ទំនងការទូតជាមួយព្រះរាជាណាចក្រកម្ពុជា។ ជាមួយនឹងការគាំទ្រយ៉ាងខ្លាំងពីគណៈកម្មាធិការទទួលបន្ទុកឈ្លើយសឹក និងយុទ្ធជនបាត់ខ្លួន (POW/MIA) កម្ពុជា និង DPAA បានធ្វើសកម្មភាពរុករកសមាជិកនៃកងទ័ពសហរដ្ឋអាមេរិកចំនួន ៤៨ នាក់ដែលនៅស្ថិត​ក្នុងបញ្ជីបាត់ខ្លួននៅឡើយ នៅប្រទេសកម្ពុជា។

បើតាមសេចក្តីប្រកាសដដែល អង្គភាព DPAA ធ្វើការស៊ើបអង្កេត និងរុករកជាប្រចាំ នៅទូទាំងពិភពលោក ដោយផ្តល់ការគាំទ្រដល់ការខិតខំក្នុងការរុករកយុទ្ធជនអាមេរិកចំនួនជាង ៨២ ០០០ នាក់ ដែលនៅបាត់ខ្លួននៅឡើយ នៅក្នុងសង្គ្រាម ចាប់តាំងពីសង្គ្រាមលោកលើកទី ២ មក។

លោកស្រីភារធារី​នៃស្ថានទូតអាមេរិក​នៅភ្នំពេញ Bridgette Walker និងលោក សៀង ឡាប្រេស អនុប្រធាននៃគណៈកម្មាធិការកម្ពុជា ទទួលបន្ទុកឈ្លើយសឹក និងយុទ្ធជនបាត់ខ្លួនក្នុងសង្គ្រាម។

អង្គភាពទទួលបន្ទុកផ្នែកឈ្លើយសឹក និងយុទ្ធជនបាត់ខ្លួនរបស់ក្រសួងការពារជាតិសហរដ្ឋអាមេរិក (DPAA) ដែលត្រូវបានជួយក្នុងការរុករកដោយក្រុមគាំទ្ររបស់ DPAA មកផ្នែកក្រុមបូរាណវិទ្យា ដែលមានឈ្មោះថា Ohio Valley Archaeology  និងក្រុមហ៊ុន Golden West សង្ឃឹមថា អដ្ឋិធាតុ ដែលត្រូវបានរកឃើញ នឹងនាំឱ្យគេអាចកំណត់អត្តសញ្ញាណ នៃសមាជិកកងទ័ពពីររូបដែលបានបាត់ខ្លួន និងផ្តល់ជាចម្លើយចុងក្រោយ ដល់គ្រួសាររបស់ពួកគេ៕