ព័ត៌មានជាតិ

មន្ត្រីជាន់ខ្ពស់ ណែនាំពលករខ្មែរធ្វើការនៅថៃ ត្រូវត្រៀមឯកសារឱ្យបានគ្រប់គ្រាន់ មុនមកលេងស្រុក ក្នុងឱកាសបុណ្យចូលឆ្នាំខ្មែរ

បានផុស

១ សប្តាហ៍ មុន

នៅ

ថ្ងៃសុក្រ ២៨ មីនា ២០២៥

ដោយ

មន្ត្រីជាន់ខ្ពស់ នៃក្រសួងការងារ និងបណ្ដុះបណ្ដាលវិជ្ជាជីវៈ បានណែនាំដល់ពលករខ្មែរធ្វើការនៅប្រទេសថៃ ដែលត្រូវធ្វើដំណើរមកលេងស្រុកក្នុងឱកាសបុណ្យចូលឆ្នាំថ្មីខាងមុខនេះ ត្រូវត្រៀមឯកសារឱ្យបានគ្រប់គ្រាន់ ដើម្បីចៀសវាងមានបញ្ហាផ្សេងៗ ឬប៉ះពាល់ដល់សុខសុវត្ថិភាព ខណៈបច្ចុប្បន្នមានពលករមួយចំនួនបានធ្វើដំណើរតាមច្រកព្រំដែនអន្តរជាតិនានាចូលមកប្រទេសកម្ពុជាជាបណ្តើរៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍នៅរសៀលថ្ងៃទី ២៨ មីនា នេះថា «ខ្ញុំសូមធ្វើការអំពាវនាវដល់បងប្អូនពលករខ្មែរដែលមានបំណងចង់វិលត្រឡប់មកមាតុប្រទេសវិញ ក្នុងឱកាសបុណ្យចូលឆ្នាំប្រពៃណីជាតិខាងមុខនេះ សូមត្រៀមឯកសារឱ្យបានគ្រប់គ្រាន់ក្នុងការបំពេញបែបបទក្នុងការចេញចូលប្រទេសកម្ពុជាហើយការចេញចូលកម្ពុជានេះចាប់ពីថ្ងៃទី ១ មេសា រហូតដល់ថ្ងៃទី ១៥ ខែឧសភា មិនមានការបង់ថ្លៃទិដ្ឋាការទេ សូមរក្សារបៀបរៀបរយឱ្យបានត្រឹមត្រូវនៅក្នុងការរង់ចាំការបំពេញបែបបទ ត្រូវសហការជាមួយមន្ត្រី ក៏ដូចជាសមត្ថកិច្ចពាក់ព័ន្ធក្នុងករណីបងប្អូនមានចម្ងល់អ្វីមួយអាចសាកសួរព័ត៌មានពីមន្ត្រីនៅទីនោះ ដើម្បីធ្វើយ៉ាងណាឱ្យការចេញចូលប្រកបដោយរលូន និងមិនមានការកកស្ទះយូរ»។

លោក កត្តា អ៊ន បានលើកឡើងថា ក្នុងនាម ក្រសួងការងារ សូមជូនពរពីចម្ងាយដល់ពលករដែលធ្វើដំណើរពីប្រទេសថៃចូលមកកម្ពុជា សូមឱ្យមានសុខសុវត្ថិភាព សុខភាពល្អ សប្បាយរីករាយ ក្នុងឱកាសបុណ្យចូលឆ្នាំថ្មី និងមានសុភមង្គលគ្រប់ក្រុមគ្រួសារ។

ជាមួយគ្នានេះ លោក កត្តា អ៊ន បានណែនាំដល់ពលករខ្មែរកុំចូលតាមច្រករបៀងខុសច្បាប់ផ្សេងៗ ដើម្បីចៀសវាងមានបញ្ហា និងប៉ះពាល់ដល់សុខសុវត្ថិភាព។

គួរបញ្ជាក់ថា គិតត្រឹមខែធ្នូ ឆ្នាំ ២០២៤ មានពលករខ្មែរដែលកំពុងស្នាក់នៅ និងធ្វើការនៅប្រទេសថៃចំនួន ១ ២៩២ ២៩៧ នាក់ ស្រី ៥២១ ៨៦២ នាក់ ដោយពួកគាត់ទៅធ្វើការនៅតាមបណ្តារោងចក្រ និងក្រុមហ៊ុននានាដូចជា តាមរោងចក្រចំណីអារហារ ផ្នែកឧស្សាហកម្មក្រុមហ៊ុនសំណង់ សេវាកម្ម និងកសិកម្ម ដោយជាមធ្យមទទួលបានប្រាក់ខែ ៤០០ ដុល្លារ ក្នុង ១ ខែ និងបានផ្ញើថវិកាមកក្រុមគ្រួសារវិញប្រមាណជាង ២ ពាន់លានដុល្លារ ក្នុង ១ ឆ្នាំ បានចូលរួមលើកស្ទួយសេដ្ឋកិច្ចគ្រួសារ ក៏ដូចជាសេដ្ឋកិច្ចជាតិកាន់តែរីកចម្រើន៕

អត្ថបទ ៖ សំអឿន