ប្រទះឃើញសពអណ្តែតទឹក ទើរនៅគល់ស្ពានទន្លេមេគង្គក្រចេះ

សាកសពយុវជនម្នាក់ត្រូវបានកម្មករសំណង់ធ្វើស្ពានទន្លេមេគង្គខេត្តក្រចេះ ប្រទះឃើញអណ្តែតទឹកទន្លេមេគង្គ ទើរ​នៅគល់សសរស្ពាននៅព្រឹកថ្ងៃទី ២៩ ខែមីនា ឆ្នាំ២០២៥។

ប្រភពពីសមត្ថកិច្ចបានឲ្យដឹងថា កាលពីថ្ងៃទី១៣ ខែមីនា ឆ្នាំ២០២៥ នៅវេលាម៉ោង ១៥៖៣០នាទី កើតមានឧបទ្ទវហេតុលង់​ទឹកទន្លេនៅចំណុចទឹកទន្លេក្បែរបន្ទាយទាហាន ភូមិជ្រោយបន្ទាយ ស្រុកព្រែកប្រសព្វ ខេត្តក្រចេះ។

សពយុវជនរងគ្រោះ ឈ្មោះ ជឿន ណារ៉ូ អាយុ១៥ ឆ្នាំ មានទីលំនៅ ភូមិខ្សាច់ទប់ ឃុំជ្រោយបន្ទាយ ស្រុកព្រែកប្រសព្វ ខេត្តក្រចេះ។

កាលពីថ្ងៃទី ១៣ ខែមីនា ឈ្មោះ ជឿន ណារ៉ូ និងឈ្មោះ យឿន ណារី ភេទប្រុស អាយុ១៤ឆ្នាំ និងឈ្មោះ រ៉ាត់ រ៉ាទីន ភេទប្រុស អាយុ ១៦ឆ្នាំ ដោយអ្នកទាំង ៣នាក់ មានទីលំនៅ ភូមិខ្សាច់ទប់ ឃុំជ្រោយបន្ទាយ ស្រុកព្រែកប្រសព្វ ខេត្តក្រចេះ បាននាំគ្នាចុះទៅលេងទឹកទន្លេនៅក្បែរបន្ទាយទាហាន ភូមិជ្រោយបន្ទាយ ស្រុកព្រែកប្រសព្វ ខេត្តក្រចេះ លុះដល់វេលាម៉ោង១៥ និង៣០នាទី ពេលដែលកំពុងហែលទឹកលេង ឈ្មោះ ជឿន ណារ៉ូ បានហែលដល់កន្លែងអន្លង់ទឹកជ្រៅ និងហូរខ្លាំង ពេលនោះស្រាប់តែបាត់ខ្លួនតែម្តង។

ចាប់តាំងពីថ្ងៃទី១៣ ខែមីនា ឆ្នាំ២០២៥ រហូតដល់ថ្ងៃទី២៩ ខែមីនា ឆ្នាំ២០២៥ វេលាម៉ោង១១ ទើបសពជនរងគ្រោះ ត្រូវបានគេប្រទះរកឃើញនៅចំណុចគល់ស្ពានព្រែកប្រសព្វ ចិត្របុរី កម្លាំងជំនាញ និងកម្លាំងប៉ុស្តិ៍នគរបាលរដ្ឋបាលព្រែកប្រសព្វ សហការជាមួយកម្លាំងជំនាញបច្ចេកទេសខេត្ត ពិនិត្យសាកសពឃើញថាមានសភាពហើមរលួយ។ បច្ចុប្បន្ន សពជនរងគ្រោះបានប្រគល់ជូនគ្រួសារចាត់ចែងធ្វើបុណ្យតាមប្រពៃណី៕

អត្ថបទ៖ ប្រុញ វិធិន