Connect with us

ព័ត៌មានអន្ដរជាតិ

ឥណ្ឌូណេស៊ីផលិតស៊ុតលើសតម្រូវការ សម្លឹងនាំចេញទៅអាមេរិកដែលខ្វះខាត

បានផុស

នៅ

ឥណ្ឌូណេស៊ីរាយការណ៍ពីផលិតកម្មស៊ុតលើសតម្រូវការ ហើយ​កំពុងសម្លឹង​មើលបង្កើនការនាំចេញទៅសហរដ្ឋអាមេរិក ដែល​កំពុងប្រឈមមុខ​នៃ​ការឡើងខ្ពស់នៃថ្លៃស៊ុត ដោយសារតែ​កង្វះការផ្គត់ផ្គង់​។ នេះបើតាម​ការចុះផ្សាយរបស់​សារព័ត៌មាន​រដ្ឋ​ Antara កាលពីថ្ងៃអាទិត្យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងកសិកម្មឥណ្ឌូណេស៊ី បាន​កំណត់គោលដៅ ដើ​ម្បីសម្រួល​ដល់ការនាំចេញពងមាន់ចំនួន ១,៦ លាន​គ្រាប់/ខែ ទៅកាន់សហរដ្ឋអាមេរិក ខណៈផលិតកម្មលើសតម្រូវការ​ក្នុងស្រុក កើនដល់​​ ២៨៨,៧ ពាន់តោន ឬ​ស្មើ​នឹង​ ៥ ប៊ីលាន​គ្រាប់​/ខែ។​

ប្រធានអគ្គនាយកដ្ឋានការចិញ្ចឹមសត្វ និងសុខភាពសត្វរបស់ក្រសួង លោក Agung Suganda បាន​និយាយថា ជាមួយនឹងការផលិតលើស​តម្រូវការ​ ​ឥណ្ឌូណេស៊ីមានសក្តានុពលខ្លាំងក្នុងការផ្គត់ផ្គង់ស៊ុតដល់ប្រទេសដែលកំពុងជួបប្រទះ​កង្វះខាតស៊ុត ដោយសារតែជំងឺផ្ដាសាយបក្សីសត្វ រួមទាំងសហរដ្ឋអាមេរិក​ផងដែរ។

ជំងឺផ្ដាសាយបក្សីសត្វ ធ្វើឱ្យ​ផលិតកម្មស៊ុតរបស់សហរដ្ឋអាមេរិកធ្លាក់ចុះ ដែល​បណ្ដាលឱ្យតម្លៃស៊ុតហក់ឡើងជាប្រវត្តិសាស្រ្ត​។ ​ទិន្នន័យការិយាល័យស្ថិតិការងាររបស់សហរដ្ឋអាមេរិក បាន​បង្ហាញ តម្លៃស៊ុត​លក់រាយជាមធ្យម ហក់ឡើង​​ជិត ៦ ដុល្លារ/១២ គ្រាប់។

លោក Suganda បាននិយាយកាលពីថ្ងៃសៅរ៍ថា៖ «យើងបន្តលើកទឹកចិត្តឱ្យ​បង្កើន​ការនាំចេញ​ ដោយធានាថា ស្តង់ដារគុណភាព សុវត្ថិភាពចំណីអាហារ និងតម្រូវការរបស់ប្រទេសគោលដៅ ត្រូវបានបំពេញ» ។

លោកបានបន្ថែមថា៖ «ជាដំណាក់កាលដំបូង ការនាំចេញស៊ុត​ ១,៦ លាន​គ្រាប់/ខែទៅកាន់សហរដ្ឋ​អាមេរិក​ អាចនឹង​ធ្វើទៅបាន។ បច្ចុប្បន្ននេះ កិច្ចខិតខំប្រឹងប្រែងដើម្បីពិនិត្យឡើងវិញ និងបំពេញតាមពិធីការនាំចេញ កំពុងតែដំណើរការ»។

មន្រ្តីដដែលនិយាយថា​៖ «ស៊ុតដែលត្រូវនាំចេញ ត្រូវតែមានគុណភាពខ្ពស់ គ្មានមេរោគ Salmonella និងគ្មានសំណល់ថ្នាំអង់ទីប៊ីយោទិក ដើម្បីអនុលោមតាមស្តង់ដារសុវត្ថិភាពចំណីអាហារ ដែលកំណត់ដោយរដ្ឋបាលចំណីអាហារ និងឱសថសហរដ្ឋអាមេរិក (FDA)»។

​នៅឆ្នាំនេះ ផលិតកម្មស៊ុតរបស់ឥណ្ឌូណេស៊ី រំពឹងថា​នឹង​កើន​ដល់ ៦,៥ លានតោន ធៀបនឹងតម្រូវការ ៦,២ លាន​តោន ​ដោយ​បង្កជាការផ្គត់ផ្គង់លើសតម្រូវការ ២៨៨,៧ ពាន់តោន។ តួលេខនេះ​អាច​កើនឡើង ​ចំពេលដែល​រដ្ឋាភិបាលកំពុងជួយដល់អាជីវកម្មក្នុងការបំពេញតាមស្តង់ដារនាំចេញ ដោយចាប់ផ្តើមពីគុណភាព និងសុវត្ថិភាព រហូតដល់ការតាមដានផលិតផល៕

Helistar Cambodia - Helicopter Charter Services
Sokimex Investment Group
Sokha Hotels

ព័ត៌មានពេញនិយម