អាជ្ញាធរខេត្តសៀមរាប បន្តចុះផ្សព្វផ្សាយច្បាប់ពាក់ព័ន្ធនឹងជលផលដល់ប្រជានេសាទក្នុងឃុំកំពង់ឃ្លាំង

នៅថ្ងៃទី៣១ ខែមីនា ឆ្នាំ២០២៥ អាជ្ញាធរខេត្តសៀមរាប រួមជាមួយនឹងមន្រ្តីជំនាញ អាជ្ញាធរពាក់ព័ន្ធ បានបន្តចុះធ្វើការផ្សព្វផ្សាយពាក់ព័ន្ធនឹងការងារច្បាប់ជលផល ដល់ប្រជានេសាទក្នុងសហគមន៍ នៅឃុំកំពង់ឃ្លាំង ស្រុកសូទ្រនិគម ខេត្តសៀមរាប។

លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប បានឱ្យដឹងថា ការចុះផ្សព្វផ្សាយនេះ គឺដើម្បីជាការបញ្ជ្រាបដល់ប្រជានេសាទ អំពីការប្រើប្រាស់ឧបករណ៍នេសាទស្របច្បាប់ និងស្ដាប់បញ្ហាប្រឈម សំណូមពរនានារបស់ប្រជានេសាទ ធ្វើយ៉ាងណាឱ្យពួកគេអាចប្រកបរបរលើផ្ទៃបឹងទន្លេសាបដោយស្របតាមច្បាប់ស្ដីពីជលផល។

លោក ទា គឹមសុទ្ធ បន្តថា ការប្រើប្រាស់ឧបករណ៍នេសាទល្មើសច្បាប់ គឺជាការបំផ្លាញមុខរបរប្រចាំថ្ងៃរបស់ខ្លួន ដូច្នេះ លោកសំណូមពរឱ្យប្រជានេសាទរួមគ្នាប្រយុទ្ធប្រឆាំង ការប្រើប្រាស់ឧបករណ៍នេសាទខុសច្បាប់ ដើម្បីធានាដល់និរន្តរភាព ផលនេសាទ សម្រាប់ជីវភាពប្រចាំថ្ងៃ និងសន្តិសុខស្បៀងនៅកម្ពុជា។ លោកក៏បានណែនាំដល់ប្រជានេសាទទាំងអស់ មិនត្រូវឆ្លងកាត់តំបន់អភិរក្ស ត្រូវបញ្ឈប់ជាបន្ទាន់នូវការប្រើប្រាស់នូវឧបករណ៍ខុសច្បាប់ និងងាកមកប្រើប្រាស់ឧបករណ៍ដែលស្របតាមច្បាប់កំណត់ ជៀសវាងការខាតបង់ផលប្រយោជន៍ក្រោយអាជ្ញាធរបង្ក្រាប និងដើម្បីថែរក្សាធនធានធម្មជាតិនៅក្នុងបឹងទន្លេសាបឱ្យបានស្ថិតស្ថេរផងដែរ។

បើតាម លោក ប៉ា ប៉ូរ មេឃុំកំពង់ឃ្លាំង បានឱ្យដឹងថា ក្នុងឃុំកំពង់ឃ្លាំង គ្រួសារដែលប្រកបរបរនេសាទមានចំនួន៨០% ចំណែក២០%ទៀត ប្រជាពលរដ្ឋប្រកបរបរកសិកម្ម និងរបរផ្សេងៗ។ ក្នុងនោះប្រជានេសាទ បានប្រើប្រាស់ឧបករណ៍នេសាទដូចជា មងពាក់ សន្ទូច លបរ៉ាវ អូសលៀស លបព្រៀង មងអូសដោយដៃក្រោម១០០ម៉ែត្រ សៃយឺុន និងលាន់អន្ទង់ជាដើម៕

ដោយ៖ គឿនវេត