អាជ្ញាធរជាតិអប្សរា ដាក់ឱ្យប្រើប្រាស់ផ្លូវចេញ-ចូល ខ្លោងទ្វារខាងកើតប្រាសាទអង្គរវត្តឡើងវិញ

នៅរសៀលថ្ងៃទី៣១ ខែមីនា ឆ្នាំ២០២៥ អាជ្ញាធរជាតិអប្សរា បានជូនដំណឹងតាមរយៈទំព័រហ្វេសប៊ុក ពីការដាក់ឱ្យប្រើប្រាស់ឡើងវិញផ្លូវចេញ-ចូល ខ្លោងទ្វារខាងកើតប្រាសាទអង្គរវត្ត ចាប់ពីថ្ងៃផ្សាយដំណឹងតទៅ ដើម្បីផ្តល់ភាពងាយស្រួលដល់ភ្ញៀវទេសចរ។

តាមប្រភពដដែល ការប្រកាសឱ្យប្រើប្រាស់ឡើងវិញនូវផ្លូវចេញ-ចូល ខ្លោងទ្វារខាងកើតប្រាសាទអង្គរវត្ត ដើម្បីផ្តល់ភាពងាយស្រួលដល់ភ្ញៀវទេសចរជាតិ និងអន្តរជាតិដែលចូលទស្សនាប្រាសាទអង្គរវត្ត តាមរយៈការផ្តល់បទពិសោធថ្មី និងក្នុងគោលបំណងរក្សាសុវត្ថិភាពបន្ថែមក្នុងការធ្វើដំណើរថ្មើរជើងដល់ភ្ញៀវជាតិ និងអន្តរជាតិ។

ចំពោះផ្លូវដីដែលប្រើប្រាស់កន្លងមក អាជ្ញាធរជាតិអប្សរា បញ្ជាក់ថា នឹងប្រើប្រាស់សម្រាប់តែគោលដៅដឹកជញ្ជូនសម្ភារៈ និងឧបករណ៍សម្រាប់ជួសជុលនៅប្រាសាទអង្គរវត្ត និងក្នុងករណីចាំបាច់ផ្សេងៗប៉ុណ្ណោះ៕