តម្លៃប្រេងអន្តរជាតិធ្លាក់ចុះតិចតួចប្រចាំថ្ងៃ តែកើនប្រចាំសប្ដាហ៍

តម្លៃប្រេង​អន្តរជាតិសម្រាប់ការ​បញ្ចប់ការជួញដូរកាលពីថ្ងៃសុក្រ បាន​ធ្លាក់ចុះតិចតួច​ ជុំវិញ​ក្ដីបារម្ភនៃវិបត្តិសេដ្ឋកិច្ចសកលដោយសារតែគោលនយោបាយពន្ធ ប៉ុន្តែបាន​កើនឡើង​ក្នុងអត្រាជួញដូរ​ប្រចាំសប្ដាហ៍ ដោយ​សារតែ​ការដាក់សម្ពាធរបស់សហរដ្ឋអាមេរិក​លើ​ការផ្គត់ផ្គង់ប្រេង​របស់អ៊ីរ៉ង់។ នេះបើតាម​ការចុះផ្សាយរបស់ទីភ្នាក់ងារសារព័ត៌មាន​រ៉យទ័រ​​។​

តម្លៃប្រេងឆៅនាពេលអនាគត ម៉ាក Brent បានធ្លាក់ចុះ ៤០ សេន ឬ ០,៥ ភាគរយ ដោយ​បញ្ចប់ការជួញដូរនៅ ៧៣,៦៣ ដុល្លារ/បារ៉ែល​ ខណៈតម្លៃប្រេង​ឆៅអាមេរិក ម៉ាក West Texas Intermediate (WTI) វិញ បានធ្លាក់ចុះ ៥៦ សេន ឬ ០,៨ ភាគរយ ដោយ​បិទ​ការជួញដូរ​នៅ ៦៩,៣៦ ដុល្លារ​/បារ៉ែល។ ​

វិធានការពន្ធឆ្លើយតបឱ្យស្មើគ្នារបស់ប្រធានាធិបតីអាមេរិក លោក ដូណាល់ ត្រាំ គ្រោង​នឹង​ចូលជាធរមាន​នៅសប្ដាហ៍ក្រោយ ដោយ​បង្កើនភាពតានតឹង​នៃសង្រ្គាម​ពាណិជ្ជកម្ម ដែល​ជំរុញក្ដីបារម្ភពីវិបត្តិសេដ្ឋកិច្ចសកលក្នុងចំណោម​អ្នកវិនិយោគ។

​យ៉ាងណាមិញ ក្នុងអត្រាប្រចាំសប្ដាហ៍ តម្លៃប្រេង​ម៉ាក​ Brent បានកើនឡើង ១,៩ ភាគរយ ខណៈប្រេង​ម៉ាក​ WTI បានកើនឡើង ១,៦ ភាគរយ​។ ក្រោយធ្លាក់ចុះទាបក្នុងរយៈពេល​ជាច្រើនខែ​កាលពីប៉ុន្មានសប្ដាហ៍មុន​ ពេល​នេះ​ តម្លៃ Brent បានស្ទុះងើបឡើង​វិញប្រមាណ ៧ ភាគរយ និង WTI ជាង ៦ ភាគរយ៕