អភិបាលក្រុងសែនមនោរម្យថាការអប់រំត្រូវការការចូលរួមពីគ្រប់មជ្ឈដ្ឋានសង្គម

អភិបាលក្រុងសែន មនោរម្យ ខេត្តមណ្ឌលគិរី លោក ហៀក សុផាន បាន​លើកឡើងថា ការអប់រំមិនមែនជាតួនាទីផ្ដាច់មុខ ឬការទទួលខុសត្រូវរបស់រាជរដ្ឋាភិបាលតែឯងនោះទេ គឺត្រូវការការចូលរួមពីគ្រប់ភាគទាំងអស់នៅក្នុងសង្គម។ លោកលើកឡើងបែបនេះក្នុងពិធីប្រកាសដាក់ឱ្យប្រើប្រាស់ឡើងវិញអាគារសិក្សាមួយខ្នងបន្ទាប់ពីជួសជុលរួច នៅសាលាបឋមសិក្សាពូតាំង ក្រុងសែនមនោរម្យ ខេត្តមណ្ឌលគិរី កាលពីថ្ងៃទី២៨ ខែមីនា ឆ្នាំ២០២៥។

ក្នុងឱកាសនេះលោក ហៀក សុផាន បាន​លើកឡើងថាការជួយដល់វិស័យអប់រំពីថ្នាក់ជាតិ ថ្នាក់ក្រោមជាតិ និងសប្បុរជនដល់ការអប់រំ គឺជាការវិនិយោគដែលត្រឹមត្រូវបំផុតដើម្បីជួយដល់សិស្សានុសិស្សឱ្យទទួលបានលទ្ធផលល្អនៅថ្ងៃអនាគត។ លោកក៏បានជំរុញ​ដល់សិស្សានុសិស្សនៃសាលាពូតាំង ត្រូវខិតខំពង្រឹងការរៀនសូត្ររបស់ខ្លួន យកចិត្តទុកដាក់ស្រាវជ្រាវកត់ត្រាអំពីមេរៀន ដែលលោកគ្រូអ្នកគ្រូបង្ហាត់បង្ហាញ​ ជាពិសេសអាណាព្យាបាលគឺមានតួនាទីយ៉ាងសំខាន់ ក្នុងការជួយតម្រង់ទិសបន្ថែមបង្រៀនដល់កូនៗរបស់ខ្លួន បន្ទាប់ពីលោកគ្រូអ្នកគ្រូផងដែរ។

លោកបានបញ្ជាក់ថា៖ «សិស្សានុសិស្សទាំងអស់ដែលថិតក្នុងវ័យសិក្សា គឺទំពាំងស្នងឫស្សី ជាសសរទ្រូងនៃប្រទេសជាតិ ត្រូវជៀសវាងឲ្យឆ្ងាយពីគ្រឿងញៀន កុំប្រព្រឹត្តអំពើខុសច្បាប់ ធ្វើខ្លួនជាកូនល្អ មិត្តល្អ និងសិស្សល្អក្នុងសង្គម»​។

លោកអភិបាលក្រុងក៏បានថ្លែងអំណរគុណដល់ក្រុមហ៊ុន( BNI Foundation Cambodia )ដែលបានចំណាយថវិកាចំនួនជាង៦ពាន់ដុល្លា ដើម្បី​ប្រគ​ល់​​ជូនគណៈគ្រប់គ្រងសាលាបឋមសិក្សា ពូតាំង កែលម្អអគារសិក្សាមួយខ្នងស្មើពីរបន្ទប់ សម្រាប់សម្រួលដល់ការរៀនសូត្ររបស់កុមារនៅមូលដ្ឋាន​ភូមិតាំង។

ប្រធានការិយាល័យអប់រំក្រុងសែនមនោរម្យលោក ទន់ គង់ បានឲ្យដឹងថាការរួមចំណែកពីមហាជន គឺសកម្មភាពដ៏ល្អឥតខ្ចោះក្នុង​កា​រ​​លើក​​ស្ទួយវិស័យ​អប់រំនៅតាមមូលដ្ឋានជាពិសេសតំបន់ដាច់ស្រយាល និងតំបន់ជនបទ។ លោកបានបន្តថា សមិទ្ធិផលទាំងនេះបា​នមក​​ពី​​ការ​ចូល​រួ​ម​ពី​គ្រប់ភាគីអ្ន​ក​ពា​ក់​​ព័ន្ធ អាជ្ញាធរគ្រប់លំដាប់ថ្នាក់ សហគមន៍អង្គការជាតិ និងអន្តរជាតិមកលើវិស័យអប់រំ។

បើតាមលោក ទន់ គង់ បច្ចុប្បន្ននេះនៅក្នុ​ងឆ្នាំសិក្សា២០២​៤-​២០២​៥ សាលា​បឋមសិក្សាពូតាំង មានសិស្សានុសិស្សសរុបចំនួន២៥២នាក់ ស្រី១៣០នាក់ ចំណែក សិស្សជនជាតិដើមភាគតិច សរុបចំនួន២២៦នាក់ ស្រី១១៦​នាក់ ​។ ក្នុងនោះ​មានសិស្សមត្តេយ្យ ចម្រុះចំនួន៣៦នាក់ ស្រី២០នាក់ និងគ្រូបង្រៀនចំនួន៧នាក់ ស្រី៥នាក់ផងដែរ៕